Суббота, апреля 20, 2024
Важное

Фестивалесь-пелькстамось пачкодсь куншкавидьс, икелепелев минек учить эштё зярыя районт, косо эрить ламо эрзянь ломанть. Течи жо ёвтнетяно седе, мезе ваныцятненень невтсть Отяжелень ды Ромодановань ёнкстнэ. Саранскоень РДК-нь омбоце этажсо сравтовкшнось «Мастерство земли мордовской» покш выставкась, косо невтезельть кедьчелькев ломантнень теевксэст, кодавксост, артовксост. Кодашка тесэ мазычи ды покш важодема! Кой-кона мастертнэде минь уш ёвтнинек минек газетань лопатнесэ, лиятнеде сёрмадтано сыця шкасто.



Отяжелень райононь самодеятельной артисттнэ невтизь концертэст субутасто, ноябрянь 11-це чистэ. Сон лемдезель «Кортамо сехте эрявикстэнть» («Разговор о важном»). Сценанть лангсто минь неинек-маринек ламо морот тиринь мастордонть, тиринь ёнкстонть, сынст вечкемадо ды кисэст аштемадо. Кинень эрявсь, организатортнэ явшесть программкат, косо сёрмадозельть участниктне ды весе репертуарось. Те тевесь паро, лия районтнэяк кадык саить пример. Ветясь программанть Ламбаське велень школань эрзянь келень тонавтыцясь Ольга Антипова, киштематнень путыцясь – МР-нь заслуженной артисткась Светлана Юшкина, директорось – Отяжелень райононь администрациянь Культурань управлениянь прявтось Анжела Ивашкина. Панжизе концертэнть райононь прявтось Константин Николаев.

Тешкстасынек, программась пешксель тиринь кельсэ мородо, ульнесть ламо фольклорной композицият. Марявсь, весе велень ансамблятне састь пряст невтеме. Мазый вайгельсэст кенярдовтызь ваныцятнень Сабанцелестэ «Комолькаесь», Ламбаськестэ «Горниповось», «Валскень зорясь», «Лисьмапрясь», «Киштемань кудось»… А кода пейдевтимизь «Покров бабась» – Селищасто Надежда Калугина вейсэ Татьяна Азоркинань ды Мария Модинань марто! А стувтовить Карина Рябовань, Юлия Абрамовань, Вера Войновань морост, раськень инструменттнэнь ансамблянть седямонзо «Любэ» группанть моротнень лангс, «Гравитация» од ломантнень группась, Ламбаськень школань од тештинесь Надежда Аитова, тетят-тейтерть Сергей ды Елизавета Шулгинтнэ. Концертэсь лиссь мазый, седеень витиця, эрзянь коень-кирдань ванстыця, сеске неявсь, районсонть раськень культурась эри ды виензы!

Недлячистэ ёрокчист невтизь Ромодановань артисттнэ, конатнень мелест кирдеме сась истя жо райононь прявтось Сергей Ведяшкин. Виев ульнесь программанть ушодксось, зярдо сценанть лангс лиссть весе участниктне ды морызь «Мейстэ ушодови Тиринь масторось?» содавикс моронть. Те темась мольсь весе концертэнть перть, малав весе участниктне оршнезельть ансяк раськень оршамопельсэ: рузонь, татаронь, эрзянь-мокшонь. Ансяк вана эрзянь кельсэ ульнесь вейке моро ды вейке киштема мокшонь кельсэ моро мельга. Арсетяно, райононтень эряви седе келейгавтомс те ёнксонть, эдь тесэ чачсть ды эрясть эрзянь ламо содавикс ломанть: сёрмадыцят, морыцят... Виевстэ невтизь пряст Пятинань велень клубонь аватне, сеске неяви, художественной руководителесь тосо алкуксонь! Мельспаросо вастызь ваныцятне Поросенковтнень ды Карповтнень семиятнень морост, Иван Купаладо коень-кирдань невтеманть, Ромодановань РДК-нь цёрань ансамблянть «Ты неси меня, река» моронть марто, гитарасо седиця тейтертнень дуэтэнть, вечкевсь весенень стихотворениясь, конасонть ёвтневсь, кода «Шумбрат, Мордовия!» фестивалесь 27 иетнень перть кастсь од морыцят-киштицят: тетятне-аватне ветизь эсест эйкакшост, покштятне-сырькайтне – нуцькинест… Концертэнть ветицятнеяк парсте топавтызь эсь тевест! Тешкстама, эсест тиринь ёнксонть кисэ сакшность «сэредеме» ламо эрицят, нать, тевесь сеньсэ – Ромодановась ашти а пек васоло Саранскоенть эйстэ. Ламо ульнесть Саранск ошсто эрицяткак, конатнень ундоксост Ромодановасто. Вакссон озадо аштесть мирдть-нить Донковтне, конатне састь ваномо цёрынест лангс, конась якси Культурань кудонь киштемань секцияв ды невтсь сценанть лангсто брейк-данс.

Сыця субутасто концерттнэ поладовить ды Республикань Раськень творчествань кудось таго учи ваныцят. Минь арсетяно молемс ваномо Чаунза буенть, эдь тосо улить «Эрзянь правданть» ламо ялганзо, секскак учодо сыця номерэнть, косо весементь ёвтнесынек ды невтьсынек Эдуард Ретунскиень фотографиятнесэ.

Валентина Дыдыкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».