Минек эрямосо вечкевикс тевентень мелесь чачи эйкакш пингестэ саезь. Кинь уш лавсьсэ аштезь гайги виев вайгелезэ, кие ансяк сырги якамо, бажи киштемс, кие вечки артомо. Истя лиссь Лена Киреевань мартояк. Вишка шкане ды школасо тонавтнемстэ сон явсь покш мель артомантень. Коневонь някатненень артсь-керсесь мазый оршамопельть, тейнесь тенст тетрадьстэ кудынеть.
Школасо вечкевикс урококс ульнесь рисованиясь. Марявсь тензэ, арты пек парсте. Тонавтыцясь жо свал путнесь «нилеть». Ды ансяк шкань ютазь педагогось видькстась: редясь эйкакшосонть вийть, маштомачить ды учось пельдензэ седеяк вадря невтевкст. Минек героинясь эзь карма артыцякс (куш профессиязо малавикс тенень). Сон кармась оршамопелень дизайнерэкс.
Елена Киреева чачсь Саранскойсэ. Тонавтнесь 37-це № школасо, косо трудонь уроктнесэ тонавтнесть стамо халатт, алгапанарт ды лият мезть. Тенень пек кецнесь бабазо, кона маштыль стамо. Сон яла кортыль: «Вана кармат стамо, зярдояк кшивтеме а улят». Лена тень каршо ансяк пейдиль.
9-це классонть прядомадо мейле Елена мольсь тонавтнеме Саранскоень электромеханической колледжев. Кочкизе швейной изделиянь «конструктор-модельер» специальностенть.
– Колледжсэ тонавтнемась тукшнось мелезэнь. Стазь оршамопельтнень невтнинек театратнесэ ды ардтнинек лия ошов. Самай тосо макссть тенек стамонь маштомачитнень, конструированиянь содамочитнень. Те ульнесь алкуксонь база. Весе домкасто, келейстэ. Бути а улевельть истят занятиятне, мезеяк а содавлинек ды а маштовлинек. Сюкпря ёвтавлинь тонавтыцянок Валентина Викторовна Поповань туртов. Сон ветясь конструированиянть, – евтни Елена.
Теде башка, од тейтересь ютась парикмахерэнь, маникюронь коряс мастерэнь курсат, ансяк те эзизе сала мелензэ.
Седе тов кармась тонавтнеме Н. П. Огарев лемсэ МГУ-нь Национальной культурань институтсо. Кочкизе «Дизайн костюма» енксонть. Тосо од ломантнень тонавтсь содавикс дизайнерэсь ды педагогось Галина Лосева. Елена самай сонензэ анокстась дипломонь тевензэ – «Нарда» авань оршамопелень коллекциянть. Теке жо шкасто кавто иеть Елена тонавтнесь Саранскоень промышленной технологиятнень ды сферань услугатнень техникумсо портноекс-закройщикекс. Тонавтнемань шкасто кенерсь роботамо ательесэ, ков ломантне кандтнесть стамс-витнемс оршамопельть. Ансяк тень эйстэ эзь маря седеень витема. Сон бажась тееме мезеяк сонсь, арсемс эсензэ пельде.
Варчинзе виензэ Московсо
Вузонть прядомадо мейле, кода минек ламот од ломантне, тусь важодеме Московов. Кармась роботамо Вячеслав Зайцевень «Дом моды» предприятиясонть.
– Вячеслав Зайцевень кедьсэ ульнинь оршамопелень конструкторокс. Тосо ламо мезенть стынек-теинек кедьсэ: анокстынек подиумга якамс мазый оршамопельть, топавтынек бутиктнень кармавтомаст. Мон понгинь самай се шкастонть, зярдо эрявсь стамс Надежда Бабкинань прявтсо «Русская песня» ансамблянть туртов ламо костюмт – эстензэ ды морыцятненень-киштицятненень. Коллективенек вадряль. Важодинек концерттнэсэ, ульнинек «Неделя моды в Москве» покш кенярксчисэнть. Сцена удало эрявсь куроксто ды видестэ оршавтомс модельтнень лангс стазь костюмтнень, – ледстни Елена.
Те таркасонть сон роботась кадык пельие, ансяк ламо мезес тонадсь. Эзь пеле керямс коцтонть, важодемс эрьва кодамо материал марто, кортамс ломантнень марто. Весемесь тукшнось мелезэнзэ, ансяк пандсть аламо, лиясто зарплатань таркас максыльть концертс билетт. Еленань кадсть тоско, тердсть тонавтомо студентт «Дом моды» лабораторияс. Тосо лия технологият ды важодемань методика, сон эзь карма.
Седе тов Елена кармась роботамо Московонь «Смена» швейной организациясо, истя жо оршамопелень конструкторокс. Стась эйкакшонь оршамопельть, школань формат, пешксесэ аватненень оршамопельть. Тесэ лия сфера, юты производства, стыть, онкстнить, невтить оршамопельтнень.
Елена сеедьстэ сакшныль Саранскоев, косо эйсэнзэ свал учось авазо. Мейле истя лиссь, мекев велявтсь тей. Ушодовсь коронавирусось. Сон кудосо стась маскат.
Стамось канды кеняркс
Шкань ютазь Елена Киреевань тердизь важодеме Эрзянь ды мокшонь раськень драматической театрав костюмонь коряс художникекс. Сон стась костюмт зярыя спектаклятнес: «Золушка. В ожидании чуда», «Куйгорож», «Не все коту масленица», «Саня, Ваня, с ними Римас».
Неень шкасто модельерэсь самозанятой. 2024 иестэ сон сермадстсь соцконтракт. Важоди кудосо. Тейни индивидуальной заказт. Пшкалить тензэ минек ансамблятнень артисттнэ, ськамост морыцятне. Сты школань прядыцятненень мазый оршамот, свадьбань палят, эйкакшонь костюмт, конат эрявить кенярксчитнес ды фотосессиятнес.
– Мон пек вечкан лия енов а молиця заказт. Кадык стакат, кадык лангсост сави ламо важодемс, ялатеке те канды монень кеняркс. Вана нейгак стынь Щелкунчикень, Русалкань эйкакшонь костюмт. Чарькодеви, эрьвась веши седе куроксто ставтомс. Мон яла ве шкасто стан зярыя оршамопельть, вейкестэ кундан омбоцес, истя тонадовсь тень, – евтни дизайнерэсь.
Соцконтрактонть лезксэнзэ лангс (явсть 350 тежат целковойть) Елена рамась профессиональной оборудования ды эрявикс материалт. Улить стамонь зярыя машинканзо, парогенератор. Спецзаказонь коряс рамась оршамопельтнень кроямонь туртов покш столь. Кудосонзо явсь башка таркине, косо сты-керси. Коцттнэнь рамси минек лавкатнестэ эли кармавты Интернетстэ.
– Елена, кода чачнить мазый оршамопельтне, мейстэ весемесь ушодови?
– Васняяк образось чачи мельсэ-превсэ. Эскизэнь артомсто уш арсят эрьва эскельксэнть: кода кармат стамонзо, невтеме, кирдеме форманть. Ставкстнэнь теема истя, мезеяк а неяволь. Ламо енкст. Вешнят эрявикс коцт, чинь перть лавкава ванкшнат-кочксят. Кода кортыль Галина Лосева тонавтыцянок, дизайнерэнтень эряви маштомс эрьва мезень тееме.
Елена важоди вейсэ Татьяна Муравкина фотографонть марто. Фотосессиятнес стась оршамопелень покш коллекция: улить рузонь народной костюмт, рузонь хохлома, гжель, фатинстэ цеця марто ды готической платият, пряс путомат. Ды ламось стазь кедьсэ.
2017 иестэ Елена Киреева лиснесь изницякс «Этно-Эрато» раськень оршамопелень евразийской конкурссо («Финнэнь-угрань раськень сехте вадря костюмт» номинациясо). 2021 иестэ «Куйгорож» спектаклясо сехте вадря костюмтнень кисэ казевсь дипломсо. «Мираж» коллекциянзо марто ардтнесь Санкт-Петербургов эйкакшонь оршамопелень форумов, стакшнось 16 костюмт. Те – XVIII-це пингень европейской модань коряс стазь оршамопельть, эйсэст кружоват, парсейть, пряс путомат – бантикть, чепчикть. Теке жо коллекциянть сон невтизе «4 сезона моды» дизайнерэнь регионъютконь конкурссо. Пелькстамось ютась мелят Саранскойсэ. Важодемаст невтеме модельерт сакшность Чувашиясто, Удмуртиясто, Башкортостансто, Кировань енкссто. Елена Киреева саизе Гран-принть. Явсь мель лия пелькстамотнескак. Валонзо коряс, стакачись пачтямосонть – покш костюмтнень ускомс аволь шожда.
Минек героинясь рузава, ансяк сонзэ улить эрзянь раськень ундоксонзо Чаунзабуестэ, паряк, секскак пек тукшны мелезэнзэ стамс эрзянь ды мокшонь раськень оршамопельть. Сон бажи стамс истямо коллекция. Неень шкане ламот ставтыть эрзянь ды мокшонь раськень палят, костюмт. Секскак, кинь ули мелезэ ставтомс мезеяк мазый, истямо, кодамо киньгак арась ды а муят рамамс, пшкадеде Еленанень.
Татьяна Маторкина