Вторник, марта 19, 2024
Важное

Аволь умок Отечествань ванстыцянь кенярксчинть каршо Мордовиясо мотокроссонь пелькстамотнень вечкицятненень (а сынст ютксо седе ламо цёрат) теезель алкуксонь казне. Рузаевкань буесэ путозь ушодкс минек республикасо те спортонть вельмевтемантень. Ютазь иестэ теке жо таркасонть ломантне васенцеде пурнавкшность (ламо шкань ютазь) истямо ламонь туртов вечкевикс спортсонть виест варчамо, ёрокчист невтеме.



Тедеде, телень пек якшамо чинть лангс апак вано, пелькстыцятнень ютксо ульнесть аволь ансяк Мордовиянь, истя жо Пенза, Тамбов, Самара, Рязань ёнкстнэнь мотогонщиктне. Ютазь недлясто жо Саранскоень эрицятнеяк мельспаросо ванызь спидвеень турнирэнть, конась ютась «Мегастрой» гипермаркетэнть вакссо.

Тешкстасынек, Мордовиясо умок уш кортыть мотогонкань спортонть вельмевтемадо. «Сэредицятнень» ютксто ламотненень эштё эзть стувтово те спортсонть изницятнень лемест, те шкас ледстнить аволь ансяк республикасо содавикс, истя жо масторонь келескак, спидвеень комментаторонть Владимир Шорчевень. Течи Владимир Константинович минек редакциянь инже.

– Владимир Константинович, ледстинк, инескеть, зярдо ды кода Мордовиясо ушодовсь эень спидвеесь?

– Тешкстасынек, тедеде топодить 70 иеть се шкастонть, кода республикасо ютавтозель васенце мотокроссось. Умонь 1951 иестэ пелькстасть 58 ардтницят (гонщикть). Неть пелькстамотнень васенце пурныцяст ды ютавтыцяст – Саранскоень автомотоклубось. Те тевсэнть покш путовксозо сонзэ прявтонть Михаил Урюпинэнь. Шкань ютазь мотоэстафетатне тусть ламонь мельс ды кармасть ютавтовомо истят маршруттнэнь коряс, кода Саранск – Рузаевка – Болдово – Инсар – Ковылкина – Рыбкина – Краснослободск – Ташто Шайгова – Саранск.
Мордовиясо анокставсть алкуксонь спортсмент, кить якасть ёрокчист невтеме весесоюзонь турниртнэс. Мордовиянть пельде неть пелькстамотнес кучозельть: Анатолий Тюрин, Валерий Сыркин, Борис Полдомасов, Геннадий Корочков, Александр Зуйков ды ламот лият. Мотогонкань коряс официальной пелькстамотне Саранскоень эенть лангсо ушодовсть 1959 иестэ, ульнесть кода республикань, истя масторонь пелькстамот.

– Владимир Константинович, кода тынь сыде спортонь комментаторонь тевентень, мейстэ ушодыде?

– 1990 иестэ мон ульнинь «Электровыпрямитель» стадиононь прявтокс. Свал яксинь «Светотехника» футболонь команданть кисэ «сэредеме», сестэ сынь лемдевсть «Спартакокс».

Ледстяса, спидвеень коряс пелькстамотне алтавкшность стратонавттнэнь ине тевест ледстнематненень. Сынст ушодовомадост икеле монень пшкадсь ДОСААФ-нь Мордовиянь отделениянь прявтонь полавтыцясь ды мерсь топавтомс комментаторонь тевенть. Виде, икеле истямо опытэм арасель, шкань ютазь тонадынь важодеме микрофон марто ды пачтямо ваныцятненень весемеде, мезе ульнесь эенть лангсо.
Вейксэньгеменце иетнестэ минек республикань, кода весе масторонь ломантне, печтясть покш стакачить. Аволь весе семиятнесэ ульнесь сатышка ярсамопель, оршамопель. Ломантнень чачостост ёмакшность мизолкстнэ, сынь лотксесть якамо театрав, кинов… А вана спидвеень пелькстамотнес, кода Мордовиясо ютавтовсть масторлангонь ды Европань чемпионаттнэнь этаптне, ваномо сыльть семиянек.

1991 иестэ пелькстамотнень анокстамсто вастневсть ламо стакачить. Саранскойсэ ютавтовсть васенцеде, ялатеке сынь изнявсть, ды кавто иень ютазь Мордовиясо ютавтозель масторлангонь чемпионатось. Теде мейле ютавтовсь масторлангонь чемпионатось, финалонь четвертесь. Сестэ изницякс лиссь Уссурийск ошсто Владимир Фадеев.

– Владимир Константинович, минек республикань од ломантненень эрявить ледстямс сеть изницятнень лемест, кить сестэ ульнесть «тештекс», кинь ёнов арсесть молемс од цёратне.

– Виде, аволь весемесь ютась валанясто республикань спортсментнэнь туртов. Куш эрьва кодат пелькстамотнень минь поладынек ютавтомо, эсенектне а свал ульнесть ардтницятнень ютксо. Се шкане покш лезкс макссь «Светотехника» мотоклубось, мейле сон лемдевсь «Мордовия». Сон пурназель 1995 иестэ «Лисма» акционерной обществанть юрсо.
Течи, а мезть сёпомс, республиканть кисэ «гонщикть» тердезельть Мордовиянь томбальдеяк. Истя, Усть-Илимскойстэ Максим Барабошкин. Те виев спортсменэсь теевсь масторлангонь чемпионокс. Зярдо сон тусь минек кедьстэ, тарказонзо сась Александр Московка. Те шкас эштё эзь стувтово 1997 иень кенярксчись, зярдо сон васенцеде минек республиканть туртов изнясь Россиянь командань чемпионатонь сиянь медальть.

Мордовиянь спидвеень коряс «сэредицятне» парсте содасызь Кирилл Дрогалинэнь лементь, кие изнясь масторлангонь чемпионатсо, кода командань зачётсо, истя ськамонзояк. Теде мейле республиканть пельде пелькстамотнесэ виест ды ёрокчист невтемс сайсть мель истят содавикс спортсментнэ, кода: Владимир Фадеев, Юрий Поликарпов, Владимир Лумпов.

Кодамо покш каштанчи Мордовиянь эрицятнень саинзе, зярдо «Мордовия» мотоклубось кавксть лиснесь масторлангонь чемпионокс командной зачётсо ды весть – вице-чемпионокс.

Содавикс мотогонщиктнень лангс ванозь, тетяст-леляст марто неть пелькстамотнес якиця эйкакштне сайсть мель тонадомс ды невтемс пряст те а шожда спортсонть. Истятнэнь ютксо ульнесть эсенек республикасо кастозь-тонавтозь: Юнир Базеев, Максим Захаров, Андрей Гаврилкин (кулось), лелят-ялакст Василий ды Евгений Косовтне.

– Сеедьстэ-аволь Тенк савкшнось улемс комментаторокс пелькстамотнесэ?

– Вейксэньгеменце иетнестэ саезь «Светотехникасо» ютавтозельть масторлангонь чемпионатонь финальной этапонь кочказь (отборочной) вете пелькстамот, масторлангонь Гран-принь кевейкее этап ды финалт, масторлангонь командань чемпионатонь вейке отбор ды кавто финалт, Европань чемпионатонь личной зачётсо кавто отборт ды колмо финалт, од ломантнень ютксо Европань первенствань личной вейке финалось, Мордовия Республикань Прявтонть призэнзэ лангс раськеютконь кемнилее пелькстамот, «Лисма» акционерной обществанть призэнзэ лангс ниле турнирт, Россиянь ды Италиянь командатнень раськеютконь вейке вастовома.

1999-2000 иетнестэ Саранскойсэ ютавтозельть ниленьгеменде ламо покш пелькстамот. Эйстэст ламотнесэ прась тень уцяска улемс ветицякс, ваныцятненень ардтнематнеде ёвтницякс. Телезэнзэ ютавтозельть ардтнемань ветеде ламо пелькстамот.

– Владимир Константинович, вановтонк коряс, ули кемема: Мордовиясо вельмевтеви спидвеесь ды од спортсментнэ явить мель эй ланга ардтнемантень.

– Видьстэ ёвтан, тень теемс карми а шожда. Ансяк, бути те тевентень кундамс алкукс, ламось изняви. Пек кенярдовтымим Мордовия Республикань Прявтонь тевтнень топавтыцясь Артём Здунов, кие башка мель явсь минек республикасо те спортонть вельмевтемантень. Кеман, сонзэ сатыть виензэ ды муеви шказо лездамс велявтомс Мордовиянть туртов пек вечкевикс спортонть, кастомс ды тонавтомс од «тештеть», конат изнямосост теевить содавиксэкс аволь ансяк минек республикасо, истя жо масторлангонь келескак.

Валентина Юдина
фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».