Вторник, марта 19, 2024
Важное


2019-це ИЕНЬ АЦАМКОВОНЬ 19-це ЧИСТЭ МОСКОВСО ЮТАСЬ РФ-нь ПРЕЗИДЕНТЭНТЬ ВЛАДИМИР ПУТИНЭНЬ ЖУРНАЛИСТТНЭНЬ МАРТО ЭРЬВА ИЕНЬ ПОКШ КОРТАМОЗО. РЕСПУБЛИКАНОК ПЕЛЬДЕ ЗЯРЫЯ МОЛИЦЯТНЕНЬ ЮТКСО УЛЬНЕСЬ «МОРДОВИЯ» ГТРК-нь «СИЯЖАР» РАСЬКЕНЬ КУРОСО ВАЖОДИЦЯСЬ АЛЕКСАНДР ДАНИЛЬЧЕВ.
ЭРЗЯНЬ ПАНАРСО ОРШАЗЬ ТЕ ОД ЛОМАНЕСЬ КАЯВСЬ ВЕСЕНЬ СЕЛЬМС. СЕКСКАК МАРТОНЗО ЛАМОТ ТЕЕВСТЬ СОДАВИКСЭКС, СЕДЕЙШКАВА КОРТАСТЬ ДЫ САЙСТЬ ИНТЕРВЬЮ.

– Александр, ёвтнек, кода ютась пресс-конференциясь? Кодат мелеть-арсемат?

– Россиянь Президентэнть Владимир Путинэнь журналисттнэнь марто покш кортамосонть ульнинь васенцеде ды пек кенярдан вастовомантень. Видьстэ меремс, истямо тевесь – те покш кеняркс, кона, ловт, эрямосонть эрси весть. Мельтне-арсематне сехте парт, секс мекс тесэ пурнавкшность журналистикасо весе масторонь важодицятне. Кода свал, промксось ютась Раськеютконь микшнемань куншкакуросо (Центр международной торговли). Весемезэ пурнавкшность 1895 ломанть. Ламочинть коряс те од изнявкс. Ютазь иестэ пурнавкшность 1702 ломанть.

Мон саинь мартон эрзянь панар. Сонзэ тень зярыя иеде теде икеле казизе валморонь содавикс сёрмадыцясь Маризь Кемаль. Ды панаронть мазычизэ сеске каявсь весе журналисттнэнь сельмс. Теде башка, сайния «торама» апокш седямопеленть. Сонгак пек вечкевсь весе сыцятнень туртов. Ламотнень ульнесь покш мелест марямс те седямопеленть гайгеманзо, ламонь ульнесь мелест седямс те седямопельсэнть, снимсесть эйсэнзэ. Журналисттнэнь марто кортамонок мольсь 45-шка минутат. Ламот кевкстнесть Мордовиядонть, эрзятнеде, эрзянь кельденть, ютавтовиця койтнеде, покш читнеде, лиядо мезде. Минь лиснинек виде эфирс «Россия-1», «Россия-24», «Life» ды лия телеканалтнэсэ. Пек лембестэ кортынек Германиясто журналисттнэнь марто. Весемесь ули Интернетсэ.

– Кодат кевкстемат анокстакшныть Президентэнтень?

– Кевкстематнеде ульнесть зярыя. Талновтсть эрьва кодат стакачить. Весе сынь сюлмавозельть 2020 иень Весероссиянь сёрмадстоманть, раськетнень эрямонть, этнотуризманть ды тиринь кельтнень марто.
Кортамось мольсь ниле часто ламо. Нама, аволь весе журналисттнэ кельгсть 900 таркань нупалентень. Ламотне вансть весементь мельга лия таркасто. Мон понгинь Президентэнть марто ве нупальс. Целанек Путин весе кевкстематнень лангс макссь домка каршо валт. Кортась чарькодевикс кельсэ. Кевкстнесть лия мастортнэнь марто сюлмотнеде, Ине Изнямонь 75 иетнень тешкстамодо, допингенть коряс, раськень проекттнэде, тонавтомадо, шумбрачинь ванстомадо, пертьпельксэнь ванстомадо, Россиясо раськетнеде, кельтнеде ды лиядо мезде. Куш тень эзь саво максомс эсь кевкстематнень, ялатеке, мезеяк лангс апак вано, эряви меремс, пресс-конференциясь – те тарка, косо молить кортнемат журналисттэнь ютксояк. Секскак мон теевинь содавиксэкс ламотнень марто. Сынст савкшнось неемс ансяк телевизорга. Те – Алексей Петров, Дмитрий Петров, Павел Зарубин ды лият. Кой-кона журналисттнэнь ютксо ульнесть эрзянь ломанть Москов ды Ульяновск оштнестэ. Ней ламотнень марто кирдян сюлмот Интернетэнть вельде. Ды седеяк паро мельсэ карман важодеме «Сияжар» раськень куросонть.
Татьяна МАТОРКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».