Суббота, сентября 18, 2021
Важное

Умарьковонь васенце читнестэ чачома чинзэ тешксты Кочкуровань райононь эрзянь кезэрень велесь – Давыдвелесь. Сонензэ топодить 458 иеть. Аволь умок минь ульнинек инжекс те велесэнть. Веленть икелень шкатнеде ды течинь эрямодонть кортынек велень администрациянь прявтонь тевтнень топавтыцянть Динара Бариевна Ромашкина марто.



Веленть историясто

Пачтямотнень коряс, велесь теевсь XVII пингень куншкавидьстэ. Сестэнь сёрмадстомань невтематне пачтить: велесэнть лововсть 68 кудот. Кемзисемгеце пингень прядовомантень теезель церькова, конась XIX пингентень каладсь ды тарказонзо стявтовсь од.
1930 иентень Давыдвелесэ ульнесть 254 кудот (1 344 ломанть), важодсь ведькев. 1933 иестэ велесэнть тееви «Правда» колхозось, сон пурнавсь вейкине хозяйстватнень вейсэндязь. 1996 иестэ саезь ушодсь важодеме «Сурские зори» СХПК-сь.

Колхозонть пурнамга-теемга ламо вийть путсь Василий Андреевич Байгушкин, ламо иеть прявтокс истя жо ульнесь Иван Петрович Соколов. Сонзэ пингстэ колхозось макссь вадря невтевкст – ульнесь «миллионерэкс». Те шкастонть теезель тувонь кастомань-андомань ферма, панжозель конюшня, пурназель ловсонь ферма (потявтовиця скал марто кото стадат) ды сюракшов ракшань трямонь-кастомань комплекс. Истя жо стявтозельть сюронь кирдемс таркатне ды тинге ланго.

1950-це иетнестэ велесэнть панжовсь клуб, 70-це иетнестэ – мебелень теема фабрика.
Ютазь пингень 30-це иетнестэ тесэ башка мель явовсь сёрмас содамонтень. Истя, 1932 иестэ велесэнть теевсь вейке этажсо чувтонь од школа, косо ульнесть кемнилее класст ды тонавтыцятнень туртов кабинет. Иестэ иес тонавтницятне ламолгадсть ды 1970 иентень школасонть лововсть 360 тонавтницят. Эйкакштненень таркась аламоль, секскак 1975 иестэ панжовсь од школа. Кавто этажсо кирьпецень зданиясонть ульнесь весе эрявиксэсь: спортонь туртов зал, библиотека, пионерэнь комната ды седе тов.
Велесь эрясь эсь койсэ. Сестэ эрямось тесэ алкукс лаказь лакась. Эйкакштнеде ды од ломантнеде ульнесть ламо, эрицятне роботасть колхозсо ды эрьва семиясо кемсть, веленть ули вандынь чизэ. Кода жо ашти алкукс?

Давыдвеленть течинь эрямозо

Алкукс жо весемесь ашти аволь истя вадрясто ды кенярксовсто. Кода Россиянь ды минек республикань ламот лия велетнеяк, Кочкурбуень Давыдвелесь аламонь-аламонь чами. Кода тешкстызе велень администрациянь прявтонь тевтнень топавтыцясь Динара Ромашкина, течинь чине сынст поселениясонть, козо совить Давыдвелесь ды Рузонь Давыдовась, эрить 452 ломанть, кудотнеде лововить 310. Ды неть эрицятнень эйстэ аволь вишкине пельксэсь сеть, конат велесэнть ютавтыть ансяк тундонь-кизэнь шканть, свалшкане жо а эрить.

– Велесэнть неень шкане ули Культурань кудо, ФАП, библиотека, почта, важодить кавто лавкат. Ансяк вейкесь ацирьгавты: арасть важодема таркат, – корты Динара Бариевна. – Самай те тувталось панияк тесэнь эрицятнень вадря эрямонть мельга покш оштнес. Эдь семиянть эряви трямс, ды од ломантне уш а бажить ладямс эсь эрямонть тиринь Давыдвелесэ.

Нама, ульнесть шкат, зярдо велесэнть средней школаяк ульнесь. Ансяк меельце иетнестэ эйкакштне аламолгадсть ды школанть пекстызь. Ней кавто этажсо кирьпецень зданиясонть важодить велень весе учреждениятне. Весе вейке таркасот. Школав жо эйкакштнень усксить шабра Сурвелев.

Теке марто велесэнть важодить сисем крестьянонь-фермерэнь хозяйстват ды «АГРОСОЮЗ-С» СППССК-сь, конат максыть эрицятненень важодема таркат ды лездыть велентень лисиця мелявкстнэнь решамосо. Хозяйстватне важодить сюронь-тикшень кастомань, сюракшов ракшань трямонь ды ловсонь нолдамонь ёнкстнэсэ.

– Мон прявтонь тевенть тесэ топавтан кавто иеть, – ёвтни Динара Ромашкина. – Нама, тевтнеде ды мелявкстнэде сатышка. Кода ансяк сынь, сеске карминек решамо кевкстеманть китнень тееманть-витнеманть коряс. Анокстынек проектно-сметной документация ды вана неть читнестэ «Комплексное развитие сельских территорий» программанть коряс минек велень Центральной курованть ушодовсть кинь теемань роботатне. Весемезэ витневи 940 метрань кувалмосо пельксэсь. Контрактонь коряс тень лангс эрявить 16 миллионт 100 тёжат целковойть. Тевтнень топавты «МАПО-ТРАНС» ООО-сь. Неень шкане полавтозь ведень нолдамонь трубась, колмо истят трубатнень пельксэст витнезь, келейгавтови кись. Ардома кинть келезэ карми кото метрат.

Тень кисэ Д.Б. Ромашкина покш сюкпря ёвты Кочкуровань райононь администрациянтень ды прявтонтень Светлана Николаевна Герасимованень ды эсь велень КФХ-нь прявтонтень Александра Викторовна Парваткинанень, кона саизе эсь лангс софинансировамонь пельксэнть (программань коряс те аравтлув, велентень эряви путомс эсь ярмакткак) ды макссь 800 тёжат целковойть.

– Александра Викторовнанень покштояк покш сюкпря, сон минек васень лездыцянок. Кодамо тев марто иля пшкаде, вановттомо а кадтанзат, лезды свал, – тешксты Динара Бариевна. – Истя жо минек свалшкань лездыцянок ды превень максыцянок – «Республиканская клиническая больница № 5» МР-нь ГБУЗ-нь прявт врачось Анатолий Николаевич Пинямаскин.

Нама, лия эрицятнеяк бажить теемс весементь эсь велесэ эрямонть вадрялгавтомга. Тень коряс Давыдвелесэ ули эрицятнень инициативной группа, конань прявтсо аштить, кода кортыть, велень активисттнэ – Василий Иванович Кирюшкин ды Валентина Петровна Адушкина. Сынь кирдить кеме сюлмот администрациянть марто ды свал ёвтыть, кода ды мезе теема. Истя, сынст мелест-бажамост кирдезь, ютазь иестэ велесэнть витневсь-вадрялгавтовсь Ине Отечественной войнасо чавовозтненень кеврунгось.

– Ютазь иестэ весе масторось тешкстась Изнямонь 75 иетнень, – ёвтни Динара Ромашкина. – Минек умок уш ульнесь бажамонок витнемс войнасо чавовозтненень кеврунгонть. Эдь ванстомс сонзэ – минек прявт тевенек. Ансяк вана витнеманть лангс администрациянть ярмаконзо арасть. Ды минь каинек яволявтома неть тевтнес субсидиянь явома лангс. Ды изнинек 380 тёжат целковойть. Путозельть эштё малав 30 тёжат эсенек ярмакт ды кеврунгось витнезель.

Истя жо меельце иетнестэ Давыдвелень администрациясь покш важодема ветясь экологиянь тевтнень вадрялгавтомга. Тесэ совасть ТКО-нь пурнамонь программантень ды кавто велетнесэ теевсть шукшонь пурнамонь кемготово площадкат. Ней арасть кодаткак мелявкст сень коряс, ков теемс шукшонть. Эрицятне курок тонадсть од полавтоматнес ды пандоматнень коряскак кияк а пеняци. Тешкстыть, весемесь тееви сынст туртов ды велесэ эрямонть вадрялгавтомга.
Кода ёвтынек икеле, неть читнестэ Давыдвелесь тешксты эсь чачома чинзэ. Зярс кенярксчинь мероприятиятнень ютавтомась минек республикасо а мереви, кода карми седе тов, невтьсы шкась. Ансяк тесэнь эрицятне куш кодамо кенярксчинть свал учить покш мельсэ ды тешкстыть веленек. Ней жо сынст ули мелявксост – арась клубонь прявтост. Секскак, бути тынь ломанесь творческой ды ули меленк эрямс мазыйдеяк мазый таркасо – ве пеле тусто пиже виресь, лия ёно – шольниця Сура леесь, ды, теде башка, Саранск ошонть эйстэ аволь васоло – варчинк эсь ёрокчитнень велень культурасо важодемасонть. Паряк, те тевесь ули тенк мелень коряс!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».