Четверг, декабря 08, 2022
Важное

КОДАМОЯК МАСТОРСО ЭРЯМОСЬ А КАРМИ МОЛЕМЕ ПАРСТЕ, БУТИ АВАНТЬ А ЛОВИТЬ ЛОМАНЕКС, НАРЬГИТЬ ЛАНГСОНЗО, КИРДИТЬ УРЕНЬ ТАРКАКС. АНСЯК ТОСО ТЕВТНЕ МОЛИТЬ ЛАДС ДЫ ВЕЛУВСО, КОСО САТЫШКА МЕЛЬ ЯВОВИ АВАНТЕНЬ.


Но аволь васолов кадовсть сеть шкатне, зярдо аватнень кедьстэ нельгезель олячист. Вейке-кавто пингеде теде икеле Европань духовенствась пря яжась кевкстеманть лангсо, ловомс-а ловомс аванть ломанекс. Малав весе мастортнэсэ нарьгасть аванть лангсо, эрьва кода покордасть эйсэнзэ, кирдсть урень, ракшань таркас. Паро, сеть шкатне ютасть. Виде, кой-кона мастортнэсэ аватне нейгак эрить цёратнень «кочкаряст ало», тень лангс апак вано, седе ламо таркатнесэ сынст эрямост ялатеке неявиксстэ шождалгадсь, пряст кармасть марямо седе олясто. Тенень лездасть аволь ансяк эрямосо лиякстоматне, лездась сынсест аватнень тюремаст эсест праваст кис. Се шкастонть саезь, зярс авась эри масторлангсонть, сынь эзть лотксе тюреме вейкеть праватнень, видечинть, семиясо парсте эрямонть, эйкакшост туртов валдо уцясканть кис.

А седе шожда, лиясто ков седе стака уцяска сатотсь эрзянь ды мокшонь аватнень туртов. Родонь-племань койтнесэ эрямонь шкась, зярдо эрзянь ды мокшонь аватне эрясть пек седе олясто, сынст ды цёратнень ютксо арасельть покш явовомат, ютась. Састь шкат, зярдо допрок полавтовсь эрямо лувось, конань пингстэ аватнень эрямост пек седе стакалгадсь. Ламонь таркава сынст кармасть кирдеме урень таркас. Моданть явшесть ансяк сень ловозь, зяро цёрат улить кудосо, аватнень жо мезекскак эзть путо. Тень кувалма аванть уцясказо седеяк чополгадсь. Эрьва косо ладявкшнось истямо кой: авась теезэ ансяк сень, мезе мерить кудосо цёратне. Лиякс мерезь, сонзэ мелензэ кияк эзь вано, валонзо кияк эзь кунсоло. А стяко тейтерень чачомась аволь ансяк эзь кандо кодамояк кеняркс кода авантень, истя тетянтеньгак, сонзэ вастсть кода «лишной кургонть», конань пельде арасель кодамояк лезэ. Неть ды лия тувталтнэнь кувалма тетятненень-аватненень савкшнось эсест тейтерест кирдемс урень таркас, кона ансяк содась, пись-лакась тевсэ-мелявкссо. «Косо алашась а уски – кильдть тейтерь» – неть валтнэ, конатнень сёрмадынзе Владимир Майнов историкесь XIX пингестэ Пензенской, Симбирской, Тамбовской, Нижегородской, Казанской ды Самарской губерниянь сеть таркатнева якамсто, косо эрить эрзят ды мокшот, кандыть пек домка смусть.

Эрзянь ды мокшонь авась нуи, соки, топавты паксянь куш кодамо тев цёратнень марто вейкетьстэ, мезеяк тень кисэ тензэ а максыть. Натой мирденть марто явомстояк авантень эзь кадново мезеяк.
Пек покш стакачить пракшность мирде экшсэ аванть лангскак. «Эрзянь-мокшонь кудосо мирдесь козяйканзо лангсо нарьги зяро мелезэ ды кода машты, ды тень кисэ сонзэ кияк а чумондсы…» – ловнотано «Очерк юридического быта мордвы» В. Майновонь книгастонзо. Теде кортыть эрзянь-мокшонь устно-поэтической творчествась, эрьва кува пурназь документтнэяк.
Ламо пингень перть социальной авейкетьксчись, цёратнень ёндо нарьгамотне аватнень седейсэ раштасть ацирьгалемат ды кеж. Сынь, кода маштсть, тюрсть неть нарьгамотнень, эрямосо авидечинть каршо. Ансяк энялдомаст а юридической, а государственной власттне эзть маря. Секс аватнень снартнемаст стямс цёратнень марто вейке кузтема лангс кадновсть апак топавто.

Ды натой сестэяк, зярдо минек масторсо Россиянь аватне кармасть кепедеме пряст, кармасть марявомо вайгелест, эрзянь ды мокшонь аватне кадовкшность апак редя, сынь сынськак кодаткак снартомат эзть тейне эсест уцяскаст паролгавтомга. Васенце тувталось теньсэ ульнесь сёрмас асодамось ды ловномо амаштомась. Революциядо икеле эрзянь ды мокшонь аватнень ютксто ансяк 1,5% маштсть ловномо ды сёрмадомо.

Ки соды, кода седе тов ладяволь эрзянь-мокшонь аватнень уцяскаст, бути а сыргаволь Октябрянь революциясь. Кода ней илязтано сёвно сеть шкатнень, но ансяк революциядо мейлень иетнестэ аватнень лангсто саезель урексчинь канстось. Од эрямонь теиця власттне кода маштсть снартнесть таргамс сёрмас а содыця ломантнень чоподачистэ. Истямо ки панжовсь эрзянь, мокшонь аватнень туртовгак. Тенень тенст покш лезкс макссь эрзянь-мокшонь авань кудось (рузкс Дом мордовки), кона панжозель 1929 иестэ Саранск ошсо. Вете иетнень перть, зярс сонзэ кенкштне панжадольть (1934 иестэ сонзэ таркас панжозельть 2-6 ковонь курсат, косо тонавтнесть сёрмас а содыця ломанть), Авань кудось анокстась малав 600 специалистт. Те ульнесь васенце эскелькс, кона эрзянь-мокшонь аватнень седейсэ сыремтсь кемема: сынст таркаст аволь ансяк каштомо икеле, пенчтнень-вакантнэнь ютксо, сынст таркаст тосояк, косо аватнень туртов панжозь ки профессиональной, общественной ды натой политической вешемаст топавтомантень.

Меельце шкастонть авантень кармасть явомо икелень коряс ков седе покш мель. Седе ламо ават ней важодить сеть таркатнесэ, косо икеле сынст некшнинек пек чуросто, лиякс мерезь, топавтыть государственной тевть. Сынь неявиксстэ ламолгадсть депутаттнэнь ютксояк. Те паро. Тень лангс апак вано, аванть эрямонзо нейгак а ловсак шождакс. Кода икелеяк, истя нейгак аватне эсест лавтовост лангсо кандыть покштояк покш канст. Аламо, сынь лакить кудоютконь тевтнесэ, трить-кастыть эйкакшт, теде башка, сыненст савкшны кедть-пильгть тапамс, карязт яжамс эрьва чистэ ды эрьва кшисускомонть кисэ. Те шкас авантень седе сеедьстэ савкшны топавтомс истямо тев, конанть стака эрси цидярдомс цёрантеньгак. Ды тень кисэ авантень, улезэ сон сядоксть седе превей ды теезэ сон сядоксть седе ламо цёранть коряс, сеедьстэ пандыть аволь ярмакт – псакань сельведть.

Теде башка, авась мукшны вийть ды шка топавтомс лия тевть, конат сюлмавозь общественной эрямонть марто. Покш лезэ аватне кандыть национальной культуранть туртов. Кода тосо илязт корта, кодамояк культурась, косо арась аванть путовксозо, аволь ансяк а сти кеме пильге лангс, сон седеяк пек лавшоми ды машты нардезэяк. Мокшэрзянь культураськак нолаштоволь седеяк алов, а улиндерявольть истят ломанть, кить весе седейсэ мелявтыть сонзэ ванстоманть кисэ. Ды сынст ютксо седе ламотне – ават. Те ламоcо сынст вийсэ ванстови тиринь келесь, вельмевтевить седикелень койтне-кирдатне. Сюконятано тенст весе се паронть кисэ, конанть апак лотксе кандыть минек аватне эсест малавиксэст, эсест раськест ды эсест масторост лезэс!

Раиса ЩАНКИНА

Весе содыть: ававтомо
Вадря уцяска арась.
Ававтомо – свал пайстомо
Эрьва кодамо цёрась.
Ававтомо уроз эйдесь,
Чаво кудосонть рудаз.
Арась, лембе чись а пейди,
Инешкипазось – а паз.
Ававтомо арась валдо
Ды превей эрямонь смусть:
Ков а молят – зыянс чалгат, –
Мерть, вармас иетне тусть.
Авась казсь тенек часия,
Сон свал кирдицякс ульнесь.
Сонзэ эйсэ – минек виесь.
Маней валскесь, пелевесь...

Артур Моро
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».