Аволь умок эсь чачома чинзэ тешкстызе эрзянь авась, тонавтыцясь, валморонь сермадыцясь Ольга Ивановна Антипова. Сон малав 42 иеть макссь школасо важодемантень ды нейгак полады каземе эсь седейлембензэ эйкакштненень.
Эстензэ жо маряви, буто ансяк исяк сонсь прядызе школанть, кочкась эстензэ вечкевикс тев, конантень алтызе весе эрямонзо, ды зярдояк тень коряс эзь янксекшне. Сонзэ педагогонь биографиязо – те свалшкань тонавтнема, эсь содамочитнень ды ерокчитнень кастома.
Эйкакшчись лади эрямонть
Ольга Антипова (тейтерькс Ешелькина) чачсь-кассь Отяжбуень эрзянь Тазалесэ. Те велесь а пек покш, ашти Ламбаське веленть маласо.
– Вишка пингестэ пек вечкилинь радио вельде кунсоломс передачат, косо пачтявиль эйкакшонь кужосо ютавтовиця кенярксчитнеде. Монень пек вечкевсь кунсоломс, кода валморот евтнить, морынеть морыть. Бути кудосо араселинь, авам ушов лисиль ды серьгедиль: «Оля, сака! Передачась ушодовсь». Мон, кодамо мельстуиця налксема аволь уле, кадылия ды чиилинь кудов кунсоломо, – евтни Ольга Ивановна. – Истя жо вишка шкасто уш пек вечкилинь ловномо. Рана кадовинь тетявтомо, весемезэ ульнесть тень кавксо иеть. Телевизоронок кудосо кувать арасель, аванень сон эзь рамавкшно, роботась ськамонзо, пандыльть тензэ трешникть. Теке марто телевизоронь арасьчисэнть ульнесь паро енкскак – пек ламо ловнынек книгат. Эринек овсе веленть песэ, библиотекась куншкакуросоль, велесь жо кувака.
Школасто, эрсиль, сат, нулат-валат кайсесыть-понгавтнесыть, ярсат куроксто ды ютат библиотекав. Тов молемась монень уш марявиль пек покш чикс. Нейгак ледстнян, библиотекарекс ульнесь Валентина Константиновна Панюшкина. Сон свал вастыль эйсэнек покш мельсэ.
Паряк, сестэ, кода корты Ольга Ивановна, вельмеськак эйкакш марто важодемантень вечкемась.
– Авам, Любовь Никитична Ешелькина, довакс кадовсь 30 иесэ. Те шкас дивсян, зяро сестэ тевть ульнесть: колхозсояк валскестэ чокшнес роботасть, кудосояк ракшат савкшнось трямс, лия ламо тевть. Ды вана ней арсян, косто сон, пиштякась, шканть муиль ловномс, книгатнень кандылинек сонзэ лемскак. Ловноманть сон куломозонзо вечксь. Эрсиль, кода сыль газетатнень-журналтнэнь сермадстомань шкась, свал сермадстылинь кавто «Сяткот», кавто «Чилисемат», кавто «Эрзянь правдат». Веенст номертнэ сонензэ казнекс. Мон эште а кенерян ловномояк, сон уш телефонсо тень гайневти: «Оля, «Сяткосо» истямо мельстуиця сермадовкс!» – евтни Ольга Антипова.
Школань иетне
Эсест тиринь велесэ Ольга Ешелькина прядсь начальной школа. Мейле, кода весе лиятнеяк, тонавтнеманть поладызе Ламбаськесэ.
– Школасо пек вечкилинь рисовамо. Невтемга, литературань коряс ютатано художественной произведения, монь свал ульнесь мелем теемс иллюстрация се произведениянтень. Весть тонавтыцянок макссь задания М.Ю. Лермонтовонь «Мцыри» поэманть коряс. Мон уш сонзэ целанек тонавтния, теинь артовкс ды сермадстыя «Обняться с бурей был бы рад». Ансяк тонавтыцясь заданиянть эзизе кевксте. А мон ульнинь сэтьме, ковгак эзинь эцне, кедь а кепедилинь. Ды ней монськак уш 41 ие эйкакшт тонавтан ды эстень свал кортан: мезе максыть тонавтницятненень анокстамс, свал кевкстить.
Школанть прядомадо мейле сон кармась тонавтнеме Ицялонь педагогической училищасо. Тосояк ульнесь сэтьмекс, прянзо ковгак а эцниль. Весть рузонь келень коряс макссть сермадомс сочинения. Тонавтыцякс ульнесь Татьяна Федоровна Куркина. Сон сась урокс ды мери: «Содатадо, кинь сочинениязо мелезэнь сехте пек тусь? Ольга Ешелькинань. Мертядо, мон сонзэ ловноса?» Ольга визделгадсь, сон эзь тонадо, зярдо лиятнень эйстэ эйсэнзэ явить.
Педучилищадо мейле, зярдо уш роботась тиринь велень школасо, тейтересь поладызе тонавтнеманзо М. Е. Евсевьев лемсэ педагогической институтонь «Педагогика и методика начального обучения» факультетсэ.
Тонавтыцянь китне-янтнэ
– Мирденень лисинь рана, 18 иеть тень ульнесть, тонавтнинь педучилищань нилеце курссо. Рана чачтыньгак, – евтни Ольга Ивановна. – Мейле, зярдо прядыя тонавтнеманть, сынь тиринь Тазалев ды 28 иеть роботынь эсенек школасо, косо монсь тонавтнинь. Роботынь, зярс школась эзь пекставо, 2012 иень сентябрянь 1-це чинть самс.
Се шкане Ольга Антипова уш кармакшнось сермадомо эрзянь кельсэ валморот. Кармасть тердтнеме эйсэнзэ райононь библиотекатнесэ, музейсэ ютавтовиця раськень мероприятиятнес. Ламбаськесэяк парсте содылизь, секскак Антипова пек кенярды, саизь тосонь школав роботамо. Сон пек лембестэ корты эсь коллективденть. Весе сынь – ояксчисэ эриця вейке покш семия, конать прявтозо – Сергей Васильевич Русяев – превей, чарькодиця ломань, сонзэ марто роботамс пек шожда.
– Ды вана 2012 иестэ саезь течинь чис Ламбаськесэ важодян, – евтни тонавтыцясь. – Начальной классо тарка арасель, эсест тонавтыцяст ульнесть, максызь тень рузонь, эрзянь кельтнень ды тиринь литературанть. Ды, мерят, рузонь кель пинге тонавтылинь, а уш эрзянсенть – седеяк. Лиясто кевкстить, зяро иеть ветятадо эрзянь кель? Монень жо маряви, пингем перть. Эдь вишка класстнэсэ эрзякс малав весе предметтнэсэ кортатано.
Истя жо сеедьстэ кевкстнить, мекс велес кадовинь? Эдь сеть шкатнестэ ламот уш туильть ошов. Васня яла мерилинь, а содан, мекс кадовинь, паряк, превень арасельть. А мекс истя кортынь? Паряк, сень коряс, авань ладсо мирдевтеме кадовинь 31 иесэ. Се шкане велесэ эште арасель газ, монсь пенгть пильсинь-лазнынь, кардаз потмо ракшат тринь. Кода бюджетной сферасо важодицянень гектар якстерькай яла максыльть. Скалнэнь тикше кизэнь перть анокстылинь, лездыцян арасельть. Авам лездыль мезес виензэ ды шказо сатыльть. Сон эште аволь пенсиясоль, фермав роботамо валске марто чииль, мейле монень лездамо сыль, эсь тевензэ теиль ды чокшне мекев фермав. Пек стака шкат ульнесть, паро, неть шкатне прядовсть...
Течи Ольга Ивановна уцяскав ни ды ава, вечкевикс баба. Татьяна тейтерезэ казсь колмо нуцькат. Покшось, Вадим, прядсь 9-це класс, бажи улемс поездэнь машинистэкс. Савелий прядсь омбоце класс, Иринканень 6 иеть.
Покш сюкпря евты Пазонтень, эрямонь кинть лангсо вастызе эри ялганзо – Евгений Ивановичень. Содавиксэкс теевсть 2013 иестэ ды уш эзть явокшно.
– Минек веленть эйстэ аволь васоло ули Гаваево велине, тосо ней уш эрицяткак эзть кадово. 2013 иестэ те велинентень топодсть 90 иеть ды тосо чачозь-касозь ероков ломантне пурнасть кенярксчи, сынст ютксо ульнесь Евгений Иванович Кулдыркаев. Монь жо кочкимизь те кенярксчинть ветицякс. Истя теевинек содавиксэкс. Ансяк сестэ эште эзинек сода, што сон эри ськамонзо ды монгак уш 17 иеть ськамон. Зярс анокстынек кенярксчинтень, вейке-вейкень карминек содамо седе парсте ды чарькодинек, кода ве лувсо чавить минек седейтне. Карминек эрямо вейсэ. Ды течинь чис минденек уцяскавт арасть масторонть лангсо, – тешксты Ольга Ивановна.
Сынь истят малавикст, весе тевтненьгак теить вейсэ. Ды аволь ансяк кудоютконсетнень. Сынь – общественникть. Пек ламо бажить теемс эсь тиринь велетнень туртов. Эряви кинть теемс, тикшенть ледемс, косояк мезеяк витнемс, Евгений Иванович куроксто пурнасы эсь инициативной группанть ды сыргить тевс. Велень эрицятнень марто важодить социальной сеттнесэяк. Евгений Иванович «Одноклассники» соцсетьсэнть вети «Поселок Гаваево» ды «Культурная жизнь села Лобаски» куротнень, Ольга Ивановна – «Шумбрат, Тазале! Здравствуй, Тазнеево!» куронть. Тесэ сон вети алкуксонь исследовательской робота. Пурнась материал малав эрьва кудонть, эрьва кудораськенть ланга. Сон евтни Тазалень эрьва эрицядонть, тесэнь койтнеде-кирдатнеде, икелень шкань ды неень эрямодонть. Кода тешксты Ольга Ивановна, сон тентеме а неи эсь эрямонзо. Истя жо сон пек вечки якамо пангс, конатнень танстест содасызь аволь ансяк Отяжелень районсо, республиканть келес ды сонзэ томбалеяк. Ольга Ивановна эсь салтозь пангтнень кази эрьва сыцянтень, весенень, кинь марто вастови. Истя жо вечки кастомо цецят. Течи сынст кудо икельксэнть мазылгавтыть цецянь 50 ламо сортт.
Ольга Ивановна ды Евгений Иванович сетнестэ, конатне а явить ломантнень «парт» ды «берянть». Сынь весенень кандовить лембестэ ды киньгак а нолдтнить эсест кедьстэ апак каваня.
Ольга Ивановнань пек вечксызь тонавтницятнеяк, сон машты муеме мартост кель-вал, машты уроконть тееме мельстуицякс. Парсте соды, мезе эряви неень шкань эйкакштненень. Паряк, тень кувалма сонзэ тонавтницянзо республикань ды весероссиянь пелькстамотнень свалшкань изницят. Тедеде кармасть васенцекс тиринь келень коряс пелькстамосонть, лиссть призерокс «Юные архивисты» исследовательской конкурссонть. Вадря важодеманть кис эсензэяк пек ламо грамотанзо ды шнамонь коневонзо, аволь весть лиснесь сехте вадря тонавтыцякс. Весементь кисэ тензэ максозь «Российской Федерациянь общей образованиянь почетной роботник» лемесь.
– Тетям-авам монень макссть аволь ансяк эрямо, истя жо тиринь келентень, тиринь енксонтень вечкема. Ды те пси вечкеманть максан вишка оинень ды тонавтницян туртов, – кемекстынзе валонзо Ольга Антипова.
Чачома чинть кувалма Ольга Ивановнанень малавиксэнзэ, ялганзо, икелень ды неень тонавтницянзо казсть аволь ансяк сырнень рисьметь, суркст, цецянь пусмот, эсь викшневть картинат, истя жо сырнеде питней ламо лембе валт.
Минь жо «Эрзянь правданть» пельде арсетяно Ольга Ивановнанень кеме шумбрачи, уцяска, кунсолыця ды превей тонавтницят, ламо од изнявкст! Эсь творчествасонзо шкинемань од текшт.
Юлия Еремина