Вторник, марта 19, 2024
Важное
 
Ноябрянь 29-це чистэ, паксясо весе тевтнень прядовомадо мейле, Кочкуровань райононь «Норов» Аграрно-производственной фирмань важодицятне теевезь коень коряс ве шкасто тешкстыть кавто покш чить. Вейкесь эйстэст – Велень хозяйствань ды перерабатывающей промышленностень роботникень чись, омбоцесь – «Норовонть» чачома чизэ.


Торжественной промксось ютавтовсь покш, валдо, мазый Культурань центрасонть, кона ашти Семилей велень Церковной ульцясонть. Аравтозь шкантень тов пуромсть республикасонок содавикс Агрофирмань важодицятне вейсэ генеральной директоронть Дмитрий Александрович Поздняков марто. Кенярксчистэ сыненст поздоровонь ды паронь арсема марто сакшность МР-нь Государственной Собраниянь Председателесь В.В.Чибиркин, Кочкуровань муниципальной райононь Администрациянь прявтось С.Н.Герасимова.

Васняяк пурнавозтненень ламо лембе валт ды паронь арсемат ёвтась «Норов» компаниянь группатнень прявтось, МР-нь Госсобраниянь депутатось А.И.Поздняков. Александр Ильич тешкстызе, кодашка покш путовксост течи эрьва важодицянть вейсэнь тевс, ды ёвтась тенст седейшкавань сюкпрянь валт парсте тевест топавтоманть кисэ. Алкукскак, течи «Норов» Аграрно-производственной фирмась ламо невтевксэнь коряс сови Мордовиясо содавикс предприятиятнень юткс ды ламотнень икельди. Теде кортыть цифратне, конат ёвтазельть те иень кемень ковтнес итогтнень теемадо мейле. Сынь теить продукция 1500 миллиардт целковоень питнес. Иестэ иес касыть невтевксэст «Норовское молоко» ООО-нть ды «Норовский» МПК-нть. Истя, те иень кемень ковтнень перть ловсосто теезь продукциядонть миезь 1500 тоннат, сывельстэ – 4600 тоннат. Тесэ свал бажить ламолгавтомс нолдавиця продукциянть ассортиментэнзэ ды теемс сонзэ экологиянь коряс ваньксэкс, мезе мартояк апак човоря ды, теке шкасто, тантеекс.
Течи «Норов» Агрофирманть покш путовксозо аволь ансяк сеть велетнень территориятнень виевгавтомасо, истя жо целанек Кочкуровань муниципальной райононть. Кода мерсь сонзэ прявтось С.Н.Герасимова, сынст ёнксонь невтевкстнэсэ – ловсонь, сывелень продукциянть ламолгавтомасо – покш таликазо «Норовонть». Теде башка, сынь теить весементь районсонть культуранть, спортонть ды лия ёнкстнэнь виевгавтомга.

«Норов» Аграрно-производственной фирмасо важодицятненень республикань прявттнэнь ды эсензэ пельде поздоровтнень ёвтынзе МР-нь Госсобраниянь Председателесь В.В.Чибиркин. Сон васняяк пачтясь, кодашка мель Мордовиясо явови Велень хозяйствань ды перерабатывающей промышленностень роботникень кенярксчинтень, «Норовонть» чачома чинтень. Эдь неть покш читне алтавить паксясо ды фермасо важодицятненень, корьмай моданть мельга якицятненень.
Владимир Васильевич тешкстызе «Норов» Агрофирманть Мордовиянь социально-экономической ёнксонть виевгавтомантень покш путовксонзо. Течи тесэ важодить 600 ломанть, весе сынь путыть виест тиринь моданть, райононть, республиканть сюпалгавтомантень.
Кода мерсь В.В.Чибиркин, ветенест предприятиятне, конат совить те компаниянтень, нолдыть паро качествань продукция, кона содавикс ды вечкевикс аволь ансяк республикасо, Россиянь келес. Мордовиясо те вейкине предприятия, косо авака куркань максосто теезь фуа-грась кармась улеме содавиксэкс Россиянть келес, ды сонензэ покш питне путсть масторонь прявттнэ. Те компаниясонть нолдазь продукциянть коряс сынь аволь весть лиснесть изницякс истят пелькстамотнесэ, кода «Лучшие товары Мордовии», «100 лучших товаров России».
– Нать, а стяко те иень сёксня Велень хозяйствань ды перерабатывающей промышленностень роботникень кенярксчистэнть «Норов» Аграрно-производственной фирмась совась республикань сеть кемгавтово предприятиятнень юткс, кинень максозель «Аграрная Слава» питней казнесь, – мерсь В.В.Чибиркин.

Мордовиянь высшей законодательной органонь прявтонть валонзо коряс, те предприятиясь кеместэ эскели икелев, ды мезесь эштё кенярдовты, важодицятнень ютксо улить ламо од ломанть ды сыненст тееви весемесь эрямост ды важодемаст шождалгавтомга.
Алкукскак, «Норов» Агрофирмасо свал бажить тевс нолдамс весе одонть. Аволь умок эсест ярмак лангс панжсть кавто од корпуст куркань трямс, эрьванть питнезэ малав 15 миллионт целковойть, утилизациянь корпус.

Теде башка, тесэ секе-тев одкстомтови оборудованиясь. Аволь умок ютавтсть 15 миллионт целковойть колбасань теемань цехенть туртов.
Весе неть покш тевтнень ютксо ялатеке васень таркасо ашти ломантнеде мелявтомась, сынст важодемаст ды эрямост шождалгавтомась. Республикасонок ипотекань программань коряс аволь питней эрямо таркань теемась ушодовсь а пек умок, паряк, Мордовиянть лангс ванозь, те паро тевенть ушодсть тевс нолдамо масторонь келес. А вана «Норов» Агрофирмасонть, конанень неть читнестэ топодсть 27 иеть, истямо лувсо важодить уш комсьветее иеть. Весе те шканть перть льготань ипотекань коряс эрицятненень максозь суммась кассь 70 миллионт целковойс. Теде башка, аволь ансяк «Норов» Агрофирмасо важодицятнень, весе Семилейсэ ды маласо велетнесэ эрицятнень ули возможностест юткошкасто молемс истямо паро Культурань центрав, косо ули весемесь мелень витемга, парсте шканть ютавтомга. Ули школаст, неень шкантень ладиця бассейна марто эйдень кужост, Пазнэнь озныцятненень храмост. Лавкатнесэ микшневи эсест теевкс аволь питней ды тантей продукциясь.
Ловозь ковт кадовсть Ине Изнямонь 75 иетнень тешкстамонтень. Семилей велень Церковной куросонть анок уш юбилеень Изнямонь чинтень Пингеде-пингес ледстнемань монументэсь, кона алтави Александр Невскоень шкасто саезь неень шкань войнатнесэ маштовозтненень.

Неявикс таркасот Семилей велень эрицятнень лемест, кить маштовсть тюремань паксятнесэ минек уцяскав эрямонть кисэ. Те таркастонть туемстэ саимизь истят арсемат: тесэ эрьва тевенть топавтыть содазь, седейшкава ды алкукс. Ютыть кементь, сядот иеть, паро тевтне, конатнень кадсызь мельгаст ломантне, чачома таркаст, эсест велень ломантнень алкукс вечкицяст зярдояк а стувтовить, сынь сырнесэ сёрмадовить аволь ансяк кев лангс, истя жо тосо эрицятнень седейтнес, конат кармить ёвтавомо ды ванстовомо пингеде-пингес.
Те чистэнть «Норов» Агрофирмасо ламот важодицятненень максозельть питней казнеть ды Сюконямонь валт. Сынь ульнесть Россиянь Велень хозяйствань министерстванть, МР-нь Прявтонть, МР-нь Госсобраниянть, МР-нь Правительстванть ды «Норов» Аграрно-производственной фирманть пельде. Меельценть питнезэ тунь а седе вишкине, эрьванень, кинень сон максови, эрьва ковсто зарплатантень максовить эштё 300 целковойть. Тешкстасынек, течи те компаниясонть зарплатанть покшолмазо – 27 тёжат целковойде седе ламо ды пандови шкастонзо.

Валентина ЮДИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».