Суббота, апреля 20, 2024
Важное
Илинк максо прянк манямс!

Саранск ошонь эрицясь, вейке госучреждениянь водителесь а содавикс ломаннень максынзе 830 тёжат целковоензэ, штобу «ванстомс» ярмаконзо мошенниктнеде… Истят кулятнеде сеедьстэ марятано СМИ-тнестэ ды ловнотано Мордовия Республикава МВД-нь сайтэнть ванкшномсто.

Теде мейле 48 иесэ цёрась сась яволявтома марто полицияв. Сонензэ гайневтицясь прянзо ёвтызе Центральной банксо важодицякс ды пачтясь мошенниктнень ёндо лангозонзо кредитэнь саемадо. А содавикс ломаненть кармавтоманзо коряс цёрась саинзе ярмаконзо банконь весе картатнестэ ды ютавтынзе тензэ ёвтазь счётонтень. Зярдо весе ярмактне, 830 тёжат целковойтне, тусть манчицятнень лемс, сынь лоткасть телефононь пачк мартонзо кортамо, ёмасть. Ды ансяк теде мейле сон чарькодсь манявомантень ды сась полицияв яволявтома марто.

Меельце шкастонть истят апаро тевтне ламолгадсть кода масторонь келес, истя республикасонокак. Те кевкстеманть коряс профилактикань тевтнень ютавтыцятнестэ васень таркасот участковой службань сотрудниктне.

Седе, кодамо зыян кандыть манчицятне эрицятненень ды сехте пек сыре ломантненень, участковоень тевенть топавтомадо кортынек Внутренней тевень органтнэнь территориальной подразделениянь Саранскойсэ Россиянь МВД-нь Управлениянь 1 № ОП-нь (Саранск ошонь Октябрьской районось) полициянь старшей участковой уполномоченноенть Алексей Викторович СУЮШОВ марто. Тешкстасынек, те эрзянь цёрась малав кемзисемге иеть канды службанть Внутренней тевень органтнэсэ ды весе те шканть перть топавты участковоень тевенть. Эсь профессиядонть ёвтнемстэ сон пачтясь, роботась тензэ пек вечкеви, свал ломань ютксо, важодемань эрьва чись лия ёнов а молиця, свал мезе-бути одонь кандыця. Кенярдовты, кода марят паро кулят, эли ёвтыть сюкпрянь валт кинень-бути лездамонь кисэ.

Тешкстасынек, Алексей Суюшовонь участкась аволь вишкине, сонзэ вановт ало ашти Озёрной посёлкась. Участковоенть валонзо коряс, велетнесэ стакачитне васняяк сюлмавозь территориянть покшолманзо марто. Сеске эрьва ков стака кенеремс. Алексей Викторович тень лангс а пеняци, эдь сонзэ эйкакш шказо ютась Орданьбуень райононь Колазелесэ. Эштё эйкакшокс улезь, кода ламот сынст велень цёрынетне, сон арсесь полициясо службадонть ды седе пек участковоень тевденть. Нама, а стяко Алексей Суюшов школанть прядомадо мейле тонавтнесь М.Е. Евсевьев лемсэ МГПУ-нь (сестэ МГПИ) историянь ды правань факультетсэ. Истя, 2006 иестэ вузонть прядомадо мейле од специалистэсь сеске кармась важодеме Саранск ошонь Октябрьской райононь ОВД-сэ, сестэ эштё милициянь участковой уполномоченноекс. Васень шкасто саезь сон парсте чарькодсь, участковоесь – закононь ломань, кие лезды эрьва кодамо стака тевтнень ванкшномсто.

Алексей Суюшовонь валонзо коряс, эрицятне пшкалить тензэ кудоютконь тевтнень, аладямотнень-сёвноматнень, саламотнень коряс. Кода мерсь участковоесь, меельце шкастонть пек ламолгадсть телефононь ды Интернетэнь вельде манчицятне. Тень коряс сон пачтясь превс путомат минек ловныцятненень:
– Уледе редицякс ды илядо понго манчицятненень. Саемга, телефонозонк гайневти а содавикс ломань ды талновтыця вайгельсэ пачти: тынк раськенк (цёранк, нуцьканк, нинк, мирденк, эйкакшонк) марто лиссь зыян. Саемга, сон тапась ломань эли понгсь полицияс наркотикень кирдемань кис. Те стакачинть витемга эрявить ярмакт ды сынст эрязасто пачтямат, шканть таргсемась прядови пекстамосо.

Телефонсо кортыцясь лемди эсь прянзо полициясо, ФСБ-сэ важодицякс, кона ярмаконь кис анок лездамс те тевсэнть.
Ярмактнень эрявить ютавтомс телефононь номерс, банконь картас эли максомс сынст конверт потсо курьерэнть эли таксинь ветицянть вельде. Тандавтозь ломантне малав свал ютавтыть таштазь ярмакост манчицятненень. Васняяк гайгстама се ломанентень, конась буто понгсь стакачис, ды кевкстемс кедьстэнзэ, алкукс-арась мартонзо лиссь берянь тев. Бути телефонозо аволь сетьсэ, тердемс сонзэ телефонс гайгстыцятнень вельде, кадык сонсь ёвтасы, мезе лиссь мартонзо, кодамо зыянс понгсь, – кармавты Алексей Викторович. – Неень шкасто эрьванть ули банконь картазо, сынь кеместэ совасть минек эрямос. Сонзэ вельде паро пандомс рамавкстнэнь. Маряви, ярмактне а беряньстэ ванстовить, эдь пин-кодонть содасак ансяк тонсь. Теке марто манчицятне тесэяк содыть карточкатнестэ ярмаконь саламонь эрьва кодат ёнкст.

Нама, минь важодтяно эрицятнень марто, ёвтнетяно манчемань-саламонь ёнкстнэде, явшетяно памяткат, ансяк ломантне ялатеке манявить. Тагояк пшкадян эрицятненень. Илинк максо прянк манямс! Зярдояк илядо нолда эсь кудозонк а содавикс ломанть. Бути сыцятне ёвтыть пряст социальной службань эли жо лия ведомствань важодицякс – ванынк сынст удостоверенияст ды гайневтеде те службантень. Зярдояк илядо максо истят сыцятненень ярмакт, илядо кеме кодамояк акцияс. Теде башка, илядо кеме телефонсо гайневтиця «малавикстнэнень», конат вешить кедьстэнк ярмакт. Кевкстеде, кие тынк марто корты, кода фамилиязо, лемезэ, зяро иензэ, содасынзе-арась тынк малавиксэнк, ялганк. Истят кевкстематне талакавтсызь манчицянть, сон карми човорявомо ды лоткавтсы кортамонть.
Илядо кеме сеть гайневтематненень, косо алтыть ярмаконь компенсация, бути тынь путтадо зярыя ярмакт расчётной счётс. Илядо гайневте сеть номертнэс, конат гайневтсть тыненк ды лоткавтызь телефононть. Истят номертнэс гайневтемстэ тынк телефонсто саевить ярмакт. Зярдояк илядо гайневте сеть номертнэс, косто сыть пачтямот, што тынк картанк блокировазь. Сюлмаводо банконть марто «пси линиянь» телефонганть, конась тешкстазь картанть удало.
Операторонть марто кортамсто картань пароленть, реквизиттнэнь, эсь персональной даннойтнень зярдояк илядо ёвтне: банконь важодицятнень корязонк ули весе эрявикс информациясь. Башка пшкадян сыре ломантнень малавиксэст туртов. Кортадо эсь тетятнень-аватнень, покштятнень-бабатнень марто, ёвтнеде манчемань ёнкстнэде, илядо мере тенст кортамс а содавикс ломантнень марто. Ванстынк эсь малавиксэнк манчемань-саламонь тевтнеде!

* * *
Теке жо чистэнть полициянь старшей участковой уполномоченноенть Алексей Суюшов марто якинек Саранск ошонь округонь Октябрьской райононь куротнева, кортнинек вастовиця ломантнень марто ды явшинек тенст памяткат, косо сёрмадозь сеть правилатне, кода а эряви понгомс манчицятненень.

Вана вастынек сыре ломанть. Неть: Евгений Иванович ды Лидия Ивановна Киселёвтне. Сынь стамбарнэ эйгажа кинть ланга ютамсто кирдсть вейкест-вейкест. Аванть марто кортамсто карминек содамо, сонензэ аволь весть гайневтнесть телефононь вельде. Аволь умок тензэ гайневтсь а содавикс ломань ды пачтясь килангонь зыянов тевс цёранзо понгомадо, ды вешсь кедьстэнзэ 10 тёжат целковойть.
Лидия Ивановна васня пек ацирьгадсь ды аноколь максомс ярмаконзо. Аламошкас арсемадо мейле гайневтсь цёранстэнь, штобу содамс алкукс-аволь лиссь килангонь кажо. Алкукс жо те ульнесь манчемань тев ды кодамояк зыян цёранзо марто эзь лисе.

Седе тов вастовинек кавто од ломань марто, кить истя жо пачтясть, келя, сынст кедьстэ аволь весть а содавикс ломанть вешсть ярмакт. Ансяк одтнэ кунсоломост эзть карма, сеске сезизь кортамонть. Вана истя эряви свал теемс, зярдо тыненк гайневтить а содавикс ломанть!

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».