Кочкуровань гармонистэсь ды морыцясь Николай Старкин июнень васенце читнестэ ульнесь Андрей Малаховонь «Песни от всей души» передачань съемкатнесэ. Эрзянь церась понгсь те весенень вечкевикс народной проектэнтень сонсь, ульнесь покш мелезэ варчамс эсь вийтнень истямо содавикс невтемасонть, косо морсить ды мельспаросо эседест евтнить минек масторонь од таланттнэ.
Николай тосо морызе Михаил Устиновонь «И до рассвета звонко» моронть ды теке шкасто сонсь налксесь гармониясо. Программань пурныцятнень валост коряс, те моронть зярс кияк тосо эзизе морсе. Н. Старкин марто передачанть невтьсызь сентябрясто. Те гармония ланга кенярксов моросонть, конань вельде церась киштевтьсынзе студиясо инжетнень, Николай панжсы од сезононть. Секскак морамо карми васенцекс, илинк менстя! Аравтозь чинть евтасызь седе тов.
Весемесь ушодовсь истя. Интернетэнть вельде церась кармась содамо, вере евтазь телепередачась вешни гармонистт ды Николай макссь тов яволявтома, косо тешкстызе, келя, кода уш колмо иеть налкси гармониясо тиринь Кочкуровань культурань центрасо, вельмевти те кезэрень раськень инструментсэнть налксема коенть. Теке чистэнть тензэ сась серма, косо вешсть вайгелень пурнамга тешкстамс каршо валтнэнь анкетасонть максовиця кевкстематнень лангс. Куроксто сонзэ кис максозельть ламо вайгельть. Аламо шкань ютазь Кочкурбуев састь «Россия 1» телеканалонь журналистт ды тейсть сюжет минек культурань койтнеде-кирдатнеде. Сынст невтемс лездась Ташто Мурзань «Норовава» ансамблясь, конань марто Николай сеедьстэ вейсэ морси.
Теде башка, федеральной журналисттнэнень евтнезель культурань енкссонть стакачитнедеяк: весе районтнэсэ а сатныть профессиональной образования марто музыкантт, гармонисттнэде жо вейке-кавто цела районс, сетькак самоучкат. Журналисттнэ паро мельсэ ваннызь райононть, ардтнесть зярыя велева. Съемкатне мольсть чинь-чоп, 11 часонь перть тенст невтезель велень кудонь эрямонь лувось-ладось – кудопотмось, ярсамопелесь, раськень оршамотне, эрзянь моротне. Эрзякс моразель «Килейбуло» ды ютавтозь рузонь кельстэ «Ой, калина» моротне.
«Мон невтинь, мейсэ лездан Ташто Мурзань сехте сыре бабантень Ольга Серафимовна Ереминанень: уштынь баня, нешкепиресэнзэ таргинь сотат. Кой-кона бабатне ардтнесть велеванть мотоблоксо, теньгак снимизь. Ве валсо, тейсть алкуксонь съемкат велень эрямодонть, сонзэ койдензэ-кирдадонзо. Чинь ютазь, июнень 3-це чистэ, мон уш ардынь поездсэ Московов. Ки лангонть ды колмо тештес «Максим Славия» отельсэ эрямонть пандызь телепроектэнь теицятне. Тешкстаса, мелят масторонь прявт ошсо мон морынь «Россия» выставкасонть-форумсонть, косо невтия Мордовиянть ды эсь райононть культуранзо. Морынь нурька морынеть, «Деревня моя», «Килейбуло» моротнень», – евтни гармонистэсь.
Николаень мельс пек тусь «Песни от всей души» телепередачанть ветицясь Андрей Малахов: «Сонзэ марто пек шожда кортнемс. Мерят, содавикстано мартонзо ламо иеть. Эфирдэнть икеле ванносы эрьва участникенть биографиянзо. Сон вейке ды теке ломань кода экрансо, истя эрямосояк – чевте седей ды валдо ойме. Эсь прят тосо марят, теке кудосо паро ялгат вакссо. Тешкстаса, весе участниктнень эйстэ ансяк монь, паряк, кода сехте одонть, нолдымизь сонзэ гримеркас нурька видеороликень тееме. Те ульнесь покш мельспарокс. Якинь тов аволь чавонь кедть. Ускинь мартон эрзянь велестэ тантей казнеть: колмо каймакт – вейкесь Андрей Малаховнень, омбоцесь – Валерий Семин баянистэнтень, колмоцесь – Тимур Ведерников гитаристэнтень. Студиясо максомс казнеть меревсь ансяк Малаховнень. Теде башка, «Норовава» ансамблянь аватне путсть казнекс чевгень пряка, салтозь пангот ды тувонь сала. Ольга Серафимовна тейсь метрань сэрьсэ эрзянь няка».
Программась анокставсь Горький лемсэ киностудиясонть ды мольсь колмо пель марто часонь перть. Весе масторонок келес пурнавозь од таланттнэ евтнесть эсест ланга ды содавикс моротнень теевемадост. Студиясо инжетне Николай Старкинэнь кевкстнесть, мекс эстензэ сон кочкизе гармониянть? «Койсэнь, сон невти кезэрень пингенть оймензэ. Эйсэнзэ налксесь сыре покштямгак. Секскак мон арсинь поладомс кудораськень коенть», – мерсь эрзянь церась. Миненек Николай толковизе, аванзо ендо Михаил Ишаев сыре покштязо ютызе Ине Отечественной войнантькак, косо ульнесь танкистэкс.
Николай чачсь-кассь Кочкурбуесэ. Тетязо важоди полициясо, авазо – медсестра. Церась евты покш сюкпря тетянзо-аванзо туртов, конат максызь сонзэ тосонь музыкальной школав. Башка сюкпря евты Анна Алексеевна Брыжинская музыкань коряс тонавтыцянзо туртов, кона панжизе церыненть эйсэ раськень моронь морсицянь ерокчинть…
«Ледстяса, зярдо тень ульнесь 11 ие, лездынь сэтьмечинь ванстыцятненень муемс вейке аванть велосипедэнзэ салыцянть. Тень кисэ 2018 иестэ «Горячее сердце» весероссиянь общественно-государственной инициативань фондонть пельде монень максозель медаль. Кисэнзэ тердтнимизь Московов, ансяк тов пачкодемс эзь лисе, секскак сонзэ кучизь районов. Теде башка, максокшность оймсемга путевка Раужо иневедь чирень «Орленок» лагерев».
2021 иестэ 9-це классонть прядомадо мейле Николай апак кавтолдо кочкизе эсь кинзэ – кармась тонавтнеме Н.П. Огарев лемсэ МГУ-нь ИНК-нь СПО-нь отделениясо «Сольное и хоровое народное пение» специальностенть коряс. Теке шкастонть Н.Старкин кенерсь невтеме эсь прянзо республикань истят фестивальтнесэ, кода «Шумбрат, Мордовия!» ды «Играй, гармонь!» пелькстамонь фестивальтнесэ, косо свал лиснесь лауреатокс; «Раськень Озкс» ды «Акша келу» покшчитнесэ. Мелят Николай изнясь «Живая классика» весероссиянь пелькстамосонть. Тедеде тонавтнеманзо прядызе ды ней 19 иесэ церась аноксты туеме армияв.
Николай важоди Кочкурбуень культурань центрасо культорганизаторокс. Ули «Барыня» киштемань эсензэ коллективезэ, косо киштить мазый ды ероков кемень тейтерькат. Сонсь церась пек вечки морсеме эрзянь раськень морот.
Тунда Николаень ютась колмоце сольной концертэзэ, ков сакшность Кочкурбуень ламо ломанть, ульнесь Светлана Герасимова райононь прявтоськак.
Н. Старкинэнь паро ялгазо – эрзянь содавикс морыцясь, МР-нь заслуженной артистэсь Андрей Бочканов. Церась морси «Мастор» ды «Вай, кодамо» сонзэ моротнень. Истя жо Артем Мамаевень «Велев молян мон» моронзо, конань ютавтомс эрзякс лездась Александр Данильчев.
Армиядо мейле Николай арси заочна поладомс тонавтнеманзо ды седе товгак важодемс тиринь культурасо, косо зярс ули мезе ёвтамс од ломантненень: «Монень вечкеви Мордовиянь культурась. Ульнинь татаронь Сабантуйсэ, мокшонь Зубова-Полянасо… Весе раськетнень культураст пек мельстуиця ды сынь тесэ эрить покш ялгаксчисэ. Эсенек Кочкурбуень культурадо седе домкасто карминь содамо ИНК-со тонавтнемстэ. Натой абунгадынь, зяро эстень панжинь од! Теде икеле тень марявсь, содан ламо… Ней ули мелем кезэрень моротнень морамс од лувсо, арсян, те туи ломантнень мельс».
Николайнень арсетяно од изнявкст ды весе мельтнень-бажамотнень топавтома!
Марина Агафонова