Мордовиясь, кода весе Россиясь, тешкстызе священной кенярксчинть – Ине Изнямонь чинть. Покш чинь мероприятиятне ютавтовсть весе республиканть келес. Прявт тевесь – кенярксчинь митингесь ды парадось – ютавтовсь Мордовиянь прявт ошонь Изнямонь площадьсэнть. Те чистэнть тей пурнавкшность Ине Отечественной войнань ды тылэнь ветерантнэ, трудонь ветерантнэ, сынст малавиксэст, специальной военной операциянь участниктне, тонавтыцятне, студенттнэ, школасо тонавтницятне, правань ванстомань блоконь представительтне ды республикань тежат эрицятне.

Коень коряс кенярксчинь митингесь ушодовсь Российской Федерациянь Гимнастонть ды чатьмонемань минутастонть весень ледстнемга, кить эсест эрямост питнесэ изнизь фашизманть, казсть тенек олячи ды вандынь чи.

«Течи весень туртов – башка, священной чи. Прявт кенярксчись, конась эри эрьва семиясо, эрьва седейсэ, – пшкадсь пурнавозтненень Мордовия Республикань Прявтось Артем Здунов. – Маень 9-це чись – Россиянь раськетнень мужествань, оймевиень ды вейсэндявомань, минек тынк марто историянь ледстнемань тешкс. Мельганзо – миллионт семиятнень, минек малавикстнэнь, верень ды оймень коряс ломантнень уцяскаст. Сынь казсть тенек сехте питнеенть – эрямонть. Ды минек прявт тевенек – ванстомс неть ледстнематнень, пачтямс кода священной реликвия».

Региононь руководителесь тешкстызе, Изнямонь чиденть икеле Саранскойсэ педе-пев витнемадонть мейле панжовсь боевой ды трудонь подвигень Мемориальной музеесь.

Эште вейке тешксэв тевесь лиссь кенярксчиденть икеле – Россиянь Президентэнть Указонзо коряс Саранскоень аэропортонтень максозь Советской Союзонь Героенть, содавикс летчикенть ды Мордовиясо чачозенть Михаил Петрович Девятаевень лемесь.

Башка тарка минек седейтнесэ саи Сурань рубежень строицятнень подвигесткак – тедеде сонензэ топодсть 85 иеть.

Артем Здунов, РФ-нь Госсоветэнь «Семья» енксонть коряс комиссиянь прявтось, тешкстызе, ванстомс ледстнематнень ды кастомс Тиринь масторонь вечкицятнень мереви ансяк эсь примерсэ.

«Весе минь – вейке покш семия, конась кеместэ сюлмавозь изницятнень поколениянть марто. Вечкевикс эйкакшт, кадетт, юнармеецт, ушаковецт, поисковикть – свал кирдеде мельсэнк теде! Нейгак, зярдо минек земляктне честь марто топавтыть долгонть специальной военной операциянь таркасонть, те маряви седеяк виевстэ. Сюкпря тенк, Отечествань вечкевикс ванстыцят, эсь кедьсэнк кеместэ кирдеде Изнямонь знамянть! Тынк кувалма ашти каштанчисэ весе масторось, тынк марто весе Мордовиясь! Изнямонь чись вейсэнди минек весень! Эряви ванстомс раськетнень ды поколениятнень те вейсэндявоманть, минек вейсэндявоманть, минек ине масторонть! Слава советской солдатонтень! Слава раськентень-изницянтень! Ине Изнямонь кенярксчинть марто!» – евтась весенень поздоровт Мордовиянь Прявтось, «Единая Россия» партиянь Мордовиянь региононь отделениянь секретаресь.

СВО-нь ветерантнэнь пельде республикань эрицятненень пшкадсь «Герои среди СВОих» региононь кадрань программань участникесь Александр Асманов: «Зярдо содасак фронтонь модань эрьва метранть питнензэ, покш питне путат минек покштятнень-бабатнень Ине Отечественной войнасонть подвигентень. Боевой братствань те а неявикс сюлмавомась вейсэнди кавто поколеният. А стувтсынек ды макссынек содамочинек раськетненень, штобу сынь зярдояк аволизь сода войнань весе тандадоманть. Честь ды слава!»

Советской Союзонь героенть М.П. Девятаев лемсэ «Высота» тонавтомань центрань тонавтницясь, «Юнармейская доблесть» медалень саицясь Анастасия Конакова мерсь: «Минь комавттано прянок покштянок-бабанок мужестванть икеле, конат ванстызь Тиринь масторонь олячинть Ине Отечественной войнань иетнестэ. Сынь вастовсть ламо цидярдома марто, емавтсть малавиксэст, вастневсть куломанть марто, ансяк сынь эзть синдеве, сынь изнясть. Монь прявт невтевксэм – монь сыре покштям Чуракин Федор Петрович. Од ломантнень пельде алтан, минь зярдояк а стувтсынек сынст ине тевест!»

Церемониянть шкасто цецят Мордовиясо чачозь воинтнэнень, конат маштовсть 1941–1945 иетнень Ине Отечественной войнасонть, кеврунгонтень путсть Мордовиянь Прявтось Артем Здунов, властень органтнэнь представительтне, ветерантнэ, тылэнь важодицятне ды войнань эйкакштне, специальной военной операциянь участниктне ды ветерантнэ, маштовозь воинтнэнь аваст ды доваст.

Изнямонь площадьганть виде рядсо ютасть Изнямонь парадонь колоннатне – военнослужащейте, СВО-нь участниктне ды ветерантнэ, полициянь, Росгвардиянь, МЧС-нь региононь управлениянь сотрудниктне, Н.П. Огарев лемсэ МГУ-нь военной тонавтнемань куншкакуронь курсанттнэ, СПО-нь студенттнэ, школасо тонавтницятне – кадеттнэ, казактне, юнармеецтнэ, кадеттнэ-ушаковецтнэ, кадеттнэ-пограничниктне. Коень коряс парадсонть ютасть сонзэ сехте од участниктне – Саранскоень эйдень кужов якицятне, ды 12 ды 20 №№ гимназиятнень ды 9 ды 18 №№ школатнень тейтертнень сводной отрядось.

Кенярксчинь митингень меельце пельксэкс кармась «Победа ковалась в единстве народов» ютамось. Изнямонь знамянть кандызь Н.П. Огарев лемсэ МГУ-нь военной тонавтнемань куншкакуронь курсанттнэ. Мероприятиясь прядовсь «Бессмертный полк» ютамосонть.

Коень коряс митингенть-реквиемденть ды парадтонть мейле ютавтовсь Саранскоень мемориальной калмазырьсэнть «Скорбящая мать» мемориалонтень цецянь путомань церемониясь.

Истя жо, маень 9-це чистэ Мордовиянь Прявтось Артем Здунов телефонга евтась поздоровт Ине Отечественной войнань ветерантнэнень Изнямонь чинть кувалма, евтась сюкпря ратной подвигенть кисэ, конань вельде масторлангось олякстомтозель фашистэнь тандавксонть эйстэ. Поздоровт евтасть Ковылкинасто Владимир Герасимович Костькиннэнь, Кадошкинской районсто Семен Андреевич Анашкиннэнь ды Чамзинской районсто Валентина Яковлевна Чашинанень.

Сюкпря Изнямонть кисэ!

***

Мордовиясо прядовсь «Герои среди СВОих» региононь кадрань программань васенце потоконь тонавтомась. Састь 700 ламо яволявтомат сонзэ участникекс улицятнень пельде, малав 250 ломанть ютасть тестирования, 80 ламо саезельть программантень, 51 ютась тонавтнема ды 32-тне аштить отложенной этапсо, поладыть топавтомо тевтнень специальной военной операциянь зонасонть.

Ине Изнямонь чиденть икеле, маень 8-це чистэ, Республикань Кудосо явшевсть дипломт выпускниктненень. Кенярксчинь церемониянть панжомсто, Мордовиянь Прявтось Артем Здунов тешкстызе, мелят республикань командась кармась васенцетнень ютксо, кить Россиянь Президентэнть кармавтоманзо коряс нолдасть региононь кадрань проект.

«Программантень ушодкс максынек Боевой действиянь ветерантнэнь чистэнть. Секскак пек тешксэв, Ине Изнямонь чиденть икеле минь явшетяно дипломт, – мерсь региононь руководителесь. – Те алкуксонь изнямо тынк эрямо кинть те пелькссэнть – содамочитнень, ерокчитнень, содавтоматнень ды сюлмотнень канстонть марто тынь кармиде седе виевекс. Тынь алкуксонь изницят!»

Мордовиянь Прявтось евтынзе цетамотнень: течинь чинтень 11 ломань уш важоди госвластень органтнэсэ, общественной организациятнесэ ды республикань прявт предприятиятнесэ. Эште вететне ютасть согласования ды анокт важодема таркатнень муемантень.

«Тынь кармиде аволь ансяк республикань, истя жо масторонь общественно-политической эрямонь участникекс. Минь сеедьстэ вастневтяно, ды аволь ансяк тонавтнемань мероприятиятнесэ, истя жо минек республикань эрямонь весе тевтнесэ. Секскак вейсэнь важодемась ды эрямось теньсэ а прядови, минь поладсынек вейсэнь тевенть – Тиринь масторонтень служамонть! Изнямось карми минек мельга!» – мерсь Мордовиянь Прявтось.

Фототне Егор Горинэнь.