Вторник, марта 19, 2024
Важное

Течи республикасонок стака муемс ломань, кинь малавиксэнзэ эли содавиксэнзэ аволизе куродо неень шкасто весенень содавикс ормась. Вастовомсто седе сеедьстэ кортамотнеяк кармасть шумбрачиде, седеяк пек ашо халатсо важодицятнеде, кить виест, содамочист максыть те ормадонть меньксэнь муемантень, сеедьстэ эсь эрямодост апак арсе идить сетнень, кинень неень шкане пек стака. Сынь аволь ансяк надобиясо лецить, сеедьстэ валсояк оймавтыть сэредицятнень ды сынст малавиксэст, седейшкава казить тенст кемема пичкамонтень.
Эдь эрямодо питней масторлангсо мезеяк арась. Ансяк сынсь, медицинасо важодицятне, содыть, кодамо, ёжомарямосо туить кудосто, косо кадовить вишка эйкакшост, мирдест-нист, тетяст-аваст… Стакасто сэредицятнень марто важодицятне туить аволь вейке-кавто сменас, ков седе ламо чис, ды весе те шканть перть сынь печтить стакачить: а кайсить ормадо ванстыця специальной оршамопелест, цидярдыть неень пси шканть.

Течи сынст важодевксэсь, ламо СМИ-нь невтевкстнэнь коряс, ледсти тенек войнань стака шкатнень, ансяк сынст ялгатне кулыть аволь леднемадо, апаро ормадонть, конась правты пильге лангсто масторонь келес медицинасо аволь вейке важодиця.
Эсенек ды сынст эрямост ванстомга, миненек, республикань ломантненень, эрявить топавтомс весе сеть ёвтазь вешематнень, конат ванстыть эйсэнек апаро ормадонть. Теньсэ минь шождалгавтсынек эсенек ды сынст уцяскаст.

Аштемковонь 21-це чистэ, теевезь коень коряс, тешкстави Медицинасо важодицятнень кенярксчись. Эрьва иестэ те датанть тешкстамсто ашо халатсо оршазь ломантненень ёвтавить ламо лембе валт ды паронь арсемат республикань сехте мазый таркасонть – театрасо, максовить ламо Почетонь грамотат ды питней казнеть. Нама, сынь ютасть те иестэяк, ансяк медиктнеде пурнавкшность Республикань Кудосо ансяк знярыя. Весе сынь вейкень пес те чистэнть, кода весе шкатнестэ, ансяк ней кеменксть седеяк виевстэ, кармить ломанень эрямонь идеме, кажос понгозтненень шумбрачинь каземе.

Те снимкасонть, конань неть читнестэ теизе минек фотокорреспондентэсь Эдуард Ретунский, тынь нетядо С.В.Катковонь лемсэ республиканской клинической больницянь важодицятнень:

Татьяна Николаевна Тюгаевань, неврологической отделениянь палатной медицинской сестранть;

Людмила Александровна Фроловань, эндоскопической отделениянь старшей медицинской сестранть;

Анастасия Алексеевна Ханинань, кардиологиянь отделениянь медицинской сестранть;

Мария Александровна Лапшинань, реанимациянь анестезиологиянь отделениянь старшей медицинской сестранть;

Марина Николаевна Инжеваткинань, терапевтической отделениянь старшей медицинской сестранть;

Нина Ивановна Чередниченконь, анестезиологиянь ды реанимациянь отделениянь медицинской сестранть;

Ирина Валерьевна Илларионовань, операционной блоконь операционной медицинской сестранть.

Татьяна Васильевна Котковань, операционной блоконь старшей операционной сестранть;

Анна Валерьевна Козловань, терапевтической отделениянь медицинской сестранть.

Валентина Юдина
Фотось Э.Ретунскоень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».