Кочкуровань райононь Ташто Мурза велень «Норовава» ансамблясь пурназель 2007 иестэ, зярдо Саранскойсэ мольсть анокстамот «Шумбрат, Финно-Угрия!» раськеютконь фестивалентень. Ансамблянть пурнызь-сэрнизь ды сеске ушодсть анокстамо фестивальс. Коллективенть лемдизь «Норов» Агрофирманть лемсэ, конантень совась тесэнь колхозоськак. Сень коряс, мекс эйсэнзэ морыть ансяк ават, путозель «ава» пельксэсь. Лиссь эрзянь фольклоронь «Норовава» лемесь.

Ды, кода кортыть, кода венченть лемдьсак, истя сон карми уемеяк. Аватне инжетнень туртов невтить раськень культурань «норовонок»: морот-киштемат, оршамот-карсемат, ярсамот-симемат. Ды весе те тееви эсест сырнень кедтнесэ. Раськень оршамопелень мазычидест, конатнень стакшнызь сынсь, кортамскак а сави – кувтолдозь кувтолдыть лангсост човалятне-эрьгетне, стакшнозь парсейтне-лентатне.Коллективентень пурнавсть истят ават, конатненень морамонь ерокчись ютась тетяст-аваст, покштяст-бабаст пельде. Нама, седе икелень составдонть ней аламо мезе кадовсь, ламот пек сыредсть, кой-конатне уш кулость. Ансяк моротне эрить ды поладыцяст морсить эйсэст нейгак. Ансамблясь арси вандынь чидензэяк, секскак снартни кадомс мельганзо фольклоронь ванстыцят: морсить школасо тонавтницятнень мартояк, зярдо пурныть кодамояк озкс эли покшчи. Кизна ошсто ламо эйкакшт сыть, мартосткак важодить.«Норовава» ансамблясь «Шумбрат, Мордовия!» фестивалень-пелькстамонь свалшкань участник. Теде башка, сынтемест а ютни Покш Игнатбуень Чукало велесэ вейкеяк Раськень Озкс. Зярыя иеде икеле пачколесть Отяжелень райононь Ламбаське велень покшчис. Мелят тердтнизь «Ялгат» фестивальс. Ютазь кизна Кочкуровань райононть содавтызе покш инже Московсто, конань ундоксонзо Мордовиянь, сон пек бажась вастовомс эрзятнень марто. «Минь покш мельсэ вастовинек, морынек эрзянь морот. Мартонок, кода свал, раськень ярсамопельть: каймакт-позат… Нейгак те ломанесь ваны мельганок соцсеттнень вельде ды путни шнамонь мельть-арсемат. Мерсь, тагояк ули мелезэ вастовомс…» – евтни Наталья Спиркина, «Норовава» ансамблянь ветицясь.Аволь умок те коллективенть невтизь весе Россиянть келес «Мир» телеканалсо, конась мелень тунда пачколесь Тавлав. Наталья Борисовна ледстни, кода дивавтызь инжетнень ярсамопельсэ: «Минь сынст каванинек тувонь истямо саладо, кодамо сынь эзть некшнеяк. Истямо икеле аванок яла кудопрясо кирдсть, сон тосо коськиль ды тюжалгадыль. Танстезэяк сонзэ лия. Сыненст уш те дивакс марявсь… Теде башка, минек свал улить пирень ягодань симемапеленек, нетькак пек мелезэст тусть».Коллективсэнть весемезэ сисем ават. Моронь уставицясь – Ольга Еремина. Верце вайгельсэ серьгедицясь – Наталья Спиркина, лиятне – омбоце вайгельть. Эрьвась аватнеде пек ероков, теке шкане маштыть седейга пейдеме-веселгалеме. Бути лети пурнамс-анокстамс покшчи, аватне куватьс а арсекшнить, мезе ды кода теемс. Ансяк невтьсызь тенст программанть, сынь уш корязонзо сеске арсесызь невтема лувонть.Ансамблянь ветицясь Наталья Борисовна СПИРКИНА чачсь Од Пурня велесэ. Тонавтнемадо мейле направлениянь коряс ушодсь важодеме лавкасо. Те тевентень макссь 20 иеть. Ансяк седеезэ пачк морась, ульнесь мелезэ лисемс коллектив марто сцена лангс. Ды вана ве шкасто арасель Ташто Мурзасо велень клубонь прявт. Тов тердизь Наталья Борисовнань, ды сон паро мельсэ кундась од тевентень, конань те шкас топавты пек парсте.Ольга Серафимовна ЕРЕМИНАНЬ чачома велезэ – Од Мурзась. Авась истя вечксы морамонть, натой кува яки – моры, лиясто ладсияк моротнень. Теде башка, сон пек кедьчелькев. Весе мазычинть тейни сонсь. Наряжи аволь ансяк кудонзо ды эсь прянзо, целанек коллективентькак: «Мелят телень перть кемень цыганавань юбкат тенек стась, мазылгавтомат тейнесь, пряс путомкат. Мейле прась, кедензэ синдизе. Ансяк «Шумбрат, Мордовия!» фестивалев ялатеке якась. Сестэ гипс марто лиснесь сцена лангс», – евтнесь тенек коллективень аватнеде Наталья Борисовна. – Ольга Серафимовнань кудозояк прок музей: крыльця пестэ кода кармат куземе, зярс совамо кудокенкшентень пачкодят, кудыкеле аштиця «атятнень-бабатнень» марто котоксть «шумбракстнят». Тосо эсь кедьсэ теезь «эйкакшткак» аштить, коцтонь цецят, викшневкст ды лия эрьва кодамо мазычи. Сонзэ кудонзо икельде свал ушодови «Тундонь ильтямо» коесь. Мазый кудозо панжадо весенень – кодат инжеть а сыть, свал сонзэ кедьсэть. Косто кить бу иляст са: Московсто, Санкт-Петербургсто ды лия енксонь инжеть, студентт – весе сонзэ кедьс лоткить».
Ольга Серафимовнань колмо тейтерензэ, улить нуцьканзо. Вейкесь эйстэст ней СВО-со.Мария Михайловна КАБАНОВА истя жо Ташто Мурзасто, ансяк тонавтнемадо мейле тусь эрямо ошов. Важодсь стройкасо штукатурокс-малярокс, мирдезэ Пелевеенксоль. Пенсияс лисемадо мейле састь велень кудоюртонтень, стявтсть од кудо ды кадовсть велес. Паряк, авольть лиядояк, бути морамонь вечкемась а лоткавтовлинзе. Мирдезэ, келя, истя мерсь: «Минь бу туевлинек, кабу а клубось кудо вакссонок…» Бути кодамояк покшчи, Мария Михайловна чииль морамо, мейле совась «Норовава» коллективентень, истя кадовстькак велес.Мария Николаевна КАРБАЕВА – сехте сыре морсиця ютксост. Чачсь-кассь теске, важодсь Ташто Мурза велень колхозсо. Морамо вечкемась сась бабанзо пельде. Вана кода теде евтни сонсь авась: «Бабам морсицяль, мазый вайгелезэ ульнесь, кода серьгеди моро, минь перьканзо пурнавтано, кунсолотано. А бути кодамояк кенярксчи, сестэ седеяк пек моротне гайгсть. Минь, эйкакштне, пецька лангс кузтяно, кунсолотано, кода покштне морыть. Сынь пуромильть весе покшчитнестэ – Роштоват, Инечить ды седе тов. Кизна покшчистэ куринканек пурнавильть ды чопотемс морсильть… Вана истя миньгак туинек сынст киява. Школасояк яла морсинек, пек мельстуицякс те тевесь марявсь».Елизавета Николаевна УЧАЙКИНАНЬ Ташто Мурзась истя жо тиринь велезэ. Авась эрьва ендо ероков – баянсо седямо машты, эрьва мезень стамояк кол. Лангсост оршамотне вана одт, сонсь стынзе. Моры-кишти, вайгелезэ вадря. Кавто церанзо ней СВО-сот.
Надежда Борисовна ЧЕКУШОВАНЬ коллективесь лови алкуксонь артисткакс. Кодамо, келя, программа иля путо, сон сеске арсесы лувонзо-ладонзо. Морамодо башка вечки киштеме, «Цыганочканть» пек ероковсто киштьсы. Морамонтень вечкемась авантень ютась тетянзо пельде, кона эрьва покшчитнестэ моронь серьгедицякс ульнесь.
Авась чачсь Од Мурзасо, содавикс писательтнень Брыжинскийтнень тиринь велесэ. Сынь Надежда Борисовнань овсе кинь трокс каршо шабраст.Любовь Петровна ЩАНКИНА семиянзо марто истя жо ошсо эрясть, пенсияс лисезь, састь мекев тиринь велев. Кармась сакшномо клубов, тонавтнинзе моротнень, тусь мелезэнзэ ды кадовсь теске. А умок церанзо ильтизе СВО-в.Кода нетяно, ламот аватнень малавиксэст тусть эсь мельсэ СВО-нь таркатнес. Секскак коллективесь вана уш колмо иень перть лезды цератненень. Аватне кедьчелькевть, стасть ламо тодовт, кодасть кекшемань алтымат, свалшкане пурныть посылкат. «Минек велес сакшныть СВО-нь участникть гуманитарной лезкс мельга, минь яла мартост ильтятано эсенек пельде посылкат. Сюкпря тенст, сыньгак минек трудонок неизь, кучнесть грамотат ды сюкпрянь евтамонь сермат тенек. Теде мейле минь седеяк чарькодинек, эрявтано эште тиринь масторонок туртов… Теде башка, эсенекак покш меленек лездамс цератненень», – седейшкава евтни Наталья Спиркина.
Теке марто весе неть аватне – велень активистт: сынтемест а топавтовить велень тевтнеяк. Косо мезе эряви теемс, сынь сеске пуромить ды тейсызь. Памятникень витнеме-петнеме – сынь, часовнянь урядамо – сынь, козонь чувтонь озавтомо, таго сынь. Велеськак кирдеви сынст лангсо.Арсетяно «Норовавантень» кувака эрямо ды ламо кенярксов чить! Кецявтодо эсь шкинемасо ломантнень! Кадык весе паро тевтне, конатнень тынь топавттадо, сядонькирда велявтыть эстенк! Уледе шумбрат ды уцяскавт!Марина Агафонова