Вторник, марта 19, 2024
Важное

Аволь умок Республикань Кудосо МР-нь Прявтонь тевтнень топавтыцясь А.А. Здунов вастневсь ёроков од ломантнень марто. Те – олимпиадань, эрьва кодамо покш пелькстамонь изницят. Сынст ютксто вейкесь – Ирина Батяркина. Сон казевсь «Научно-техническое творчество и учебно-исследовательская деятельность» номинациянть коряс.



Эрзянь тейтересь чачсь Отяжбуень Сабанцелесэ. Мелят сырнень медаль марто сон прядызе школанзо. Весе тонавтнема иетнень перть невтнесь прянзо школань тонавтницятнень эрьва кодамо пелькстамосо. Валонзо коряс, вечкевикс предметэнзэ школасо ульнесть рузонь келесь, химиясь, физикась, географиясь. Ды, нама, эрзянь келесь. Сонзэ ветясь Надежда Николаевна Сайгушкина. Тонавтыцясь макссь ламо содамочить, путсь превс, явсь покш мель эйкакштненень. Ирина эрьва ие 9-це, 10-це, 11-це классо тонавтнемстэ пелькстась ды изнясь эрзянь келень ды литературань коряс райононь олимпиадатнесэ. Мейле тердезель Саранскоев, косо ютась те конкурсонь Регионъютконь этапось. Тосояк сайнесь 1-це ды 2-це таркатнень.

Весе неть изнявкстнэнь кис Ирина Батяркина лия парсте тонавтницятнень марто (ёроков эйкакштнень, активисттнэнь) кучозель Московов. Тосо сынст туртов арсезель покш программа. Школань тонавтницятнень сайнизь Государственной Думав, Якстере площадев, ютавтсть экскурсия Воробьевонь пандотнева, ламо ёвтнесть МГУ-до, Московонь кезэрень ды мазый таркатнеде.

– Те ульнесь ансяк вейке чи. Ансяк истямо сюпав! Сон кадовсь пек лембе ледстнемакс, – ёвтни Ирина.
Эрзянь тейтересь кенерсь школасо парсте тонавтнемеяк, эрьва косо прянзо невтемеяк. Вете иеть киштсь «Киштема кудо» райононь Культурань кудонь коллективсэ. Сынь аволь весть киштсть «Шумбрат, Мордовия!» республикань раськень творчествань фестивальсэ. Морсесь ды киштсь эсест велень «Комолькай» ансамблянть марто. Вечки спортонть. Налксесь мини-футболсо.

Пелькстась «Живая классика» од ловныцятнень Весероссиянь конкурсонь минек ёнксонь этапсонть. Ловнось Ф.М. Достоевскоень «Братья Карамазовы» романсто саевкс. Лиссь лауреатокс. Сайсь 1-це тарка «Родной язык в моей семье» республикань пелькстамосо.
2019 иестэ изнясь «Ученик года» конкурссо, кона ютавтовсь Отяжбуе ёнксонь тонавтницятнень ютксо. Мейле ульнесь республикань этапось. Сон совась кемень сехте виев тонавтницятнень юткс.

Те минь ансяк нурькинестэ ёвтнинек сонзэ изнявкстнэде. Теде башка, сёрмадозельть исследовательской ды творческой важодемат. Ды кода лиякс? Иринань авазо – Светлана Ивановна, важоди Сабанцелень школасо географиянь тонавтыцякс. Тейтерензэ пельде вешсь сехте ламо. Те эзизе талакавто ды эзизе тандавто Иринань. Сон пек вечксь аванзо уроктнень, географиянть. Секскак школань прядомадо мейле мольсь тонавтнеме Н.П. Огарёв лемсэ МГУ-нь географической факультетэв (кода зярдо-бути авазояк).

– Тонавтнемась пек тукшны мелезэнь. Кочкия «Туризм» ёнксонть. Теевтяно содавиксэкс лия мастортнэнь, сынст культураст, историяст, коест-кирдаст марто. Кеман, ардан ковгак васов, несынь эсь сельмсэ омбо мастортнэнь. Минь группанек бажинек ваномс Россиянь оштнень, ансяк ушодовсь пандемиясь… – ёвтни Ирина.

Од тейтересь вузсояк а ашти тевтеме. Сон – группань староста, культурно-массовой секторонь кис аштиця. Студентэнь советэнть марто ютавты эрьва кодат вастовомат.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».