Вторник, марта 19, 2024
Важное
Москов ёнксонь Видное ошсо ниле иеде икеле панжовсь ярсамо тарка рузтнэнень а содавикс ды а чарькодевикс лем марто: «Нармунь». Ды ансяк тозонь сыця эрзятне кенярдсть: Москов ёно чуросто вастат тиринь кельсэ лемдезь кафеть эли паникудот.
Ней эдь весе бажить англань лемтнес, ансяк Георгий ды Надежда Фоминтнэ овсе тенень эзть правто. Зярдо мирдеть-полат панжизь эсест тевест ды стясь кевкстема кафень лементь коряс, Надежда сеске ёвтызе мелензэ – лемдьсынек эрзякс, мазыйстэ, гайтевстэ… Георгий, ломанесь кадык руз, вечкевикс нинзэ каршо эзь моле. Нармунь, кадык нармунь.

Шкань ютазь сынь чарькодсть, лемесь сась верде, теке кие-бути содыль, курок «Нармунесь» чоледезеви эрзянь кельсэ ды сонзэ нупальганть кармить ливтнеме эрзянь морот. Эдь тесэ уш зярыя иень перть вастовомас пурнавкшныть «Эрзянь вайгель» Московонь землячествань фольклоронь ансамблясь ды Московсо эриця эрзятне-мокшотне. Кафесь ней свал мельспаросо васты эрзя-мокшонь диаспорас совицятнень ды весень, кинь ули мелезэ варчамс эрзянь алкуксонь ярсамо- ды симемапельть. Кафенть азоравась ды шеф-поварось Надежда Петровна сонськак сови Мордовиянь землячествас ды морси «Эрзянь вайгель» ансамблясонть. Зярдо-бути те эрзянь аванть виев вайгелензэ редизе эрзятнень вейсэндявксонь икелень прявтось Раида Евстафьевна Степанова, ды Фомина теевсь аволь ансяк морыцякс, ней уш весе эрзятнень-мокшотнень вастыцякс-каваницякс.
Те мазый авась чачсь-кассь Пенза ёнксонь Городищенской райононь Вышелей эрзянь велесэ, тонавтнесь пидицякс-паницякс, важодсь Пензань ресторантнэсэ. Мейле мирдензэ марто тусть Московов, тесэяк Надежда ютынзе весе профессиональной кузтематнень, ды вете иеде икеле сынь арсесть панжомс эсест тев. Надеждань мирдезэ, Георгий, сонзэ вить кедезэ, васенце лездыцязо, превс путыцязо. Сынь вейсэ эрить ламо иеть, кастсть цёра, ней уш улить кавто нуцькаст. Фомина чуросто некшни эйсэст, сынь эрить Пензасо, кода тиринь авазояк. Весе шкаст Фоминтнэ алтыть эсь тевентень, Надеждань лангсо кафень ярсамопелень менюсь, инжень вастомась-каванямось. Раськень колоритэнть тешкстамга, сон сеедьстэ оршни эрзянь оршамопельть, конатнень ускинзе тиринь Вышелей велестэ, эли седе одтнэнь, конатнесэ морси «Эрзянь вайгель» ансамблясонть.

«Инжетненень вечкеви, зярдо мон оршнян мазыйстэ, весе кевкстнить – костонь неть палятне, кодамо раськень, – ёвтни азоравась. – Покш мельспаросан, зярдо миненек сакшныть эсенек, эрзянь ды мокшонь ломантне. Минь тешкстатано вейсэ Мастянть, Од иенть, Эрзянь келень чинть, чачома читнень, ютавттано тесэ свадьбат ды юбилейть. Кезовонть кувалма, нама, ломантнеде ней сакшныть седе аламо, икеле эйстэнек пурнавкшность сядодо ламо.

Кафесэнть минь вейсэ снимсинек сюжетт, кода пидемс-панемс эрзянь ярсамопельть. Неть уроктнень невтнинек Мордовиянь культурань центранть ды землячестванть сайтсэ ды эштё «Вечерняя Москва» телеканалсонть. Куншкакуронть сехте эряза участниктне – Лидия Круглова ды Вера Каяцкая – сестэ анокстакшность пидемань-панемань покш чи, зярдо пурнавозтне пидесть эсест ёнксонь эли велень сехте содавикс каванямопельтнень. Кие пидесь салмат, кие лапшерник, модарькань прякинеть, кие пансь панжакайть, кие пидесь морковонь икра эли пансь пачалксеть. Сестэ минь неинек, кода явовить ярсамопельтне велетнесэ, ды саинек эсенек менюс эштё ламо од каванямопельть. Бути эряви, брагаяк-позаяк тейтяно, а уш пачалксевтеме вейкеяк вастовома а юты. Минь тесэ моратанояк, спектакляткак налксетяно».

«Нармунесь» эрзянь-мокшонь диаспорас совицятненень умок уш аволь ансяк кафе, мелень витема таркине, эрзянь раськень вастовомань усия, коень-кирдань ванстома пелькске. Кадык истят панжовкстнэде кармить седе ламо!

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».