Вторник, марта 19, 2024
Важное
 
 
Якшамковонь 17-це чистэ Республикань Кудосо ютавтовсь кенярксчинь промкс, кона алтазель Россиянь Печатень чинтень.
Мордовиянь Прявтось Владимир Волков казинзе республикань журналисттнэнь, од сёрмадейтнень. Казезтнень ютксо эрзянь мазый тейтересь Алеся Клементьева. Сон кармась Мордовия Республикань Прявтонть од автортнэнь туртов литературань премиянь лауреатокс. Алеся сёрмады ёвтнемат тиринь эрзянь кельсэ, тонавтни Н.П.Огарёв лемсэ МГУ-нь филологиянь факультетэнь 3-це курссо.

Тейтересь чачсь-кассь Орданьбуень Низовка велесэ. Сёрмадомо ушодсь школасо тонавтнемстэ.
– Васняяк сёрмадынь а покшке валморот пертьпелькстэнть, ансяк мейле те тевенть кадыя. Авам редизе шкинемам, энялдсь поладомс те тевенть седе тов, а кадомс, – ледстни Алеся. – Мон кунсолыя сонзэ, ды течинь чис сёрмадан весемеде, мезесь педи седеезэнь. Васенце сёрмадовкстнэстэ саезь ламо мезесь полавтовсь, овсе лиякс карминь ваномо пертьпельксэнть лангс. Ушодынь юмористической ёвтнемань сёрмадомо. Койсэнь, ёвтнематне сынсь лисить пильге алдо, ансяк эрявить видестэ ладямс валтнэнь.

Алесянь ёвтнеманзо алтазь велень ломантненень, пертьпельксэнтень, од пелькстамотненень. Видькстась, ламот ёвтнематнесэ тейтересь невти эсь прянзо, эрямосонзо лисезь куш кодат тевтнень.
Тешкстасынек, ёроков тейтересь невтни ёрокчинзэ университетсэ ютавтовиця эрьва кодат шкинемань конкурстнэсэ. Сайсь васенце таркат истят пелькстамотнесэ, кода «Тебе, любимый МГУ!», «Весна. Любовь. Признание», лиссь изницякс «Я выбираю МГУ» пелькстамосонть ды лиятнесэ. Истя жо Алеся сеедьстэ ардтни студентэнь промкстнэс, форумтнес. Мелят ульнесь Йошкар-Оласо «Богатство финно-угорского народа» форумсонть. 2018 иестэ ульнесь мик Венгриясо, кавто таргоютконь кизэнь тонавтнемасо.

– Республикань Прявтонть Владимир Дмитриевич Волков марто монень савкшнось колмоксть вастовомс покш таркасо. Эрьва вастовомась пек талновтыця. Мордовиянь Прявтось казсь тень медаль школасо парсте тонавтнеманть кисэ, мейле – васенце курссо тонавтнемстэ казевинь ёроков од ломанень премиясо, ней тешкставинь седеяк покш казнесэ – од сёрмадыцянь литературной премиясо. Те казнесь монь туртов питнейдеяк питней, сон максы покштояк покш эскелькс икеле шкантень, конась, арсян, седе товгак ули пештязь тиринь келень вечкемадо, – видькстась Алеся Клементьева.

Ёвтатано тейтерентень поздоровт покш казненть кувалма ды арсетяно од изнявкст сёрмадомань тевсэнть!

Татьяна ИКОННИКОВА
Фотось Э.Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».