Пятница, марта 29, 2024
Важное

Покш Березникень муниципальной райононь Вейсэ посёлкань эрицятне аштить покш каштанчисэ сынст ёнкссо чачозенть-касозенть, самбонь коряс масторлангонь содавикс спортсменэнть ды тренерэнть, СССР-нь спортонь мастерэнть Михаил Андреевич Аношкинэнь кувалма. Комськотово иень перть эрьва иень эйзюрковсто Самара (икеле Куйбышев) ошсо сонзэ валдо лемензэ ледстнемга ютавтневить панжадо турнирт.



Те эрзянь цёрась, самбонь коряс ламоксть чемпионось, РСФСР-нь чемпионатонь призёрось, полутяжёлой сталмосо СССР-нь чемпионатонь бронзань призёрось профессиональной спортсто туемадо мейле теевсь алкуксонь тренерэкс, кона кастсь масторлангонь ламо содавикс спортсмент.

Эрьва ломаненть обуцянзо кемекстамосо, сонзэ эрямо кинть муемасо, виевчитнень пурнамосо покш путовксост аволь ансяк тетятнень-аватнень, истя жо лелятнень-сазортнэнь, покштятнень-бабатнень. Тень мельсэ кирдезь, течи минь снартнинек ловныцятненень пачтямс седе, кить ульнесть Михаил Андреевичень малавиксэнзэ, косто сон амольдясь истянь зняро вийть. Кода сон, вишка посёлкасо чачозесь-касозесь, теевсь истямо покш ломанекс, кинь лемензэ куломадо мейлеяк а стувтыть аволь ансяк малавиксэнзэ, истя жо сетнень эйкакшост, нуцькаст, кинь сон тонавтынзе самбонь спортонть вечкеме ды покш пелькстамотнесэ изнямо.

Раськедензэ

Тетязо-авазо, Андрей Фёдорович ды Екатерина Николаевна, масторонь келес ютавтовиця коллективизациянь иетнестэ васенцетнень ютксольть, кить сыргасть Покш Березникень райононь Шугурова велестэ од таркас – Вейсэ посёлкав эрямо. Неень шкане миненек а содавикст сеть стакачитне, конатнень цидярдызь чаво таркас сыцятне, косо арасельть а кудот, а кардазт. Нурька шкас теезь эрямо таркатнесэ киякстнэнь таркас ульнесь мода. Минек покштятнень-бабатнень ледстнематнень коряс, сехте стакаль васенце телесь. Тень лангс апак вано, тундонь васенце видеманть ютавтызь парсте ды шкастонзо.
Нужачинть лангс апак вано, Аношкинтнэнь семиясо чачокшность кемень эйкакшт, нилетне кулость овсе вишкинестэ. Шугуровасто од таркас эрямо сынь састь Софья тейтерест (1915-1997), Алексей (1918-1974), Константин (1920-1995) цёраст марто. Эштё колмо эйкакштне – Анастасия (1930-2008), Пётр (1933-2015), Михаил (1938-1992) – чачсть Вейсэ посёлкасо.

Кода уш вере ледстинек, семиясь тусь эрямо од таркав. Васенце цёраст Алексей Андреевичень кеменьшка иесэ саизь эрямо Вейсэ посёлкав. Школанть прядомадо мейле тонавтнесь Киев ошонь артиллерийской училищасо.

Ине Отечественной войнанть ушодовомсто, 1941 иень июнень 22-це чистэ саезь 1945 иень апрельс, фронтсоль. Васня ульнесь батареянь командирэкс, мейле – дивизиянь командирэнь полавтыцякс. Войнанть прядовомадо мейле тонавтнесь ПВО-нь Высшей школасо.
Сэтьме шкастонтькак эрямонзо алтызе масторонть ятнэде ванстомантень, ульнесь полковой школань прявтокс, полконь командирэкс. 1965 иень умарьковсто тусь пенсияв. Кулось 1974 иень аштемковсто, калмазь Запорожьяс.

Омбоце цёраст, Константин Андреевич, 1937 иестэ ушодокшнось тонавтнеме Мордовской педагогической институтсо. Иень ютазь, васенце курсто мейле, саизь армияв. Сонензэ прась уцяска 1940 иестэ тонавтнемс Харьков ошсо лётчикень высшей военной училищасо. Сонзэ прядомадо мейле, 1942 иестэ, ильтязель фронтов, действующей армияв.
Эрзянь цёрась Константин Аношкин войнасо кавксть ранязель, сон пачкодсь Берлинс. Ине Изнямонь чиденть мейле советской войскатнень группасо служась васня Германиясо, мейле – Белоруссиясо, Австриясо, Западной Украинасо, Дальней Востоксо – ракетной войскатнесэ. Отставкас тусь 1966 иестэ подполковникень званиясо. Седе тов эрясь ды важодсь Запорожьясо. Кулось 75 иесэ 1995 иень чадыковонь 5-це чистэ.

Пётр Андреевич Аношкин семиясост ветеце эйкакшоль. Сон чачсь 1933 иень панжиковонь 29-це чистэ. Войнань ушодовома шкастонть сонензэ ульнесть ансяк кавксо иеть. Секс вишка пингстэ саезь уш несь покш стакачить ды печтясь вачо пеке. Кавксо иесэ цёрынесь кадовсь семиясо сехте покшокс, зярдо тетязо, Андрей Фёдорович, ды кавонест лелянзо, Алексей ды Константин, тусть фронтов. Виде, се шкань Вейсэ посёлкань малав весе шумбра цёратнень саекшнизь войнав, секс колхозонь нежекс ульнесть истят цёрынетне, кода Пётр Аношкин ды ламо лиятнеяк. Авазо валскень зорят стявтылизе ды ильтясь эйсэнзэ вейсэнь тевтнень топавтомо, седе сеедьстэ паксясо важодицятненень букасо ведь яла пачтясь ды ламо лия тевть топавтсь.

Васня Вейсэ посёлкань школасо, мейле Шугуровасояк сон тонавтнесь ансяк «ветес». Неть кавто велетнень ютксо ниле вайгельпеть. Школасто кудов ютамсто весе уроконзо тонавтнилинзе.

Школанть прядомадо мейле колмо иеть служась армиясо. Тосто самодо мейле урьвакстсь, никс саизе теке ёнксонь Симкина велень Мария Тетюшкинань. Малав кодгемень иеть вейсэ эрясть, трясть-кастсть ниле эйкакшт, весень тонавтневтизь ды стявтызь пильге лангс.

Пётр Андреевич Вейсэ посёлкасо ульнесь бригадирэкс, мейле Госагыр велесэ парторгокс. 1966 иестэ кучозель важодеме Пермезь велев «50 лет Октября» колхозонь прявтокс. Те сонзэ ушодксонзо коряс тосо полавтызь колхозниктнень трудост кисэ пандоманть, трудочитнень, кода мерсть тенст, палкинетнень, таркас кармасть пандомо ярмакт.
Пермезь велесэ те шкас эйсэнзэ ледстнить, кода чевте седей, паронь арсиця ломаненть.

Аношкинтнэнь веженсь эйкакшост, Михаил Андреевич, чачсь войнадо икелень стака иетнестэ. Вейсэ посёлкань эрицятнень ледстнемаст коряс, сон вишка пингстэ вечкилизе спортонть, свал перьканзо пурнавкшность седе вишкинетне, кинь марто сон седейшкава ютавтсь пелькстамот.
Од цёрынекс сон тусь тиринь велестэ Уралонь Краснотурьинск ошов ремесленной училищасо тонавтнеме. Тостояк мусь эстензэ вечкевикс тев, варчнесь виензэ классикань бороцямосо. Шкань ютазь, 1961 иестэ, сон тусь сестэ эштё Куйбышев ошов, ней лемдеви Самаракс, косо поладызе спортонть.

Важодеме кармась В.И. Ленин лемсэ металлургической заводонь литейной цехсэ каштомотнень витнемань коряс слесарекс.
Михаил Андреевич, стака важодеманть лангс апак вано, свал мукшнось шка вечкевикс спортонтень.

Кодгеменце иетнестэ, СССР-нь спортонь мастерэнть А.П. Усовонь превс путомадонзо мейле, сон мольсь РСФСР-нь заслуженной тренерэнть И.П. Песоцкойнень самбонь коряс бороцямонь секцияс. Кавто иень ютазь Михаил Аношкин топавтызе самбонь коряс СССР-нь спортонь мастерэнь нормативенть. Сон ульнесь «Труд» ды «Зенит» ДСО-нь сисемксть чемпионокс, СССР-нь чемпионатонь бронзань призёрокс.

Иетнень ютазь Михаил Андреевич кармась арсеме одтнэнень содамочитнень максомадо. Москов ало прядсь тренерэнь школа ды ушодсь «Металл» СК-со одтнэнь марто занятиянь ютавтомо.
Весе шканть перть сон анокстась спортонь кемготово мастерт. Ютксост улить чемпионт ды СССР-нь ды Россиянь первенствань призёрт. Неть содавикс спортсментнэ: В. Башев, А. Жидков, С. Задворных, А. Солодкий, В. Набоков, В. Коржиманов, В. Дудкин, А. Полященко, А. Земсков, масторлангонь кубоконь саицясь А. Саяпин.

Михаил Андреевич свал бажась самс тиринь Мордовияв, Вейсэ посёлкав малавиксэнзэ содавтомо. Кизэнь шкасто лездась раськетненень тикшень, пенгень анокстамсто. Теде башка, бажась Вейсэ посёлкань цёрынетнень тонавтомс спортонь а шожда тевентень. Сыредезь, пек янксесь: аламо шка ютавтсь алкуксонь спортсменэкс сынст анокстамонтень.

Мезесь пек кенярдовты, Самара ошсо сонзэ тевесь те шкас поладови, лемензэ ледстнемга эрьва иестэ ютавтневить пелькстамот.
Неть пелькстамотне васня ульнесть Самара ёнксонь, мейле теевсть весероссиянь ды мик раськеютконь. Тенень ушодкс путсь Михаил Аношкинэнь тонавтницязо, ней Самара ёнксонь Самбонь коряс федерациянь вице-президентэсь Александр Коновалов.

Ютазь иень чадыковсто Самара ёнкссо ютавтовсь «От народных игр – к Олимпийским победам» «кругловой столь», конась истя жо алтавсь самбонь коряс тренерэнтень Михаил Аношкиннэнь. Мордовиясто тов якасть «Тюштя» финнэнь-угрань налксематнень вельмевтемань клубонь прявтось Павел Мигунов ды содавикс спортсменэнть малавиксэзэ Галина Житина.

Улевель бу пек паро, бути масторлангонь келес содавикс спортсменэнть лемс минек республикасояк ютавтовольть пелькстамот, эли куш кучовольть эрзя-мокшонь цёрынетнень Самарав виест варчамо, минек ёнкссо чачозенть лемензэ ледстямо. Кемеви, те мелесь топавтови, а виев спортсменэнть лемензэ кармить парсте содамо чачома таркасояк.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».