Неть читнестэ минь вастневинек вейке кудораське марто, косо эйкакшонь трямось – сехте эрявикс тев. Покш кудораськесь – те свал покш кеняркс, ламо мелявкстнэнь лангс апак вано. Эдь шкась ды эрямось чудить кода лей, зярдояк апак лотксе. Секскак трямс-кастомс эйкакшт, ваномс касомаст-виевгадомаст, сынст изнявксост лангс, те кода экшелямс кенярксчисэ ды уцяскасо.
Истят уцяскавокс ловить эсь пряст Александр Иванович ды Татьяна Ивановна (тейтерькс – Уланова) Тюрькинтнэ. Сынст семиясо касыть вете эйкакшт! Истямось неень шкасто аволь истя сеедьстэ вастневи.
Татьяна Ивановна ды Александр Иванович чачсть Покш Березникбуень Парынзэлесэ. Вечкемась ютксост кирвазсь школасо тонавтнемстэ саезь. Техникумонь прядомадо мейле Александр тердезель служамо армияв. Татьяна тонавтнесь Н.П. Огарев лемсэ МГУ-нь филологиянь факультетсэ. Зярдо тейтересь прядыль ветеце курс, од ломантне урьвакстсть. Тешкстасынек, школанзо Татьяна прядызе сиянь медаль марто, а вана университетэнть – якстере диплом марто. Аламо шкань ютазь мельга-мельцек чачсть тейтерест Анастасия, Екатерина ды Виктория. Васня ветенест эрясть общежитиянь нупальсэ, косо ансяк 17 кавонзазь метрат. Александр важодсь механизаторокс, Татьяна – эйдень кужосо воспитателекс. 2013 иестэ семиянтень ипотека вельде макссть колмо нупальсэ квартира. 2017 иестэ чачсь нилеце тейтерест Ульяна. Тесэ мирдть-нить евтыть покш сюкпря государствантень, конась лездась целанек пандомс ипотеканть. Ды вана а умок, 2023 иестэ, чачсь истя кувать учовикс церынест – Владислав!
Неень шкасто Александр Иванович важоди килангонь теемань «СТДС» ООО-со, конань Татьяна пейдезь лемди «Ошонь паролгавтомань организациякс». Сонсь Татьяна, чарькодеви, зярс декретсэ.
Колмонест тейтертне мельга-мельцек прядызь Саранскоень 11-це № школанть. Настя тусь тонавтнеме техникумов 9-це классонть прядомадо мейле, Вика ды Катя жо 10-11 класстнэсэ якасть ГИБДД-нь кадетэнь классос. Маень 9-це чинь парадсонть, Ине Изнямонь 80 иетнень тешкстамсто, 11-це № школанть пельде Виктория ютась кадетэнь отрядонть марто. Истя жо Виктория ды Ульяна маень 23-це чистэ, школань линейкасо, меельцеде гайневтизь баягиненть. Тедеде Анастасия уш прядызе политехнической техникумонть ды важоди «поварское и кондитерское дело» специальностенть коряс. Екатерина – историко-социологической институтонь 2-це курсонь студентка. Виктория ансяк прядызе школанзо, абитуриент. Ульяна прядсь 1-це класс, а вана Владислав ансяк ушоды якамо эйдень кужов.
Мезесь пек кецявты, семиясонть свал гайги эрзянь келесь. Тетятне-аватне кавонест эрзянь ломанть ды тонавтыть эйзэнзэ весе эйкакштненьгак. Вана кода теде корты Татьяна Ивановна:
– Эрзянь келенть эйкакштне марить свал. Минь мирдем марто эсь юткованок кортнетяно тиринь кельсэ. Колмонест покш тейтеренек аволь ансяк чарькодить, кортытькак эрзякс. Ульяна зярс ансяк тонавтни ды уш нейке соды ламо валт.
Сынст семиясь покш пример сеть эрзятнень туртов, конат виздить ды безардить тиринь кельдест натой велесэ эрязьгак. А тесэ вана ошонь эрицят вечксызь ды тонавтыть эрзякс кортамо эсест эйкакшосткак.
Оймсема читнестэ ялгаксчисэ эриця кудораськесь вечки вейсэ шкань ютавтомо.
– Вечктяно вейсэ оймсеме вирьсэ, лей чиресэ, сеедьстэ якатано ошонь парков. Кармась паро коекс тешкстамс весе покшчитнень семиянек. Од иестэ мазылгавттано квартиранок, аравттано куз, анокстатано эсь кедьсэ теезь казнеть. Тень теить весе, натой покштнеяк. Чачома чинь тешкстыцянть туртов пантяно-пидетяно торт ды анокстатано мельстуиця ды мизолксов фотография марто стенгазета. Зяро тень пингстэ эрьвась мари кеняркс ды пейдемат! Неть шкатнестэ сы мель – вана мезень кис эряви эрямс! Эйкакшонь валдо мизолксто паро мезеяк арась, – мельспаросо тешксты кудазоравась.
Теке марто Татьяна Ивановна покш каштанчисэ ашти эрьванть кувалма: эйкакштнень улить изнявксост шкинемасо ды тонавтнемасо. Саемга, школасо тонавтнемстэ Вика ды Катя якасть «Синега» киштемань коллективс. Сынь ламоксть ульнесть гастрольсэ истят оштнесэ, кода: Санкт-Петербург, Казань, Ульяновск. Ламоксть казезельть грамотасо ды медальсэ. Истя жо сынь изницят историянь ды обществознаниянь коряс региональной олимпиадатнесэ.
Тюрькинтнэнь кудораськенть прявт мелезэ – эрямс покш кудосо. Эдь сисем ломантнень туртов колмо нупальс квартирась – те пек вишкине. Теде башка, эйкакштнень улить эсест мелест – неемс мирэнть-масторонть, муемс вадря важодема таркат, кармамс тонавтнеме кочказь вузсо… Ды натой трямс кискалевкс. Арсетяно тенст весе мельтнень-бажамотнень куроксто топавтома!
Тедеде топодсть 20 иеть, кода Татьяна ды Александр вейсэть свадьбань чистэст саезь! Арсетяно ояксчисэ эриця кудораськентень певтеме шумбрачи, ламо вийть ды ламо кенярксов изнявкст! Эдь зярдо семиясо ули вейке-вейкень чарькодема ды вечкема, кодаткак стакачить а тандавтыть, мекевлангт, эрьвась соды, вакссонзо улить тиринь ломанть, конат свал кармить лездамо икелев молемасонть!
Марина Агафонова
Фототне саезь Тюрькинтнэнь
семиянь архивстэ.