Республикань районтнэсэ неень шкасто поладыть сюротнень пивсэме. Комбайнатне стамбарнэ уить паксятнева, мельгаст машинатне секе-тев усксить кенерезь товзюронть. Коське ды маней читнень а эрявить менстямс. Тедеде сюрось эрьва косо чачсь вадря, кой-кона таркатнева саить малав 60 центнерт гектарсто. Неть читнестэ минь пачколинек Ицялбуень «Агропромсервис» ООО-в. Тосо уш малав ковонь перть пивсыть сюротнень. Вастовинек предприятиянь прявтонть Владимир Ильич Нужнов марто ды кортнинек важодицятнень-нуицятнень марто...
– Тедеде пивсэме лисинек июлень 16-це чистэ. Ушодынек озимой товзюросто. Сондензэ видезельть 1207 гектарт. Урожайностесь гектарсто 40 центнерт, кой-кона таркатнесэ седеяк ламо. Сюронть усксетяно Саранскоень элеваторов, «Элекомов» ды минсенек складтнэс. Сюронть усксить эсенек ды ве ендо сиведезь ломантне.
Пивсынек 495 гектарт кснав, 442 гектарт пиянь пидемс шуж. 1607 тоннат шужонть ускинек «Элекомов», сон туи пиянь заводов. Ней пивсэтяно пинеме. Роботыть вейксэ комбайнат. Тедеде раминек «Ростсельмашонь» Т500 моделень од комбайна. Максынек сонзэ од специалистэнтень Сергей Кашаевнень. Те ломанесь парсте содасы тевензэ.
Теке жо шкане анокстатано сы иентень. Пелест ломантне нуить, пелест лов алов сокить мода (зябь). Тозонь сы иестэ видтяно ламбамо якстерькай. Те тевенть колмо тракторсо топавтыть механизатортнэ Вячеслав Караченков, Андрей Дупленков, Сергей Добрынин. Истя жо кавшакавтыть моданть озимойтнень алов. Истямо ладсо эрьва ие.
Сюкпря евтавлинь весе важодицятненень. Юткстост башка тешкставлинь М.С. Козловонь, церанзо С.М. Козловонь, А.А. Никитинэнь, С.В. Михеевень. Истя жо Адрияновонь, Косынкинэнь, Симоновонь, Огурцовонь, Караченковонь, Новиковонь, Зевакинэнь. Сынь роботыть парсте, тевень содазь, кемевикст, – евтнесь тенек Владимир Нужнов.
Кода пачтясь «Агропромсервис» ООО-нь прявтось, весе механизатортнэнь ули паро, кеме семияст, вадря кудост. Сынст стявтызь эли башка программань коряс эли сынсь. Ютксост улить зярыя ламо эйкакшонь триця семият, косо колмо-ниле эйкакшт. Сынь эрить Ульянки, Оброчное, Баево маласо аштиця велетнесэ. А эряви ардтнемс Московов, кинь ули мелезэ, се тестэяк муи вечкевикс тев, робота, конась трясы семиянзо.
– Кемтяно од ломантнень лангс. Сынь тевенек поладыцят. Велень кирдийть, – тешкстась В.И. Нужнов.
Седе тов минь сыргинек паксяв. Важодемась тесэ лаки валскестэ саезь талай чокшнес. Лоткинек васенце паксянть ваксс. Тракторонь руль экшстэ виздезь каршонок лиссь од цера. Максим Филимонов – Кемлянь. Тонавтни Кемлянь аграрной колледжень колмоце курссо. Кочкизе «Эксплуатация и ремонт сельхозтехники и оборудования» специальностенть. Предприятиясонть сон ансяк ниле ковт. Ней тюкс пурны тикшенть, лиякс меремс, теи тикшень прессовка. Покшолмань коряс тюктне лисить малав весе вейкеть.
Теде мейле пачкодинек пинеме марто паксянтень. Сон видезь а евтавияк кодамо мазый таркасо, ков а варштат – пандынеть, куншкасост жо виде паксят. Комбайнерось Александр Александрович Никитин тесэ важоди малав 30 иеть.
– Мон чачинь Оброчнойсэ. Школадо мейле тонавтнинь Смольноень 10 № СПТУ-со. Тосо макссть содамочить зярыя специальностень коряс: водителень, механизаторонь, слесарень. Уш васенце курссо тонавтнемстэ Конезаводонь икелень прявтось тердекшнимим практикань ютамо. Самай сестэ, 1997 иестэ саезь, ушодовськак важодема ким. Тетям-авам истя жо важодсть колхозсо. А вана сазором тусь эрямо ошов. Мон вана ковгак эзинь туе. Кода кортыть: киненьгак эдь эряви кастомс масторонтень кши! Васня роботынь тракторсо механизаторокс. Комбайнань руль экшс озынь аволь пек умок. Коллегатне-комбайнертнэ весементь тень невтизь, тонавтымизь, тевесь пек тукшны мелезэнь. Мон пивсан «Брянсксельмаш» комбайнасонть, сон од, тензэ ансяк колмо иеть, – корты Александр Никитин.
Ламо иень перть парсте важодеманть кисэ А.А. Никитин казезь ламо наградасо, МР-нь Прявтонть пельде дипломсо, МР-нь Велень хозяйствань ды продовольствиянь министерстванть пельде благодарностьсэ ды лиясо.
Дмитрий Олегович Милушкин истя жо Оброчноень. Тонавтнесь Кемлянь аграрной колледжсэ. «Агропромсервиссэ» роботы комсь иень перть. Ледстни, кода ушодсь роботамо комбайнеронь лездыцякс. Мейле сонсь озась руль экшс, ансяк сестэ маризе прянзо паксянь азорокс. Се шкастонть саезь эрьва кизэ сон нуи комбайнасо. Валонзо коряс, немецень Claas комбайназо уш аволь од, тень лангс апак вано, важоди вадрясто. Церась парсте содасы техниканть, ваны мельганзо сонсь.
– Тедеде сюрось чачсь вадря. Арсян, велень хозяйствасо эрьва важодицянть те пек кецявты, – мерсь комбайнерось.
Сергей Кашаев истя жо теке велень – Оброчноень. Вейксэ класстнэнь прядомадо мейле ниле иеть тонавтнесь Кемлянь аграрной колледжсэ. Практиканзо свал ютыль «Агропромсервис» ООО-со. Армиясо служамодо мейле сась тей роботамо. Самай сонензэ максызь од комбайнанть.
– Мон васенце ие нуян комбайнасо. Цератне, кить уш ламо иень перть тесэ, тонавтымизь. Сюкпря тенст, мезе а чарькодеви, сеске евтыть. Комбайнань бункерэнтень кельгить малав 10 тоннат сюро. Ялатеке минь бажатано эрязасто пештямс машинатнень, конат усксызь нуезенть складс эли элеваторов, – пачтясь од церась.
Седе тов механизатортнэ ушодыть пивсэме яровой товзюронть ды таргамо ламбамо якстерькаенть. Паксясо тевтне а маштыть телес. Паро, зярдо ули кеме азор, улить вадря важодицят, кинь марто изняви весемесь!
«Агропромсервис» велень хозяйствань предприятиясь тедеде видсь 554 гектарт яровой товзюро, 1276 гектарт шуж, 170 гектарт сюрокс кукуруза, 165 гектарт силосокс кукуруза, 595 гектарт кснав, 167 гектарт соя, малав 2000 гектарт ламбамо якстерькай.
Эряви тешкстамс, «Агропромсервис» ООО-нь «Мордовский» лишмень заводонь зоотехникесь Данил Беззубов ардтнесь Нижегородской областев, косо ютась коневодствань коряс арабской лишмень «Три грации» фестивалесь. Роллекс лишмесь-тяжеловозось тосо сайсь васенце тарка!
Татьяна МАТОРКИНА.
Фототне Егор ГОРИНЭНЬ.