Вторник, марта 19, 2024
Важное

Августонь 19-це чистэ Саранскойсэ ютась эйкакштнень андомань кевкстематнень коряс тетятнень-аватнень Весероссиянь II-це Форумось. Мероприятиясь ульнесь «Тавла» тонавтнемань куншкакуросонть – 17-це № школасонть.
Тедеде Форумось ютавтови «Здоровое питание в школе и дома» девизэнть коряс. Те кевкстеманть кортамонтень вейсэндявсть 80 регионт – очна ды видеосвязенть вельде. Тетятне-аватне, эксперттнэ, тонавтыцятне, общественной организациятнес совицятне – Форумсонть весе ёвтызь мелест-арсемаст.

Форумонь важодемасонть ульнесть Мордовиянь Прявтось Артём Здунов, Госдумань депутатось, ГД-нь Семиянь, аватнень ды эйкакштнень кевкстематнень коряс комитетэнь председателень васенце полавтыцясь Татьяна Буцкая, РФ-нь Просвещениянь министрань полавтыцясь Андрей Николаев, Россиянь Образованиянь академиянь президентэнь полавтыцясь Геннадий Онищенко, Весероссиянь народной фронтонь Расследованиянь бюронь руководителесь Валерий Алексеев, Отраслевой ярсамонь институтонь президентэсь Владимир Чернигов ды ламо лия профессиональной экспертт, истя жо тетятне-аватне.

Мордовиянь Прявтось, Госсоветэнь «Образование» ёнксонть коряс комиссиянь школасо андомань кевкстематнень коряс важодемань группань прявтось Артём Здунов пурнавозтненень пшкадемстэ тешкстызе: Форумонь прявт смустесь – кортамс ды муемс виде ки сехте пшти ды талновтыця кевкстематнень коряс, конатнень эйстэ ашти эйкакштнень андомань вадрячись ды шумбрачись.
«Госсоветэнь образованиянь коряс комиссиянь важодемань группанть лувсо минь вантано тевтнень мельга весе масторонть келес. Мон пачтинь Россиянь Президентэнтень: Форумонть вельде ладяви лезэнь кандыця мекев молиця сюлмо», – мерсь Мордовиянь руководителесь. Форумонь прявт ёнксокс Артём Здунов ёвтынзе начальной школасо тонавтницятнень питневтеме пси ярсамопеленть лангс федеральной субсидиянь ярмактнень лезэвстэ ютавтомань, федеральной программанть коряс школань пищеблоктнень витнемань, питнетнень касоманть лувсо школасо андомань вадрячинь ванстомань кевкстематнень.

Госдумань Семиянь, аватнень ды эйкакштнень кевкстематнень коряс комитетэнь председателень васенце полавтыцясь Татьяна Буцкая тешкстызе, эйкакштнень шумбрасто андомань кевкстемась канды государственной смусть. Текень пингстэ явомс мель ансяк школасо андоманть лангс аволь овсе виде – эряви мелявтомс эйкакштнень шумбрачист кисэ сехте вишкинестэ саезь. Татьяна Буцкая ёвтась мель Мордовиянтень максомс ушодкс шумбра андомань кирдемань весероссиянь движениянтень.

Весе эксперттнэ тешкстызь: ансяк тетятнень-аватнень, школанть ды весе обществань вейсэнь вийтнесэ изнявить эйкакштнень ярсамонь аволь виде ёнкстнэ, конат, содазь, кемекставить семиясо, аволь школасо.

Россиянь Образованиянь академиянь президентэнь полавтыцясь Геннадий Онищенко тешкстызе, ней тетякс-авакс кармась се поколениясь, кить уш «колавсть» фастфудтнэсэ. «Миненек эряви теемс истя, школасо андомась путозо пирявкс фастфудонтень, конанть лангс минек масторонть озавтызе Западось. Ды тетятне-аватне улест минек ёно те аволь шожда тевсэнть», – мерсь сон.

Форумсонть кортасть, кода ладямс школатнесэ эйкакштнень андомаст коряс тетятнень-аватнень ванноманть, кода бороцямс столовойтнесэ кельме ярсамопеленть марто.

Россиянь Просвещениянь министрань полавтыцясь Андрей Николаев тешкстызе, начальной школань эйкакштнень питневтеме пси ярсамопельде андомань Президентэнь ушодксонть вельде удалась виевстэ одкстомтомс системанть.

Федеральной эксперттнэ ёвтасть сюкпря Мордовиянтень ды башка Артём Здуновнень те эрявикс повестканть шаштоманзо кисэ, секс мекс шумбра эйкакштне – те шумбра масторось.

Форумонь пелькстамонь площадкатнесэ ёвтазельть ламо мельть-арсемат, конат токшить школасо ды обществасо шумбрасто андомань кевкстеманть. Топавтомс сынст эрямос – государстванть ды тетятнень-аватнень тевесь. Весе састь мелентень: бути те кевкстемасонть кундамс кедте – весемесь лиси. Эйкакштнень андомань кевкстематнень коряс тетятнень-аватнень Весероссиянь омбоце форумось кемекстызе: важодемась ансяк ушодови, те кевкстемантень государствась ды общественностесь кундыть пштистэ.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».