Пятница, февраля 03, 2023
Важное

Мордовиянь  СМИ-тнесэ важодицятне  тешкстызь  кенярксчист

Россиянь Печатень чинтень Республикань Кудосо ютавтовсь торжественной промкс. Региононь СМИ-тнесэ важодицятненень поздоровт ёвтась Мордовия Республикань Прявтось Артём Здунов. Коень коряс СМИ-тнень сехте вадря важодицятне тешкставсть покш казнесэ. Истя жо ёвтавсть журналистэнь конкурстнэнь изницятне. «Эрзянь правда» газетань редакциясь ды культурань отделэнь прявтось Юлия Еремина изнясть «ИнтоНАЦИЯ» номинациясонть. Минек – I-це тарка!

Январень 13-це чистэ Республикань Кудонь Покш залсонть ютавтовсь торжественной промкс, конась алтавсь Россиянь Печатень чинтень. Мордовиянь Прявтось Артём Здунов поздоровт ёвтась эрьва кодамо профессиянь ломантненень, конатнень вейсэнди те кенярксчись. Неть журналистт, редакторт, издательть, полиграфистт – весе, кить эсь важодемаст вельде теить кулянь вейкине пространстванть, кемекстыть общественной повестканть, лездыть ломантненень марямс каршо валт сехте талновтыця кевкстематнень лангс. Истя жо региононь Прявтось тешкстызе СМИ-тнень эрявиксчист обществанть эрямосо ды кемекстызе, журналисттнэнь профессиональной важодемаст лезды властентень эрязасто редямс ды витемс пшти кевкстематнень, лезды республиканть касомасо-виензамосо.

Республикань Прявтось тешкстызе: СМИ-тнень виде важодемась пек эрявикс, седеяк пек ней, зярдо минек масторонть лангс валови ламо рудаз. Эряви тень а нолдамс, нежедемс официальной источниктнестэ молиця кулятнень лангс. Эряви редямс фейктнень ды аволь виде кулятнень.

СМИ-тнень течинь репортажтнесэ ды публикациятнесэ покш тарка саи специальной военной операциясь. «Тосо тюрить минек цёратне, тынк марто вейсэ минь явтано тенст весеме ёндонь лезкс. Сыненст эряви, штобу теде кортавольть ды кортавольть лембестэ. Истямо лезксэсь сыненст пек эряви, – мерсь Артём Здунов. – Течи журналистэнь пелькстамотнень цётамотнень лувсо казнеть явшевить терроризмань ды экстремизмань а нолдамонь тевтнень ды патриотической воспитаниянь кевкстематнень сехте вадрясто невтеманть кис номинациятнесэ. Тынк вельде ёвтан сюкпря республикань ды райононь весе СМИ-тненень профессионализманть ды социальной покш ответственностенть кисэ. 2023 иенть Российской Федерациянь Президентэсь Владимир Владимирович Путин яволявтызе Педагогонь ды наставникень иекс. Те токши минек СМИ-тненьгак. Меревлинь бу тыненк явомс покш мель од ломантненень, од ломанень медиацентратненень ды весемесэ лездамс тенст. Эряви кастомс эйкакштнень профессионалокс. Ков седе ламо медиацентрат кармить, тов седе вадря карми. Мельспаро, сынь теевить республикань районтнэсэ, истя жо сынст вельде карман содамо, мезе тосо моли. Асатыкстнэнь невтемась лезды тенек касомс. Секскак эряви вечкемс минек од ломантнень, тесэ вешан тынк профессиональной лезксэнть».

Мордовиянь Прявтось ёвтась поздоровт СМИ-тнень представительтненень грантонь ды проектэнь тевтеемасо изнявкстнэнь кис. Культурань инициативатнень Президентэнь фондонть лезксэнзэ вельде «Народное телевидение Мордовии» каналось нолдась «Всегда вместе» документальной фильма – минек республиканть ды Донбассонть ютксо историянь ялгаксчиденть. Президентэнь гранттнэнь фондонь ярмактнень лангс топавтозь НТМ-нь «Герои среди нас» ды «Рузаевские новости» редакциянь «Медиаволонтёры» проекттнэ. Теньгушевань райононь «Примокшанье» газетась изнясь Интернетэнь виевгавтомань институтонь грант «Герои нашего села» проектэнть тевс совавтомга. Тедедень изницятнень ютксо истя жо «Рузаевские новости» социально-ориентированной НКО-тненень информационной лезксэнь проектэнть марто ды Орданьбуень «Маяк» газетань редакциясь.

«Ёвтаса, аволь весть уш весероссиянь пелькстамотнесэ покш казнесэ тешкстазельть республикань «Эрзянь правда», «Известия Мордовии» газетатне, «Мордовия» ГТРК-сь. Те ёнкссонть важодеманть поладома, изнявкстнэнь лангс а лоткама», – кемекстызе Мордовиянь Прявтось.

Тешкстазель, те иесь Мордовиясо юты раськетнень вейсэндявомань тешксэнть ало. Прявт тевекс кармить «Молодёжь в этнокультурном пространстве» финнэнь-угрань раськетнень весероссиянь омбоце форумось ды «Мы вместе» Раськетнень культуратнень весероссиянь од ломанень фестивалесь. Секскак, вадрясто невтема анокстамонтькак, мероприятиятнень ютавтомантькак.

«Минек вийсэ – редявиксстэ ды лия ёнов а молицякс невтемс Мордовиянть. Прявт тевенек – региононть вадря ёндо неевлизь туристтнэ ды инвестортнэ, те кандозо башка ярмакт республикантень ды лездазо социальной эрямонтень. Ней эрятано минек масторонь вейкине повесткасо: тенек эряви изнямо, цёратне велявтовольть живстэ ды шумбрасто», – мерсь Артём Здунов.

Торжественной промкссонть коень коряс явшевсть государственной казнеть ды ёвтазельть Мордовия Республикань Прявтонь журналистэнь пелькстамотнень изницятне. «Эрзянь правда» газетась казевсь Лауреатонь I-це степенень дипломсо «ИнтоНАЦИЯ» пелькстамосонть. Покш поздоровт истя жо ёвтатано коллегатненень: «Мордовия» ГТРК-нь «Сияжар» раськень куронь корреспондентэнтень Екатерина Евстигнееванень, кона кармась васенцекс «Россиянь раськетнень культурань сюпавчитнень ванстомань» конкурссонть, I-це степенень диплом «ИнтоНАЦИЯ» пелькстамосонть изнясь «Вайгель» радионь прявтось Светлана Пивкина, терроризмань ды экстремизмань а нолдамонь тевтнеде сёрмадоманть кисэ III-це степенень дипломсо тешкставсь «Эрзянь мастор» газетань прявт редакторось Татьяна Ларина, Мордовия Республикань социально-экономической касомань-виевгавтомань кевкстематнеде ёвтнеманть кисэ III-це степенень дипломсо казевсь Орданьбуень «Маяк» районной газетань общественной эрямонь отделэнь прявтось Лариса Макаркина ды лиятне. Теке марто «Мордовия» ГТРК-нь «Сияжар» раськень куронь прявтонтень Ольга Чернованень максозь «МР-нь СМИ-нь заслуженной важодиця» покш лемесь. Теке жо почётонь лемсэнть казевсь «Мокша» журналонь ответственной секретаресь Татьяна Сенькина. «Мордовия» ГТРК-нь информационной программатнень службань прявтонь полавтыцянтень Дмитрий Божедаровнень максовсь «Российской Федерациянь заслуженной журналист» лемесь. А вана «Лауреат литературной премии Главы Республики Мордовия для молодых авторов» лемесь максозь эрзянь кельсэ од сёрмадыцянтень, Н.П. Огарёв лемсэ МГУ-нь филологиянь факультетэнь тонавтницянтень Анна Калинкинанень.

«Эрзянь правда» газетань важодицятне ёвтыть весе изницятненень поздоровт, «пшти» пера ды седе ламо од сёрмадовкст!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».