Вторник, марта 19, 2024
Важное

Санавиациянь вертолётсо – сэредицятнень эрямонь идеме




Мордовиянь, седе пек Саранскоень эрицятне, сеедьстэ редить, кода менельганть, кудост велькска секе тев ливтни ожо-якстере тюсонь вертолет. А весе содыть, те санитарной авиациянь национальной службань «нармунесь», конась капши стакасто сэредицятнень туртов ды куроксто ильти эйсэст Мордовиянь республикань клинической больницяв. Тозонь уш кавто иеть пачтявить республикань районтнэстэ сеть сэредицятне, конатненень эряви эрязасто теемс стака операция эли максомс врачонь лия лезкс, кода мерить, «сырнень часонь перть». Вертолеттнэнь туртов больницянть вакссо панжозель башка площадка, районтнэсэ жо ладязельть истят таркат, козонь бу сыця вертолетось валговоль стакачивтеме. Весе неть тевтне теезельть ды нейгак топавтовить «Здравоохранение» нацпроектэнть ды «Развитие системы оказания первичной медико-санитарной помощи» федеральной проектэнть лувсо.

Неень шкане вертолеттнэнь операторось – Санитарной авиациянь национальной службась. Сон панжозель вете иеде теде икеле ды лавтов лангсонзо ней Ми-8 АМТ 4 вертолетт, Ми-8 МТВ-1 17 вертолетт ды «Ансат» 24 вертолетт. Мордовиясо медицинань эрязасто лезксэнь максыця врачтненень лезды «Ансат» вертолетось, конась ашти Саранскоень аэропортсо. «Ашти», те валось тензэ, нама, а лади. Ризксэнтень, сон, эрявикс малав эрьва чистэ. Вертолетонть ветицятне Саранск ошов сакшныть Московсто эли Казаньстэ.

Зярыя чиде теде икеле минь вастовинек вертолетчикенть Андрей Сергеевич Суняйкин марто, конась кучозель Московсто командировкав колмо недляс ды топавтсь заданиянзо июлень 5-це чис. Андрей Сергеевич «Эрзянь правдань» умонь ловныцятненень содавикс, минь уш сермалинек сондензэ эсь лопатнесэ. Отяжелень райононь Сабанцеле эрзянь велень церась свал учось те шканть, зярдо тензэ сави ливтнемс тиринь енксонь менельганть, варштамс верде вечкевикс Сабанцеленть ды тетянь-авань кудонть лангс. Эште эйкакшпорасто сон макссь вал физкультурань уроконь тонавтыцянтень Ефим Ефимович Палькиннэнь, келя, касы ды шумбракстни мартонзо верде вертолетонь сёлмотнесэ. Секскак, зярдо тензэ сась яволявтома сыргамс командировкав Мордовияв, пек кенярдозевсь.

Суняйкин вертолетчикесь умонь, ламо содамочи марто.
1991 иестэ Саратовань лётчикень высшей военной авиациянь училищанть прядомадо мейле сон служась армиясо, 2001 иес роботась Кубинка аэродромсо авиациянь вейсэндязь полксо, кассь капитанокс, 36-ксть кирнявтнесь парашютсо. Кемень иеть военной вертолёттнэсэ эрзянь цёрась усксесь эрьва кодат сталмот, вастсь покш инжеть, ламоксть савкшнось ёртнемс парашют марто десантникть, ливтнесь зярыяксть командировкав Кавказонь томбалев ды омбо масторов. Вертолётчиктнень роботаст пек стака, ды секскак пенсияв эйсэст ильтить эште одсто. Суняйкиннэньгак ульнесть 30 иеде цють седе ламо, зярдо сон тусь военной службастонть ды сась гражданкас. Роботась частной компаниясо, ливтневтсь туристт, содавикс ломанть, натой, весть фильмасояк снимавтсь, эсензэ, вертолетчикень роленть. Мейле, медкомиссиянь ютазь, велявтсь служамо Московонь ГУВД-с, седе тов МЧС-нть марто ливтнесь-ванкшнось вирень паломат… Ды свал тонавтнесь. Эдь эрьва «кшнинь нармуненть» ветямс эрявить ютамс башка курсат. Маныть «Хелидрайв» компаниясь кучизе Андреень тонавтнеме «Ансат» санавиациянь вертолетсо. Сестэ ушодовськак сонзэ од историязо – ней эрзянь церась лезды врачтненень эрязасто пачтямс стакасто сэредицятнень, инфаркт ды инсульт диагнозтнэнь мартотнень, пожарсто идезетнень, ДТП-с понгозетнень больницяв эли, мекевлангт, ускомс врачтнень видьстэ сэредицятнень ваксс, конатненень лия транспортсо а пачкодят. Савсь тензэ ливтнемс Санкт-Петербургов, Воронежев, Екатеринбургов, Ине Новгородов…

«Весть кучокшнымизь, натой, Дятловонь перевалонтень. Те таркась нейгак «чаравты» туристтнэнь превест ды секскак группатне сеедьстэ понгонить тамашань тевс. Се ливтямостонть сась яволявтома: вейке туристэнтень теевсь берянь, арсесть инсульт, ансяк врачтне сестэ путсть лия диагноз: ковид. Весть ливтнинек вирев, тосо томбавкшнось квадроцикласо ардтниця. Эрявсь куроксто муемс маласо кужо ды снартнемс валгомс чувттнэнь апак тока. Тевенть топавтынек. Кизна савсь идемс ламо эйкакшт, конатне эли пракшность вальмасто, эли пицевкшнесть», – ёвтни вертолетчикесь эсь роботадонть ды тешксты, ваномс весе неть тамашатнень лангс пек стака, ансяк мельсэст вейке: сатоволь бу шкаст лездамс!

Тиринь ёнксось тердсь

Аволь умок сынст вертолетчикень группась ютась НССА-с, конасонть Суняйкин топавты некеть вешематнень. Мордовиясо Суняйкиннэнь 20 чис савсь ливтнемс Торбеевав, Комсомольскоев, Ардатовав ды аволь весть. Зярдо сы яволявтома ливтямодо, врачонь бригадантень ды вертолетчиктненень кизна максовить ансяк 40 минутат пачкодемс аэропортов. Саранскоесь – ошось аволь покш, тесэ те лувось топавтови седе куроксто. Вертолетось ливти 270 вайгельбеть часозонзо, секскак, невтемакс, Торбеевав ды Орданьбуев сон ливти 30 минутат, Комсомольскоев 15-шка. Чарькодтядо, кодашка лезкс теньсэ, эдь, кода кортыть врачтне, бути ломаненть марто мезеяк тееви берянь, сынст ули пек аламо шкаст витемс тень, штобу сэредьксэсь а кандоволь покш зыян шумбрачинтень. Ледстнетядо, аволь умок Ардатовасо мотоцикласо ардомсто пек томбавкшнось 17 иесэ Отяжелень церыне, пек берянель ёжозо. Самай Суняйкинэнь экипажось ильтизе сонзэ Саранскоень республиканской клинической больницяв ды нейгак, командировкасто велявтозь, сынь секе тев кевкстнить врачтнень ёжодонзо.

«Санавиациянь вертолеттнэсэ свал кавоненек: кавто командирт. Ве чистэнть сон прявтокс, омбоцестэнть мон. Кавто напарникень ульнесть: Казаньстэ ды Смоленскойстэ, ды, тешкстама, сыненст пек вечкевсь Саранскоесь, – ёвтни Суняйкин. – Келя, истямо вишкине, ялатеке ванькс, весемесь тесэ ули: музейть, ресторант, кинотеатрат… Мон, нама, тескень ломанесь, сеедьстэ сакшнан тиринь енксов, истя пек весе а редяви, а сынь сеске тешкстызь вадрянть. Вечкевсь тенек ливтямонь зонаськак – шожда, пандт-мезть арасть, пертьпельксэсь ваньксэль. Мон яла пеедькшнинь: те истя васты эйсэнь чачома ёнксось. Алкукскак, тиринь ёнкссо менелеськак лия: седе ванькс ды сэняжа».
Андрей Сергеевич арси, те аволь вейкине командировка тиринь енксов ды, паряк, маласо шкастонть сонзэ таго сиведьсызь лезксэнь максомо чачома таркав.

…Мордовиясо командировкасо улемстэ Суняйкинэнь топавтовсь эйкакшпорань мелезэ. Вейке маршрутось ютась Отяжелень районганть. Сон ливтясь тиринь велензэ, кудонзо, содавикс виртнень ды лейтнень велькска, ды кучсь «шумбрат!» тонавтницянзо туртов телефононь пачк. Ефим Ефимович те шкане ледсь тикше ды абунгадозь эште куватьс ахолясь тензэ триммерсэ. А велень эйкакшкетне, алга ливтиця вертолетонть неезь, мирём бажасть сасамс сонзэ велосипедсэ…
Вертолетось «Ансат», конасонть ливтнесь Суняйкин, теезь Казаньсэ. Татаронь кельстэ ютавтови, кода «простой». Теке марто сон аволь пек шождатнестэ ды вишкинетнестэ, кувалмозо 3,5 метрат, улить седе вишкинетькак, конатнесэ ливтневтить туристт. Санавиациянь вертолеттнэсэ ули весемесь ломантнень эрямост идемга: тевелявтнень искусственной винтиляциянь аппарат, кардиомонитор-дефибрилятор, инфузомат, кювез ансяк чачозь эйкакштнень кирдемс, копорень щит, весе эрявикс лекарственной препараттнэ. Бортось вийсэнзэ саемс 7 пассажирт. Вертолетось валгови кизнаяк-тельняяк куш-кодамо килангс, келей вирень кужинес, ошонь ульцяс. Ливтни сон модадонть 200-300 метрадо верьга.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».