Се чистэнть, зярдо минь вастовинек Екатерина Наумова марто, Саранскойсэ пизесь. Од тейтересь тердимим чайде симеме. Совинек кофейняс, ушодынек кортамонть. Валтнэ кода-бути сынсь ладясть, прок минь Катя марто ульнинек умонь ялгат. Тейтересь евтнесь эсензэ ланга.
Катянь чачома енксозо – Ицялбуень Пардэлесь. Тетязо-авазо – велень ломанть. Тетязо важоди велень хозяйствасо, авазо жо свал кудоютконь тевсэ. Катянь ули вишка сазорозо, сон тонавтни Береговые Сыреси рузонь велень школасо. Пардэлесэ школанть пекстызь уш ламо иеде икеле. Неень шкане велесэнть важодить администрация, почта, медпункт, библиотека ды Культурань кудо. Весе сынь аштить вейке таркасо. Тейтеренть валонзо коряс, велесэнть седе ламо эрицятнеде сыре ломанть. Одтнэ туить эрямо ошов. Вана сонськак Катя ней эри ды тонавтни ошсо. Тиринь велензэ кисэ тошнакали, ансяк ардтни чуросто, ковозонзо весть.
Неень шкане Катя – Н.П. Огарев лемсэ МГУ-нь историянь факультетэнь студентка. Тонавтни магистратурань омбоце курссо. Теде икеле прядызе филологиянь факультетэнь бакалавриатонть.
– Вишкинестэ уш монь пек покшоль мелем улемс филологиянь факультетэнь студентэкс, секс мекс свал вечкевсь тонавтыцянь тевесь. Школасо важодемась монь а талновты, мекевлангт – тенень ули бажамо. Историянть марто эрямом сюлмия а стяко, монень вечкеви сонзэ седе домкасто тонавтнемс. Кодамо тон тиринь масторонь вечкиця ломань, бути а содасак эсь раськенть историянзо, – корты тейтересь.
Катя, тонавтнемадо башка, уш а вейке ие вети репетиторствань урокт, кода онлайн вельде, истя кудосояк. Тейтеренть тонавтницянзо ютксо улить лия региононь эйкакшткак. Катя лезды грамматикань, математикань ды лия внеклассной проекттнэнь коряс содамочитнень виевгавтомасо.
Эште Катя сермады стихть. Шкинемась совась седейзэнзэ школасо тонавтнемстэ. Васня варчнесь ерокчинзэ рузонь кельсэ, университетэнь васенце курссо кармась сермадомо эрзякс. Сонензэ вечкевсь, кода сермадыть лиятне, сынст сермадомань лувось, автортнэнь мелень салыця темаст. Тейтересь кармась ловномо эрзянь поэттнэнь книгаст. Неть: Александр Араповонь, Людмила Рябовань, Алина Подгорновань ды Татьяна Мокшановань. Вечкевсь тензэ эрзянь прозаськак, паро мельсэ ловнось А.С. Щегловонь, К.Г. Абрамовонь ды лиятнень.
Катя сонськак а весть варчнесь ерокчинзэ прозань сермадомасо, ансяк тевесь а моли, тейтеренть прясо прозань строчкатне сынсь арыть рифмас ды шкань ютазь лиси стих. Неень шкане Катя седе ламо сермады эрзякс. Сермады эрьва кодамо темас. Меельце стихензэ алтавить тиринь аванзо ды эйкакштнень туртов.
Тейтересь тешксты, зярдо тензэ сы апаро ежось, сон изнясы сонзэ стихень сермадомасо. Сермады ламо, виень апак жаля, зярс берянь ежомарямотне а прядовить. Кода кортыть, коневось цидярдсы весементь.
Катя ледстни эрзянь кельсэ сермадозь васенце стихензэ. Аволь стака чарькодемс, мезде сон. Нама, вечкемадо. Эрьванть эрямосо эрси истямо шка, конань лемезэ васенце вечкема. Самай сон кармавтызеяк Катянь евтнемс эсь ежомарямотнеде конев лангсо.
Аволь умок тейтеренть стихензэ нолдавсть «Сятко» журналсо. Катя корты, стихтнень витнемасо сонензэ ламо лезды журналонь прявт редакторось Людмила Рябова. Истямо ломань марто важодемась канды тейтеренть туртов од содамочить ды виевгавты ерокчинзэ.
Неень шкане Катя мелявты важодема таркань коряс. Сон арси сюлмамс эрямонзо эйкакш марто, секскак вешни важодема тарка Саранскоень школатнесэ.
Ули Катянь эште вейке мелявксозо. Иетнень перть сонзэ таштавсть рузонь кельсэ ламо стихензэ ды ней пек бажи сынст нолдамс. Карматано учомо пельдензэ од пусмо. Тевесь а берянь, эдь стихензэ алкукскак парт. Сынь талновтыцят, смустевть, домкат. Эсенек пельде арсетяно тейтерентень важодемс те енкссонть ды кенярдовтомс ловныцятнень од шкинемасо!
Максыть сёлмон
Те кода истя: минь а вейсэ?
Те кода: толось ёмась сельмстэ?
Пертьпельксэсь ёмавтынзе тюстнэнь,
Чинь лембеськак, маряви, тусь ней.
Мон чувто ладсо нуваргадынь,
Зярдо сёлмовтомо лиядынь.
Се чистэнть полавтовсть арсеман,
Ансяк мон парос яла кеман.
Энялдан тонеть, иля ёма,
Сак онозон, кучт монень сёрма.
Мон ёвтаса теть, мезе потсон.
Тон иля ёма – максыть сёлмон.
Тиринь ёнксом
зярдояк а кадса
Тиринь енксом зярдояк а кадса.
Тесэ чачинь, евтынь васень вал.
Бути эряви, седеем теть максса.
Вечктян, мастором, кортан
эйстэть свал.
Тонь кудот вакска пиже чувтот
касыть…
Кода кенярдан: таго тонеть сынь.
Тонь эйстэ морыть, сермадыть
книгасо,
Ней тондеть валон монгак
сёрмадсынь.
Алёна Артемьева