Весемесь юты семиясто. Ды лиякс а кода. Тиринь келенть вечкемась, эсь раськень койтнень ды культуранть ванстомась – те весемесь максови эйдентень аванзо ловсо марто. Шкась юты, эйкакшось касы-кепети, пурны превть, кочки мельстуиця профессия. Ды эрямосонзо ушодовить эрявикс ды покш тевтне.
Анастасия Виряскина – минек газетань героинясь, конань ланга ушодтано евтнеме, пек вечксы чачома енксонзо ды тиринь келензэ. Од тейтересь путы ламо вийть эрзянь раськень койтнень-кирдатнень ды культуранть ванстомантень. Сон а сепи, истямо вечкемась ды патриотизмась сонензэ ютась малавиксэнзэ пельде.
Эрзянь ероков тейтересь чачсь-кассь Отяжелень райононь Аловелесэ. Тетянзо-аванзо эрзят, велень ломанть. Тетязо важоди Отяжбуень сывелень комбинатсо, авазо – эйдень кужосо воспитателекс. Анастасиянь ули Валерия вишка сазорказо, сон тонавтни Аловелень средней школасо 10-це классо. Те семиясонть свал гайги эрзянь келесь. Школасо тонавтнемстэ Анастасия ульнесь активисткакс, вейкеяк мероприятия эзь ютне сонтемензэ. Теде башка, школань стенгазетатне, плакаттнэ – весе ульнесть артозь Настянь шожда кедьсэнзэ. Тейтересь вишка шкасто саезь пек вечки морамо. Сон морсесь школань ансамблясо, лиясто ськамонзояк. Те ерокчись ютась сонензэ Светлана Ивановна Рассейкина бабанзо пельде. Авась эрямонзо перть важодсь школасо тонавтыцякс, морсесь «Лисьмапря» велень ансамблясо. Сон соды ламо кезэрень шкань евкст ды морот.
Анастасия ледстни, кода бабазо, чокшне мадемадо икеле, евтниль тензэ евкскеть ды морсиль мазый эрзянь морынеть. Эште вейке бабазо – Галина Федоровна Виряскина, истя жо весе пингензэ алтызе школасо важодемантень. Паряк, тень кувалма од тейтересь школадо мейле кочкизе М. Е. Евсевьев лемсэ МГПУ-нь филологиянь факультетэнть. Неень шкасто сон тонавтни колмоце курссо эрзянь отделениясо. Тонавтнемадонть башка яви мель студентэнь эрьва кодат мероприятиятненень ды пелькстамотненень.
– Мон аволь сеть ломантнень эйстэ, конатне стяко емавтнить шканть. Свал лакан тевсэ. Улить чить, зярдо арась шкам оймсемскак. Ледстнян чинть, зярдо васенцеде сынь тиринь факультетэв. Арсинь, вана ней ушодови студентэнь эрямось. Чопавтян эйзэнзэ прянек-пильгенек. Ды истя лисськак. Тонавтнемань васенце читнестэ минь, студенттнэ, теевинек содавиксэкс тиринь келень ды литературань кафедрань прявтонть Ольга Ивановна Налдеева марто. Тонавтыцясь евтнесь тенек эрзянь-мокшонь онлайн-школадонть, конась ушодызе важодеманзо университетэнть юрсо. Те проектэнть сестэ ансяк нолдызь тевс ды сонзэ топавтомга университетэнь тонавтыцятне вешнесть од, ероков ломанть, конатне кармить ветямо эрзянь, мокшонь ды рузонь кельсэ онлайн-урокт. Мон пельминутаяк эзинь кавтолдо, сеске сермадстыя прям ведущейтнень юткс, – евтни Анастасия.
Ды вана уш колмоце ие сон покш мельсэ топавты те тевенть. Анастасия эрзянь кельсэ неть онлайн-уроктнень вети ривезень костюмсо. Сонзэ коллегазо – Леонид Ильин, ютавты эрзянь материалонть рузкс ды мейле ловны кунсолыцятненень. Неть онлайн-уроктнень анокстыть аволь ансяк кавто ломанть, университетсэ тень лангсо важоди од ломанень цела команда – редакторт, режиссерт, звукооператорт, видеооператорт, костюмерт ды седе тов. Те покш тевесь топавтови университетэнь медиалабораториясо (лиякс меремс, технопарксо). Уроктне нолдавить куш кодамо тема лангс. Улить истят, конатне алтазь тиринь келень тонавтнемантень, лиятне жо снимазь Мордовия Республикань скульптортнэнь, сермадыцятнень, артисттнэнь ды морыцятнень ланга.
– Те проектэнть минь невтинек 2023 иень ноябрянь 30-це чистэ «Россия» выставкасонть-форумсонть, конась ютась Московсо ВДНХ-со. Самай се чистэнть ютавтовсь Мордовия Республикань чись. Мероприятиянь инжетне шнызь минек важодеманок. Мерсть а аштемс ве таркасо, поладомс тевенть седе товгак. Форумонтень пачколинек кавксть. Омбоце молемадо икеле Ольга Ивановна Налдеева марто анокстынек эште вейке проект. Монь сась превезэнь артомс раськень оршамопельсэ някат. Ды седе тов теемс аппликация марто книга. Васняяк артыя няканть, седе тов артынь оршамопельтнень. Нама, мон аволь профессиональной артыця, коневонть лангсо редявить аволь виде таркатне, ансяк выставкань инжетненень вечкевсь монь тевем. Эрьвась, кие лоткакшнось минек столенть ваксс, зярыя шка кирдевсь монь аппликациятнень велькссэ. Седе пек налксемапелентень мель явсть лия региононь эрзятне эли сеть ломантне, конат чачсть Мордовиясо, ансяк умок уш а эрить тиринь енкссо. Шнымим РФ-нь Финнэнь-угрань раськетнень ассоциациянь председателесь Петр Тултаевгак, конась се чистэнть сакшнось шумбракстнеме тиринь республикань ломантнень марто. Нама, те шнамось эзь ема стяко. Зярдо велявтынек Мордовияв, монь кирвазсь мелем седе товгак келейгавтомс ды сюпалгавтомс те проектэнть. Теке жо налксемапеленть марто ардтнинь пелькстамос Пятигорскоев. Эзинь изня, ансяк лисинь финалс. Участниктнеде ульнесть малав 200 ломанть. Сакшность Россиянь эрьва регионсто. Те мероприятиясь макссь тень ламо од содамочить, – евтни тейтересь.
Теде башка, Анастасия – РФ-нь Финнэнь-угрань раськетнень ассоциациянь Од ломанень советэнь член. Те Советэнтень тейтересь совась ютазь иень ноябрянь меельце читнестэ. Ижевскойсэ ютавтовсь од ломанень форум, конань участникекс ульнесь минек эрзянь тейтереськак. Самай тосо Петр Тултаев макссь кармавтома финнэнь-угрань раськень од ломантненень пурнамс Од ломанень совет. Тевесь секе чистэнть жо ульнесь топавтозь. Од ломанень советэнь прявтокс кочкизь Максим Алгайкинэнь, кона эри ды важоди Марий Элсэ. Весемезэ те Советэнтень совить малав 100 од ломанть. Эсь важодемадост евтнить «ВКонтакте» социальной сетень «Молодежный совет АФУН РФ» кулялопасонть. Истя, аволь умок Од ломанень советэнь участниктне ютавтсть весероссиянь пелькстамо, конасонть ульнесть кавто номинацият: «Моя династия» ды «Родной язык в семье и в жизни». Пелькстыцятнеде ульнесть 22 ломанть. Пелькстась минек героиняськак. Ды сайсь васенце тарка.
– Весемесь лиссь апак учне, теке марто кандсь покш кеняркс. Мон пелькстынь «Моя династия» номинациясонть. Весемезэ, мезе эрявсь теемс, – те снимамс раськень оршамопельсэ ды евтнемс эсь кудораськенть историянзо. Пелькстыцясь, конань публикациязо пурны седе ламо седейнеть (лайкт), лиси изницякс. Мон истя теиньгак. Раиса Ивановна бабам ды Валерия сазоркам марто оршнинек эрзянь оршамопельсэ, сниминек эсенек ланга апокшке видео ды путыя сонзэ «ВКонтакте» социальной сетьсэ лопазон. Ды карминь учомо пелькстамонь цетамотнень. Покш сюкпря малавиксэнь, Аловелень ды целанек Отяжелень райононь эрицятнень ды весе сетнень туртов, кие ванызе монь публикациянть ды путсь седейнеть. Сынст мелень явоманть вельде весе пелькстыцятнень ютксто мон карминь изницякс, – корты Анастасия.
Тейтересь тешксты, икелепелев Од ломанень советэсь тагояк арси ютавтомс пелькстамо. Секскак, кинь ули мелезэ, яволявтынк прянк, изницятнень учить вадря казнеть.
Весе неть мероприятиятнес ды пелькстамотнес дока тейтересь оршни эрзянь оршамопельсэ, конатнень казинзе тензэ вечкевикс бабазо. Теде башка, бабанзо аванзо пельде Настянень ютасть сырькаенть эрьгензэ, конатненень малав 100 иеть. Ансяк сынь ванстовсть ды нейгак мазылгавтыть од тейтеренть мештензэ. Анастасия корты, неть мазылматне кандыть сонензэ уцяска. Теде башка, сырькаенть эрямонь парьстэнзэ ванстовсь умонь шкань мазый якстере пацязо. Тейтересь сонзэ вестькак эште эзизе оршне. Кавтолды, мекс а машты сонзэ эрзякс сюлмамонзо.
Теде башка, минек героинясь топавты киберволонтеронь тевенть. Мордовиясо те енксось появась ютазь иестэ. Киберволонтертнэ – те сеть ломантне, конатне важодить информациянть марто. Саемга, бути республикасонть ютавтови кодамояк покш мероприятия, неть од ломантне важодить площадкатнева, пурныть эрявикс материалонть, седе тов анокстыть сермадовкст ды апокшке видеот, цетамотнень путнить Интернетс. Минек республикасо истят киберволонтертнэде сатышка. Сынь весе студентт.
Кода уш тешкстынек, Анастасиянь пек чуросто эрси оймсема шказо. Секскак, бути истямо шка пры, тейтересь бажи сонзэ ютавтомс лезэвстэ. Истя, аволь умок телеграм-каналсо сон ушодсь ветямо «Эрзянь тейтерь» кулялопа, конасонть Анастасия евтни эсь эрямодонзо. Истя жо вети эрзянь кельсэ рубрика.
Эсенек пельде минь арсетяно те эрзянь тейтерентень седе товгак ютамс ансяк икелев! Эдь истят ероков од ломантнень вийсэ ванстови ды карми эрямо минек тиринь келесь, раськесь ды культурась.
Алена Артемьева
Фототне саезь
Анастасия Виряскинань архивстэ.