Вторник, марта 19, 2024
Важное

Мордовиява командировкава ардтнемстэ неинек ламо велеть. Ансяк аволь весе сынь молить ве ёнов. Сынь теке штатолт: веенстнэ ансяк липнить-ченярдыть, омбонстнэ а максыть пряст ёмамс – гувнозь гувныть. Меельцетне (сынст юткс аравтовлинек Орданьбуень Куцян велентькак) пек уцяскавт: прявтсост кеме ды виев азорт. Истят, кода Куцян велень поселениянь прявтось Виктор Павлович Дугушкин.
Минь уш а весть сёрмалинек те эрзянь ёнкстонть ды, таго тов сазь, нетяно од, паро полавтомат, икелев ветиця мельть-арсемат. Виктор Павлович свал вешнемасо, корты, бути государствась максы ярмакт велень мелявкстнэнь витемс, сынст эрявить саемс. Путомс весе виенть эрявикс документтнэнь пурнамга ды топавтомс тевенть педе-пев.

Истя, мелят «Безопасные и качественные автомобильные дороги» национальной проектэнть лувсо теезель 4 вайгельбеть од киланго. Асфальтось ацазель велентень велявтома покш кистэнть саезь – куншкакуронть видьс. Ульцятнева стявтозельть парсте валдомтыця од палманть. Тедеде анокстыть вельтямс щебенкасо Куцян велень Молодёжной куронть. Тосо эрить ламо од семият, ки жо арась. Теке мелявксось Мурза (Кельвядни) велень Молодежной куросонтькак, конась сови Куцян велень поселениянтень. Эштё вейке ёнксось, конань кис ризны прявтонть седеезэ, те – калмоланготнень ванськавтомась ды келейгавтомась. Мезеяк а теят, истямо эрямось ды кулозь покштятнень-бабатнень меельце таркинест ваньксстэ кирдемась свал лововсь эрзятнень ютксо прявт тевекс. Те паро тевенть арсеви топавтомс самообложениянь од лувонть вельде. Кода содатадо, самообложениянть истямо смустезэ: эрицятнень путозь эрьва целковоентень государствась максы кавто целковойть. Бути те тевенть велень эрицятне кемекстасызь, пурназь ярмактнень лангс теить ки калмолангонть видьс. Мурзасо ды Андреевкасо самообложениянть вельде арсить келейгавтомс калмолангонть алов тарканть.

А стувтнить Куцян велень эрицятне Ине Отечественной войнасо чавовозь солдаттнэде ды сеть воинтнэде, конатне велявтсть тюремань паксятнестэ. Маень 9-це чинтень Виктор Павлович арси стявтомс веленть куншкас, Ине Изнямонь кеврунгонть ваксс, ледстнемань кевень лаз, козонь сёрмадсызь войнань весе участниктнень лемест. Ютазь иестэ эрицятнень ды лездыцятнень ярмак лангс витнезель-вадрялгавтозель войнасо чавовозтненень кеврунгось.
Кизна Троицясто велень азоронть мельсэ парсте тешкстамс Куцян велентень 430 иень топодеманть, тердемс-вейсэндямс весень, кить ловить те веленть тиринь ёнксокс, кить зярдо-бути тусть тестэ ды ялатеке а стувтнить эсь ундокстнэде. Тешкстама, Куцян велесь Орданьбуень районсо сехте покштнень ютксо. Тедедень ловоматнень коряс, тесэ эрить 859 ломанть. Кода уш ёвтынек, сонзэ юрс совить эштё Мурзась (Кельвядни) ды Андреевкась. Тесэнь эрицятне важодемань вечкицят, малав эрьва кудораськесь три-касты ракшат ды парсте содасы велесэ эрямонть танстензэ.

– Тесэнь эрицятне – аволь нузякс ломанть, пек ламо важодить, – ёвтни Виктор Дугушкин. – Эрьва кудонть саик, весень кардазост пешксеть ракшадо, пиресэст озавтозь эрьва кодат эмежть. Ды трить-кастыть аволь ансяк эсест туртов, миемскак. Тевсэть кизэнек-теленек.
Ды роботамо таркатнеде велесэнть аволь ламо. Секскак сонсь эрямось тонавтынзе важодемантень. Эдь нузякс ломаненть зепензэяк, кудопотмозояк чавот. Куцян велень ломантне истя эзть тонадо, истя а вечкить. Секскак тесэ панжозь ламо КФХ-т. Сынст прявтост А. В. Карпов, В.Н. Тюгашкин, А. Н. Нестеркин, А. Н. Орлов, В. И. Лычагин, Е. Н. Ботенков, Ю. А. Явкин... Неть ломантне тевсэяк докат, велентькак а кадныть, лездыть, кие мейсэ машты. Андрей Викторович Карпов фермерэсь жо аволь ансяк три-касты ракшат, видни сюро, ней сон ушодсь сывелень прякинень тейнеме-микшнеме. Весе теи эсензэ кедьсэ трязь сывельстэнть. Рамицятне, келя, шныть. Миньгак варчинек – тантейть!

– Важодеманть апак вечке велесэ кодаяк а эряват. Истя ульнесь свал, – тешксты Виктор Павлович. – Эштё паро, велесэнть минек улить од семият, од ломанть. Пек кенярдовты, улить эйкакшт – лисни, велесь эри. Весемезэ жо тедеде школав якицятнеде 23 тонавтницят. Эсенек велесэ школась основной, 9 классонь. 10-це ды 11-це классос эйкакштне якить шабра Низовкав. Школанок юрсо важоди эйдень кужо. Эйкакштнень туртов бажатано велентькак седе вадрялгавтомс-мазылгавтомс. Истя, 2019 иестэ «Комплексное развитие сельских территорий» государственной программанть лувсо эйкакштненень теинек налксемань площадка...

Куцян велесэ ванстовсь весе инфраструктурась: ули почта, библиотека, медпункт, велень клуб, райцентрасто сакшны «мобильной сбербанк», роботыть колмо лавкат. Шукшонть велеванть пурныть специальной машинат, прявтось арси маласо шкасто теемс шукшонь кирдемань площадкат. Эштё Виктор Павловичень покш мелезэ одкстомтомс велень медпунктонть ды Культурань кудонть, седеяк пароль бу строямс модульной ФАП ды культурань од куншкакуро. Таштось а уштови, секскак «Лейне» фольклоронь ансамблянть репетициятне тельня ютнить велень библиотекасо. Ялатеке те ёнкссонть ули эштё вейке тарка, конась ловови Куцян велень неень шкань каштанчикс – те «Вальма» кафесь ды паникудось. Сынь панжозельть кавто иеде теде икеле, ансяк весе вийсэ кармасть важодеме ансяк тедеде, зярдо седе олякстомтозельть коронавирусонть кувалма кардамотне. Кинь мельс сась топавтомс истямо теварсевксэнть, минь ёвтнесынек сыця номерсэ, зярс жо тешкстасынек: бизнесменэнть тевензэ тусть, велентень панжозельть сисем роботамо таркат, а эрицятне эрьва валске мельспаросо учить кшинь миема машинанть кудост икеле.

Кодамо эштё веле прянзо шнасы истямо дока ломаньсэ? Истятнэде пек аламо, ве кедьлапань суртнэсэ лововить. Тесэ кодаткак салавачить арасть. Тевесь, арсян, сеньсэ: Куцян велень ломантне – тиринь ёнксонь вечкицят, эйкакшпорасто саезь тетяст-аваст, покштяст-бабаст чапсть пряудемезэст виде мельть-превть. Иляк кадно тиринь велеть, тиринь модат! Тесэ виень таркась! Ды секскак, покш ошов важодеме туезьгак, азортнэ а кадносызь кудост ды ламот велявтнить мекев.

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».