Суббота, июля 13, 2024
Важное

Комськолмовоцеде теплоходось уевтинзе Рав лейга «Равось – ояксчинь лей. Равчирень раськетнень вейсэнь кортамот» этнокультурной экспедициянь-фестивалень участниктнень. Те паро коесь кеместэ совась минек эрямос, неть иетнень перть этноэкспедициясонть важодсть 2500 ламо ломанть аволь ансяк Мордовиясто, лия регионтнэстэяк. 

 

Те иень экспедициясь ушодовсь Саратовасто июнень 19-це чистэ ды прядовсь тоско жо июнень 24-це чистэ. Сонзэ ютавтомс субсидиятне явозельть Мордовиянь Культурань, раськень политикань ды архивень тевень министерстванть пельде региононь Прявтонть Артём Здуновонь лезксэнзэ вельде. Ютавтыцязо – Равчирень финнэнь-угрань раськетнень культуратнень куншкакурось.  Этноэкспедициянть прявтокс ладязель Минкультнацонь министранть Светлана Баулинань васенце полавтыцясь  Александр Карьгин, администраторокс – ПЦФУН-сто Валентина Дыдыкина. Те проектэсь эрьва иестэ ютавтови сень кисэ, штобу кемекстамс вейсэнь кортамотнень культуратнень, кельтнень, койтнень-кирдатнень ванстомань ды виевгавтомань, Россиянь ламонациянь раськетнень вейсладямотнень коряс.

«Федор Достоевский» теплоходсонть тедедень маршрутось ютась Саратов – Волгоград – Астрахань – Никольское оштнень вакска. Фестивальсэнть важодсть зярыя регионтнэстэ наукань ды образованиянь, культурань ды спортонь роботникть, тиринь келень тонавтыцят, СМИ-нь сотрудникть,
НКО-нь представительть. Мордовиядо башка, Татарстансто, Чувашиясто, Башкортостансто, Московсто, Ульяновской, Пензань, Самарань, Саратовань областтнестэ. Фестивалень программасонть ульнесть проектэнь презентацият, семинарт, дискуссият, экскурсият, концертт. РФ-нь духовно-нравственной ды культурной сюпавчитнень лангс ванозь ды нежедезь, участниктне кортасть тиринь кельтнень, культуратнень, лия ёнов а молиця койтнень-кирдатнень ванстомадо, национальной каштанчинть кастомадо.

Теевсь коекс экспедициянть ушодомадо икеле баславамс весе участниктнень. Тедеде тень теизе Саранскоень ды Мордовиянь митрополитэсь Зиновий, конась казсь фестиваленть лемс Казанень Богородицань пазава (сон карми весе фестивальтнень ванстыцякс), а вана теплоходонь капитанонтень – Ине праведной Феодор Ушаковонь пазаванзо.

Васенце чись. Эзь марявояк, кода автобусось ускимизь Саранскойстэ Саратовань Рав леень причалов. Мордовиясто делегациянть вастызь тосонь прявттнэ, «Шумбрат» национально-культурной автономиянь представительтне, Оркина ды Советское велетнестэ эрзятне ды мокшотне. Вейсэнь концерттэнть ды паронь арсематнеде мейле «Федор Достоевский» теплоходось макссь гудок туемадо. Уцяскав ки теть, «Равось – ояксчинь лей»! – марявсь эрьва ёндо.

Сеске мертяно, те экспедициясонть овсе арасель шка оймсемс, важодемась ушодовсь сеске теплоходонтень совазь: васняяк торжественна панжозель экспедициясь, мейле кортась экспедициянь прявтось Александр Карьгин, конась нурькинестэ ёвтнесь мероприятиянь программадонть ды сехте мелявтовтыця кевкстематнеде, конатне кепедезельть этноэкспедициясонть. Видеопоздоровт Московонь
ВДНХ-сто кучсь Мордовиянь культурань, раськень политикань ды архивень тевень министрась Светлана Баулина. «Противодействие идеологии терроризма и экстремизма» ёнксонть коряс докладонзо ловнызе Н. П. Огарёв лемсэ МГУ-нь социологиянь ды социальной роботань кафедрань профессорось Татьяна Дадаева.

«Родной язык в этнокультурном пространстве: образование, культура, коммуникации» ёнксонть спикерэкс кармась МГУ-нь филологиянь факультетэнь деканонь полавтыцясь Надежда Кабаева.

«Консолидация и единение мордовского народа в условиях современных вызовов» теманть коряс кортась эрзянь ды мокшонь раськень МРОО-нь исполкомонь прявтось Татьяна Ларина. «КультураZаПобеду» проектэнтень презентация тейсть Краснослободской райононь Куликовка велень клубонь прявтось Марина Негоднова ды Рузаевкань райононь А. Ухтомский лемсэ Культурань центрань прявтось Елена Биккулова. Сынь ёвтнесть, кода кодыть СВО-в сетть, паракордт, оршамопельть ды ламо лия мезе. Сюкпрянь валт тень кисэ ёвтасть спецоперациянь участниктне Юрий Полобичев ды Александр Владимиров, конатне истя жо ульнесть экспедициясонть. Сынст ушодксост коряс экспедициянть перть #КультураZаПобеду акциянть лувсо весень вийсэ кодазельть колмо алтымат. Эсь выставканзо невтизе чувтосто керсицясь, Вирь Тавлань мастерэсь Василий Ширманкин.

«Кортатано эрзякс/корхтатама мокшекс». Истя лемдевсь келень тонавтомань интенсивесь, конань ветясть «Эрзянь правда» газетань прявт редакторось Марина Девятова ды Саранск ошонь «Высота» 15 № Образованиянь центрань мокшонь келень тонавтыцясь Марина Миронова.

Васенце чись прядовсь кенярксчинь концертсэ, конань невтизь Мордовиянь артисттнэ ды этноэкспедициянь участниктне: Артём Мамаев, Василий Родионов, Любовь Князькова, Елена Биккулова, Ольга Колемасова.

Омбоце чись. Эрьва чинть ушодтано зарядкасто спидвеень коряс Мирэнь Чемпиононть Максим Захаров марто,  кемекстатано шумбрачинек ине Равонь свежа коштсо ды физкультурасо. Мейле эйсэнек вастсь Волгоградось, тосонь НКО-нь представительтне ды артисттнэ.

Обедтэ мейле – ризнэвтицядо ды талновтыцядо кортамот: «Защита, сохранение и укрепление традиционных духовных ценностей» теманть коряс. Ветицясь – М.Е. Евсевьев лемсэ МГПУ-нь профессорось, исторической наукань докторось Тимофей Надькин, конась ёвтнесь тетядонзо, профессордонть, тиринь кельде мелявтыцядонть, эрзянь ды мокшонь васенце съездэнть ушодыцядонть Дмитрий Тимофеевич Надькиндэ. Вал сайнесь Георгий батюшкась, конась кортась седе, кодамо семиясо кастовить минек эйкакштне, ули-арась тосо тиринь масторонтень вечкемась, Пазонтень кемемась.

Вейсэнь кортамотне поладовсть «У террористов нет национальности и веры» мелявтовтыця теманть коряс. Площадканть ветицясь – Н. П. Огарёв лемсэ МГУ-нь Юридической институтонь директоронь полавтыцясь, юридической наукань кандидатось Александр Чебуренков. Спецоперациясонть участиядо ёвтнесь Юрий Полобичев.

Чокшне ёнов эседест ды тиринь кельтнень, культуранть ды койтнень-кирдатнень ванстомань ёнкссонть паро тевдест ёвтнесть Российской Федерациянь субъекттнэстэ этноэкспедициянь участниктне: Ульяновскойстэ – Владимир Софонов, Башкортостансто – Юлия Александрова, Татарстансто – Раиса Иванова, Чувашиясто – Татьяна Юстус, Самарасто – Мария Потякина, Саратовасто – Валентина Кривошеева, Нижней Новгородонь Лукояновасто – Вадим Александров ды Пензасто – Александр Борисов. Седе тов ютась Мордовиянь заслуженной артистканть, «Келу» ансамблянь морыцянть Любовь Князьковань концертэзэ.

Колмоце чись. Чемпиононть марто зарядкадонть мейле сеске кортамот эрзянь-рузонь ды мокшонь-рузонь электронной параллельной корпустонть, сонзэ анокстамонь историядонть. Теде ёвтнесь Н. П. Огарёв лемсэ МГУ-нь филологиянь факультетэнь деканонь полавтыцясь Надежда Кабаева.

Кортамотнеде икеле Надежда Фёдоровна кучсь вейсэнь телеграм-каналс эрзянь ды рузонь кельс электронной ютавтыцянть, конанть вельде те тевесь тееви сеске. Университетсэ истя жо улить тиринь келень онлайн-курсат, студенттнэ ветить соцсеттнесэ эрзянь ды мокшонь кельтнесэ группат. Тешкстама, электронной корпусось панжозель Мордовиянь Прявтонть Артём Здуновонь лездамонзо вельде.

Пачкодинек Астраханев, косо эйсэнек мельстуиця киштемасо вастсь «Астраханская песня» фольклорной ансамблясь. Неинек, кода кишти «осетр-калось». Участниктне ваннызь Кремлянть ды ошонть мазычинзэ. Якинек инжекс Астраханень раськень культурань научно-методической центрав экскурсияв. Вастовинек Астраханень областень культурань министрань полавтыцянть Людмила Губина марто.

Седе тов мелявтовтыцядо кортамот «Сто лет гражданской идентичности» теманть коряс. Сонзэ ветицясь – Н. П. Огарёв лемсэ
МГУ-нь социологиянь ды социальной роботань кафедрань профессорось Татьяна Дадаева. Велявтынек теплоходов ды понгинек сеске семинарс, конань ветясь  Межэтнической журналистикань гильдиянь прявтось Маргарита Лянге. Маргарита Арвитовна кадовсь Артём Мамаевень концертскак ды эзть кирдеве, лиснесь киштеме.

Нилеце чись. Ледстнемань  ды Ризксэнь чистэ митинг ды чатьмонемань минута теплоходсонть, седе тов этноэкспедициянь участниктне пачкодсть Никольскоев Пресвятой Богородицань Рождествань храмов, косо о. Георгий служась молебен о здравии, чавовозь воинтнэнень ды тейсь весенень миропомазания. Мейле поладозельть патриотической ёнксонь коряс мероприятиятне. Кортамотне мольсть Михаил Девятаевде. Сондензэ ёвтнесть Наталья Бегаева, Торбеевасо кудонь-музеень прявтось, ды лётчикенть цёразо Александр. Мероприятиясь анокстазель «Разговоры о важном» акциянть лувсо «В жизни всегда есть место подвигу» теманть коряс.

Ветеце чись. Минь таго Волгоградсо Мамаевень кургансо  «Героям Сталинградской битвы»  историко-мемориальной комплекссэнть, косо путынек цецят Амадиця толонть ваксс весе чавовозь воинтнэнь лемс, седе мейле ошстонть-геройстэнть туемстэ сынст ледстнемга каинек цецят  Рав леень ведентень. Чокшне ёнов ёвтазельть этноэкспедициянь цётавкстнэ ды сон торжественна пекстазель сехте эряза участниктнень туртов Дипломтнень каземасо ды покш концертсэ, конанть анокстызь минек артисттнэ.

Котоце чись. Теплоходось пачкодсь Саратовав ды минек делегациясь кото часонь ютазь шумбрасто велявтсь Саранск ошов. Вастомазонок, «Рав – ояксчинь лей»! Вастомазонок, од ялгат-оят!

Этноэкспедициясонть весе читнень перть важодсь минек прявт редакторось Марина Девятова.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».