Вторник, марта 19, 2024
Важное

Те иесь «Эрзянь правданть» туртов кармась пек кенярксов, минь тешкстатано газетанть сядо иетнень – цела пинге! Мельспаросо аштетяно сень кувалма, ламо иетнень лангс апак вано, тиринь кельсэ нолдавиця «Эрзянь правда» ды «Мокшень правда» газетатне лиснить, сынь эрявикст, вечкевикст, ловновикст. Покш сюкпря тень кисэ ловныцятненень!



1921 иень таштамковонь 24-це чистэ Московсо лиссь «Якстере теште» эрзянь кельсэ васенце газетась. Те чистэнть саезь ушодовияк минек историянок. Сядо иетнень перть «Эрзянь правдась» моли вейсэ «Мокшень правданть» марто, эрить алкуксонь ялгаксчисэ ды вейке-вейкенень лездазь.

Весе историянок кеместэ сюлмавозь Мордовия Республиканть чачоманзо ды касоманзо-кемекстамонзо марто. Минек газетатне невтсть рузтнэнь, эрзятнень ды мокшотнень, республикань лия раськетнень социально-экономической, политической ды культурной эрямонть, сынст мелест-арсемаст ды минек масторонть лия раськетнень марто вейсэнь сюлмотнень. «Эрзянь правдась» ды «Мокшень правдась» топавтсть пек эрявикс тев эрзянь ды мокшонь кельтнень грамматикатнень юрост анокстамосо, сынст вельде анокстазельть васенце тонавтома книгат раськень школатнесэ тонавтницятнень туртов. А ёвтавикс лезэ сынь макссть эрзя-мокшонь литературанть ды искусстванть виевгавтомасо. Эрзянь ды мокшонь пек ламо сёрмадыцят, поэтт, журналистт ушодызь эсест шкинемаст неть газетатнень лопатнестэ.

Полавтовсь эрямось, полавтовсть вешематне, полавтовсь минек газетаськак. Ялатеке ванстовсть сонзэ прявт тевензэ – ловныцятнень мельваномась, вечкемась, тиринь келенть, койтнень-кирдатнень, культуранть ванстомась ды тиринь раськентень вечкемань кастомась-кемекстамось. Башка тарка журналисттнэ явить раськетнень ютксо ояксчинтень, Мордовиясо ды регионтнэсэ эриця эрзятнень ютксо сюлмотнень кемекстамонтень.

Сёрмадовкссонок улить сялдомань ёнксткак, ансяк мезесь зярдояк а ули – те «ожо прессань» тешкстнэ, «рестазь кулятнень» мельга пансемась, ды те ёнксонть минь бажатано кирдеме седе товгак.
Газетань 100 иетнень тешкстамонть каршо ули мелем тенк ёвтнемс меельце иетнень тевденек ды аламодо токамс мелявксонок.
Неень шкане «Эрзянь правдась» нолдави недлязонзо весть, середасто. Тиражозо 2000 экземплярт. Минек кенярдовты, те юбилеень иестэнть кавто сядос кассть сёрмадстыцянок, малав сядо ловныцят ней улить масторонь лия регионтнэсэ. Минь мольтяно эрямонть марто ве киява. Покш важодема ветяви газетанть Интернетс ды социальной сеттнес кеместэ совавтоманть коряс. «Эрзянь правданть» ули эсензэ сайтэзэ: erziapr.ru, «Одноклассники», «Фейсбук», «Инстаграм», «ВКонтакте» социальной сеттнесэ вейсэндявксонзо ды кавто иес пурнась малав 8 тёжат сёрмадстыцят.

Кой-кить кортыть, келя, Интернетсэ газетатнень вейсэндявкстнэнь панжомась вети конёвонь газетань сёрмадстыцятнень аламолгадомантень. Мезе парось, тень эзинек редя, мекевлангт, содамонок кармасть седе ламо ломанть ды тенек кармасть кемеме седеяк пек. Газетась касы-кемексты кавто ёнга: коень-кирдань коряс, конёв лангсо, эдь минек ловныцятнестэ ламотне велень сыре ломанть, конатне аволь весе маштыть совсеме Интернетс. Теке марто кемекстатано од ломантнень туртов кулятнень пачтямонть Интернетэнть вельде. Бути варштамс тосонь статистикань невтевкстнэнь, сёрмадстыцянок 25-55 иесэ ломанть. Эйсэнек ловныть аволь ансяк Россиясо, омбо мастортнэсэяк: Казахстансо, Белоруссиясо, США-со, Германиясо, Украинасо, Англиясо, Канадасо. «Одноклассники» соцсетьсэнть, невтемакс, сехте кувака ды якшамо телень ковтнестэ, зярдо эрицятне аштить кудосо, ванкшноматне ковозонзо касыть 45 тёжас. Тедедень тундосто саезь «Эрзянь правданть» 2019 ды 2020 иетнень электронной копиятне улить А.С. Пушкин лемсэ Национальной библиотекасо – минь сёрмадстынек библиотеканть марто эрявикс соглашения.

Редакциянь коллективесь пштистэ важоди газетань тематнень, дизайнонть, тиражонь покшолгавтоманть коряс. Мелят полавтынек типографиянть, ды ней газетась кенярдовты ловныцянзо мазычисэнзэ. Теяк покш тевесь, эдь, кода кортыть, васняяк вастыть оршамопелень коряс. Газетась анокстави InDesign программанть вельде. 2019 иестэ полавтынек сайтэнть: сонзэ логотипенть, дизайнонть, совавтынек од рубрикат, тень кувалма кассть контентэнтень совсицятне. Ансяк сонзэ теинек покш ярмаконь апак ютавто ды сон а пек ловновикс мобильной телефонтнэсэ, секскак мельсэнек-арсемасонок одкстомтомс сонзэ неень шкань технологиятнень тевс нолдазь.

Меельце шкатнестэ газетасонок панжозь од рубрикат: «Эрзянь мазыйка», «Минек од ломантне», «Кезэрень эрзятнень эрямосто», «Тиринь газетанть эрямосто», «Кулят томбалень эрзятнень пельде», «Эрзянь правдась» – эйкакштненень», «Эх, од пора, од пора!», «Литературась ды эрямось»... Ули меленек нолдамс эрьва кодамо темань коряс эрзянь валкскеть, панжомс вейсэнь эрзянь келень урокт М.Е. Евсевьев лемсэ МГПУ-нь студенттнэнь-филологтнень марто. Тешкстама, тедеде редакциянь представителесь кармась «Россия – страна возможностей» Президентэнь платформанть юрсо ютавтовиця «Моя страна – моя Россия» проектэнь экспертэкс «Монь тиринь келем» ды «Монь каштанчим. Монь вишка мастором» номинациятнень коряс ды казезель сертификатсо.

Газетасонтькак, социальной сеттнесэяк минь ютавтнетяно эрьва кодат пелькстамот, эйкакштнень ютксо артовксонь ды фотоконкурст. Аволь умок яволявтынек «Невтинк ёрокчинк!» покш кенярксчинь конкурс, конась алтазь минек газетань 100 иетненень. Течинь
чис кучозь 20 ламо фотографият, артовкст, нурька морынеть, ёвтнемат, стихотвореният, морот… Сынст темаст сюлмавозь юбилеенть марто. Таштамковонть прядовомсто яволявтовить изницятне, конатненень минек редакциясь ды спонсортнэ анокстыть паро казнеть. Арсетяно ютавтомс покш вастовома.

Газетась аволь ансяк яволявтни пелькстамот, сон эрси лия ёндонь конкурсонь информационной партнёрокс, сынсь журналисттнэяк мельспаросо невтить пряст шкинемань (творческой) пелькстамотнесэ. Мелят «Эрзянь правдась» кармась «Вместе мы можем больше» инвалидтнэнь художественной творчествань инклюзивной фестивалень медиа-партнёрокс вейсэ МР-нь Культурань, раськень политикань ды архивень тевень министерстванть, РДНТ-нть ды «Всероссийское общество инвалидов» МРО-нть марто. Ламо иеть паро сюлмот кирдевить «Надежда» приютонть марто, конантень истя жо макстано информационной лезкс. Иестэ-иес газетась эрси Н.П. Огарёв лемсэ НИ МГУ-нь конкурстнэнь медиа-партнёрокс. Тедеде яволявтозь Келень иенть лувсо топавтынек вейсэнь проект Татарстанонь «Ватаным Татарстан» ды «Республика Татарстан» газетатнень марто.
Редакциянь коллективесь ды башка журналисттнэ а весть лиснесть изницякс Мордовиянь Прявтонь, Правительствань, Госсобраниянь пелькстамотнесэ: «Интонация», «Экономика», «Человек труда» ды «Малое и среднее предпринимательство». Ламо иень перть изнякшнотано МР-нь МВД-нь творческой пелькстамосонть. Мелят журналистэнек Валентина Юдина кармась «Семейная реликвия» Национальной премиянь лауреатокс «Семейные и духовные ценности в СМИ» номинациясонть. Кирдтяно вейсэнь сюлмот Межэтнической журналистикань гильдиянть марто. Журналисттнэ свалшкань участникть «Равось – ояксчинь лей» фестивальсэнть, Россиянь национальной ды региональной СМИ-тнень, финнэнь-угрань раськетнень форумтнесэ, «Шумбрат!» раськень фольклорной кенярксчисэнть, а весть кочказельть Эрзянь ды мокшонь раськень Инекужонь делегатокс.

Минь а стувтнетяно газетань ветерантнэдеяк. Кезовонть самс редакциясонть эрьва иестэ ютавтневсть вастовомат содавикс журналисттнэнь, икелень сотрудниктнень марто, кода Т.М. Ковалёва, Н.И. Ишуткин, П.А. Ключагин, Т.С. Баргова, Т.Д. Рябова… Газетань 100 иетненень ули меленек тердемс инжекс аволь ансяк ветерантнэнь, истя жо университетэнь студенттнэнь-журналисттнэнь, невтемс тенст выставканок ды фотовыставканок, конась пурназь 100 иень кенярксчинтень.

Арсетяно, республикасонть арась вейкеяк таркине, козонь сядо иетнес а пачкодевельть минек корреспонденттнэ. Неть иетнень перть анокстазь зярыя тёжат очеркть, ёвтнемат, мизолкст, велесэ важодицятнеде, тонавтыцятнеде, артыцятнеде, дока ломантнеде сёрмадовкст… Тешкстама, минек сехте умонь ловныцянок сёрмадстнить газетанть 70 ламо иеть, сёрмадовксонок геройтне ванстыть эсь прядост статьятнень 60 иень перть. Тень кувалма минь аштетяно покш каштанчисэ.

«Эрзянь правдась» а сови Россиянь каталогс, сон пачтяви Почтанть вельде ансяк Мордовиянть келес, ялатеке регионтнэва минь пачтятано эйсэнзэ, эсенек вийсэ, Эрзянь ды мокшонь раськень исполкомонть, Финнэнь-угрань раськетнень культурань Равчирень центранть лездамост вельде. Тень кувалма ёвтавлинек сюкпря Культурань, национальной политикань ды архивень тевень министрань тевтнень топавтыцянтень С.Н. Баулинанень, сонзэ полавтыцянтень А.И. Карьгиннэнь ды лиятненень. Ламо иеть мартонок кирдить сюлмот Н.П. Огарёв лемсэ НИ МГУ-сь (сюкпря ректоронтень С.М. Вдовиннэнь), М.Е. Евсевьев лемсэ МГПУ-сь (М.В. Антонова, О.И. Налдеева), Мордовиянь Профсоюзонь федерациясь (С.В. Борисов), А.С. Пушкин лемсэ Национальной библиотекась ды ламот лият.

Эштё тешкставлинек регионтнэстэ ялганок: Московсто – Мокшонь ды эрзянь землячестванть (сюкпрянь валт Л.В. Круглованень ды В.И. Каяцкаянень), Пенза ёнкссто – Н.А. Пинясовонь, С.М. Деминэнь, Олег Вдовинэнь, Нижней Новгородонь ёнкссто – М.К. Голодовань, Санкт-Петербург ошсто – Марина Романовскаянь…

Минь топавттано вейсэнь тевть муниципальной районтнэнь, велень поселениятнень прявттнэнь, министерстватнень, ведомстватнень, промышленной предприятиятнень ды велень хозяйствань прявттнэнь марто: сёрмадтано республиканть политической, экономической, культурной тевтнеде, теке марто касттано газетанть виензэ-сталмонзо ды тиражонзо. Ансяк сеедьстэ эрси истяяк: кой-кона прявттнэ а мельсэ вастыть вешеманок сёрмадстомс газета, тень толковить ярмаконь арасьчисэнть, келенть асодамосо… Истямо лувось пек тандавты, седеяк пек Весероссиянь эрицятнень сёрмадстомадонть икеле.
Сёрмадстомась национальной газетатнень туртов свал покш мелявкс, прянь сэредема, иеде-иес сон стакалгады. Мекс? Тувталтнэнь тынськак содасынк: келенть мельде-валдо тонавтнемась, Интернетэськак тенень лездась… Тешкстасынь эштё кой-конатнень: велетнева арасть почтань отделеният, эрицятненень газетатне сакшныть ковозонзо весть пенсия марто ды минь ёмавттано ловныцянок. Иень перть минек журналисттнэ ардтнить командировкава, сёрмадыть статьят, ветить лопат социальной сеттнесэ, лиснить эфирс, теке блогерт, теевсть газетань миемань менеджерэкс…

Эштё вейкеде тешкстама: сядо иетнень перть «Эрзянь правда» ды «Мокшень правда» газетатне теевсть эрзянь ды мокшонь раськетнень покштояк покш питнейчикс, пароль бу максомс тенст «национальной достояниянь» статусонть ды теньсэ седеяк кастомс сынст покш лемест!
Минь свал кирдтяно мельсэнек, раськень кельсэ нолдавиця СМИ-тнень икеле ашти ине тев – ванстомс покштятнень-бабатнень кельтнень, культуранть, койтнень-кирдатнень. Минь тень топавттано весе вийсэнек ды оймесэнек. Кода мерсь вейке превей ломанесь: «Келесь аволь ансяк эрявикс кортамонь туртов, келесь – раськенть оймезэ, сонзэ обуцянзо, явовиксчинзэ невтема, раськень культурань башка генофонд. Кулы келесь – ёми раськеськак». Тенень а мезе поладомс. Миненек эряви свал мельсэ кирдемс те превей арсеманть. Тиринь кельсэ нолдавиця газетатне жо самай истямо усият, косо эрзянь ды мокшонь кельтне эрить, ванстовить ды касыть-кемекстыть сыця шкань поколениятнень туртов.

Меельцекс тешкставлия, «Эрзянь правдась» ды «Мокшень правдась» – неть лия ёнов а молиця изданият, сынь вейкинеть, истят арасть косояк масторлангсонть, минь сядо иес теевинек эрзянь ды мокшонь раськетнень историянь пельксэкс, минь минсь сёрмадтано сонзэ историянзо, минь – питнейдеяк питней сюпавчи раськенек туртов!

Прявт редакторось
Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».