2021 иестэ, Медицинань роботникень кенярксчинть тешкстамсто, «Республиканская инфекционная клиническая больница» МР-нь ГБУЗ-нь эйкакшонь васенце отделениянь инфекционной боксонь старшей медсестрантень Наталья Мягкованень макссть покш казне.
Мордовия Республикань Прявтось Артём Алексеевич Здунов ламо иень перть медицинасо парсте важодицятнень ютксто тешкстызе сонзэ путовксонзо ды тензэ казизе «Здравоохранениянь заслуженной роботник» почётонь лементь. Кода мерсть тосонь важодицятне, ули мезень кисэ. Наталья Юрьевна пандемиянь шкасто невтизе прянзо тевензэ пек парсте содыцякс.
Наталья Мягкова чачсь Саранскойсэ, эйкакшпингезэ ютась Покш Березникень райононь Пермезь велесэ. Республикасонок мазый таркасонть чачсть-кассть тетязо ды авазо – Юрий Иванович ды Валентина Ивановна Вилковтне. Сынст од пораст ютась стака шкастонть, зярдо каладсть колхозтнэ, арасельть важодема таркат тиринь велесэ. Мирденть ды нинть малавикс ломанест ульнесть ламо эйкакшонь триця семиясто. Тетянзо, Юрий Вилковонь, семиясь те шкас эзинзе стувто вейксэньгеменце стака иетнень, эдь семиясост эйкакштнеде ульнесть кавксо, эрявсь трямс прянть ды малавикстнэненьгак лездамс. Аванзо, Валентина Ивановнань, истя жо семияст аволь вишкинель, ульнесть ниле эйкакшост. Вана истя, зярдо тетянзо-аванзо туртов ульнесть комсь иеть, эрямо ды важодеме сынь тусть Саранскоев.
Кудазорось малав пингень перть важодсь «Тепличное» предприятиясонть, ульнесь механизаторокс, комбайнёрокс.
Саранскойсэ од семиянть чачсть кавто тейтерест. Покшось, Ольга, васня тонавтнесь М. Е. Евсевьев лемсэ пединститутсо (ней – университет) начальной школань тонавтыцякс, мейле поладызе тонавтнеманзо Саранскоень кооперативной институтсо. Шкань ютазь тусь эрямо ды важодеме Московов. Тосо лиссь мирденень. Эштё пандемиянть ушодовомадо икеле сынь тусть эрямо ды важодеме Южной Кореяв, мирденть раськензэ малав.
Овсе лия эрямо кизэ омбоце тейтеренть Натальянь. Сон эштё вишкинестэ арсесь улемс медсестракс. Зярдо тейтерькиненть кевкстилизь, кодамо казне рамамс чачома чинтень, свал вешиль медицинанть марто сюлмавозь налкшкеть.
А ёвтавияк, кодашка ульнесь тейтерьканть кенярксозо, зярдо тетянзо крёстной авась казсь тензэ вишкине ашо халатке. Паряк, се шкастонть седеяк виевгадсь мелесь кочкамс эрямонь тевекс медицинанть, куш тензэ ульнесть 5-6 иеть.
Саранск ошонь 11 № школасо 9-це класстнэнь прядомадо мейле тусь тонавтнеме Саранскоень медучилищав (ней – колледж). Наталья Мягкова (тейтерьксэнь Вилкова) тонавтнесь кода школасо, истя жо училищасояк парсте. Содась, неть содамочитне маштовить тензэ сы шкань профессиянть топавтомсто.
– Сеть шкатнестэ од специалисттнэнень эзь эряво мелявтомс, ков молемс важодеме, – ледстни Наталья Юрьевна. – Эрьванть ульнесь эсензэ важодема таркав кучомазо (направлениязо). Монь покшоль мелем лецямс вишка эйкакшт, секс прям эйсэ вешинь Чачтома кудов, ансяк се шкане тосо таркат арасельть. Мон тонавтнинь «Сестринское дело» специальностенть коряс. Сестэ оймавтымизь ды кучимизь Саранскоень инфекционной больницяв, карминь важодеме эйкакшонь 2 № отделениясо.
Вишка эйкакштнень шумбрачист витемась аволь шожда тевтнестэ. Васняяк Наталья Юрьевна ушодсь уколонь ды капельникень тейнеме, мейле аравтызь постовой медсестракс. Шкань ютазь путызь старшей медсестракс. Зярдо больницясонть теевсть полавтомат, сонзэ ладизь васенце отделениянь инфекционной боксонь старшей медсестракс, те тевенть сон топавты те шкас.
Эрьва ломаненть, кие ансяк ушоды важодеме, свал ули тонавтыцязо, превс путыцязо. Наталья Юрьевнанень тень коряс прась уцяска теевемс содавиксэкс главной медсестранть Надежда Волкова ды Наталья Болдырева марто.
– Минек больницясо тевтнень одс ладямсто ламот полавтызь важодема таркаст, – ледстни Наталья Юрьевна. – Моненьгак савсь ютамс лия отделенияв, а сёпса, а шожда ульнесь тонадовозь тевстэнть ютамс лия таркас. Се шкане монень покш лезкс макссь васенце отделениянь прявтось Татьяна Владимировна Филатова.
Наталья Мягковань валонзо коряс, те больницясонть важодить ламо од ломанть. Теке шкасто улить сеть, кить эсь содамочист ды ёрокчист максыть одтнэнень. Те паро коенть ладизь ветерантнэ. Сонзэ полады неень шкань коллективесь прявт врачонть, МР-нь Госсобраниянь депутатонть Сергей Евгеньевич Чвановонь марто.
Невтемакс, те иень тунда Медицинской сестрань чинтень алтазель «Лучшая медицинская сестра года» пелькстамось. Весе отделениятне бажасть невтемс аволь ансяк профессиянь коряс содамочист, истя жо кода сынь маштыть киштеме ды морамо.
– Ульнинек покш мельспаросо, зярдо минек инфекционной боксонь васенце отделениясь лиссь изницякс.
Наталья Мягковань валонзо коряс, медицинасо важодеме молить ансяк сеть ломантне, кить алкукс вечксызь те профессиянть. Сестэ, зярдо тейтерезэ прядызе школанзо ды аванзо ладсо арсекшнесь молемс тонавтнеме медицинань тевентень, сон домкасто мартонзо кортнесь, кармавтызе кодамо-бути шкань перть теде арсемс. Ледстизе пандемиянь шканть, зярдо сонензэ ялгатнень марто савсь важодемс ковидэнь госпитальсэ, топавтомс аволь вейке тев, полавтомс ялгатнень, кадовомс эрямо больницясо…
Теде мейле Алина тейтерезэ кочкась эстензэ лия тев, сон тонавтнесь Юстициянь академиясо.
Нать, ансяк истя эряви самс медицинань роботникень тевентень, штобу мейле а янксемс ды а нолдамс ильведькст.
Валентина Юдина