Вторник, марта 19, 2024
Важное



Шугурова, тиринь велем Мелявтан тонь кисэ мон.
Свал тон аштят монь икеле, Ков а молян, тон мартон...



Неть строчкатнень сёрмадынзе Россиянь Писателень союзонь членэсь, учёноесь Николай Зиновьев. Кода пачкодян тиринь велезэнь, неть строчкатне ледить мелезэнь. Течи Шугурова велесь аволь истямо, кодамо ульнесь комсь-колоньгемень иеде теде икеле.

Тесэнь эрицятне трудонь вечкицят, ялганень лездыцят. Эсь шкасто Калинин лемсэ колхозонть ланга паро славась мольсь аволь ансяк республикаванть, сонзэ томбалеяк. Колхозонь прявтонть Н.В.Камаевень мештесэ цитнесь Социа­листической Трудонь Героень тештесь. Те покш казнесь максозель велень хозяйствасо виевстэ важодеманть ды велень хозяйствань ламо продукциянь саеманть кисэ.

Неень шкастояк Шугурова велень трудий ломантне тевтеме а аштить. Тесэ теезь «Ко­лос» велень хозяйствань предприятия. Сон­зэ важодицятне соксить-виднить ды урядыть тесэнь паксятнень. Республикань келес содавикс крестьянонь-фермерэнь хозяйствань прявтось Ю.Н.Семенов. Сон кирди скалт. А.Н.Потапов - личной подсобной хозяй­ствань азор. Сон кирди мекшть. Ды уш аволь вейке кементь иеть.

Тешкстасынек, А.Н.Потапов зярдояк эзь арсекшне улемс мекш мельга якицякс.
- Мон чачинь 1967 иень октябрясто, Шугурова велесэ. Тетям, Николай Петро­вич, пинге важодсь тиринь велень колхозсо строителекс. Сонзэ пельде тонадынь важодеманть вечкеме. Ней сон ютксонок арась. Авам, Раиса Константиновна, пинге тонавтсь эйкакшт. Нурькинестэ меремс, касынь трудонь вечкиця семиясо.

Александр Потапов школанзо прядызе 1984 иестэ. Иень ютазь саизь армияв. Васня служась Самарань областень Кряж посёлкасо, мейле - Германиясо.

1987 иестэ А.Н.Потапов велявтсь кудов. Шкань апак таргсе документэнзэ марто сась Саранскоев ды максынзе сынст Н.П.Огарёв лемсэ МГУ-нь подготовительной отделенияс. Иень ютазь - Александр Потапов - историче­ской факультетэнь студент.

Университетсэ Александр Потаповонь тонавтнемазо мольсь шождасто. Сонзэ обуцязо уш истямо - козонь кунды, сень топавтсы. Арасель истямо тев - шкастонзо аволинзе максо экзаментнэнь.

1990 иестэ Александр Потапов максынзе тонавтнемань меельце экзаментнэнь ды идизе университетэнь прядомадо дипломонть. Ды теевсь специалистэкс. Ансяк истя уш лиссь, А.Н.Потаповнень специальностень коряс важодемс эзь саво. Сон кармась важодеме Шугурова велень Калинин лемсэ колхозсо механикекс. Те тевенть топавтомо аравтызе сестэнь хозяйствань прявтось Николай Карпушкин. Мейле колхозсонть стясь кевкстемась, кинь аравтомс нешкепирень прявтокс.

- Мон согласинь, - ледстни Александр Николаевич. - Сестэ колхозонь нешкепиресэнть кирдевсть 60 мекшень семият. Теде икеле мекшть некшнинь ансяк паксясто тикшень анокстамсто. Содынь ансяк, зярдо пупатанзат козоньгак - се таркась сеске таргози.
Сон мекштнеде ловнось книгат, вастневсь сетнень марто, кить эсь пиресэ-косо кирдить мекшень семият.

Шкань ютазь масторсонок кармасть кортамо перестройкадо. Теде ёвтнесть телевизорга ды радиова. Мартонзо кармасть каладомо колхозтнэ. Александр Николаевич Потапов раминзе нешкепирень строявкстнэнь, мейле эсензэ лангс теевтинзе моданть лангс документтнэнь. Ды ней сон личной подсобной хозяйствань азор. Мельганзо кемекстазь 30 гектарт мода.

- Васня ульнесть комсьветеешка мекшень семият, - ёвтни А.Н.Потапов.
- Кода эсь подсобной хозяйствань азор, пшкадинь лезкс мельга. Ды тень эзть отказа. Подсобной хозяйстванть виевгавтомга явсть тень малав 700 тёжат целковойть.

Неть ярмактнень лангс Александр Нико­лаевич рамась МТЗ-80 трактор, сеялка, тикшень ледемка ды пурнамка.
Эсь паксятнес личной подсобной хозяй­ствань азорось А.Н.Потапов сонсь видни, бути истя можна меремс, медоност: синяк, фацелия. Александр Николаевич кирди зярыя кементь реветь. Сынст туртов видни люцерна, лия-мезе.

А мезть сёпомс, ськамот ламо а теят. Виеть а сатыть покш тевень топавтомсто.
- Тень лездыть тиринь велень од цёратне. Неть - Кечайкин Саша, Вячеслав Пивкин. Сынь сакшныть тень важодеме эсест техникасо. Трактортнэнень солярканть яван мон, - тешкстызе А.Н.Потапов.
- Васень шкастонть меденть микшнинь- явшинь малавикстнэнень, ялгатненень... Ярмактне тукшность нешкепиренть виевгавтомантень.
Течи А.Н.Потаповонь нешкепиресэнть мекшень 55 семият. Сынст туртов кудынетнень, рамкатнень, лия мезенть Александр Николаевич сонсь тейни. Сон рамсесь чувто марто важодемань инструментт.
Мекшень кирдицянть валонзо коряс, медень саемстэ тензэ пек лездыть цёранзо Коля (сон важоди Чаунзасо) ды Юра (ней сон эри Московсо), ялаксозо Костя, сонзэ эйкакшонзо... Нама, весемесэ пек лезды тензэ На­дежда Юрьевна козяйказо.

Меельце иетнестэ Саранскойсэ ютавтневить медень фестивальть, ярмункат. Сынст анокстакшны Мекшень кирдицянь республикань вейсэндявксось, конань прявтсо С.В.Юматов. А.Н.Потапов эйсэст свалшкань участник. Меельце фестивальсэнть, кона ютавтозель 2020 иень мартсто, Александр Николаевич саизе 3-це тарканть.
- Содатадо, неть читнестэ, кода эсь подсобной хозяйствань азоронтень, программань коряс «Россетень» важодицятне нешкепирес ветясть свет. Ней тевтне седеяк парсте туить.

Кода кортыть, эрямось таркасонзо а ашти. Мекшень кирдемстэяк эрявить од содамочить. Тень мельсэ кирдезь, Александр Николаевич Потапов эсь ёрокчинзэ касты колмо ковонь курсатнесэ, конатнень ютавтни Мекшень кирдицянь республикань вейсэндявксось.
Тешкстасынек, нешкепирень азорось А.Н.Потапов топавты общественной тевтькак. Сон - мекшень кирдицянь Покш Березникень райононь вейсэндявксонь прявт.

- Течи минек вейсэндявкссонть 77 ломанть ды весемезэ 700 мекшень семият, - ёвтни Александр Николаевич. - Мекштнень кирдить Покш Березник, Симкина, Эрзянь Найман, Пермезь велетнесэ.
Мекштнень лезэвчидест кортамсто А.Н.Потапов анок ёвтнемс певтеме.
- Се, кие важоди вечкевикс тевсэ, уцяскав, - видькстась Александр Николаевич. - Пароль, тевем поладовлизьгак эйкакшон.
Апак кавтолдо мертяно, Александр Николаевичень поладыцянзо улить!

Пётр Зиновьев

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».