Отяжелень районсо Павел Степанович Шиловонь асодыцянзо арасть ды Мордовиясояк те виев ломаненть, кеме хозяйственникенть содасызь ламот. Сон «Агрофирма «Искра» ОАО-нь генеральной директор, Мордовия Республикань велень хозяйствань заслуженной роботник, 45 иеть сон ашти те предприятиянть руль экшсэ. П. С. Шилов – 2-це ды 3-це степенень Славань Орденэнь кавалер, Мордовия Республикань Прявтонь, Государственной премиянь лауреат, «Аграрная слава» Почетонь призэнь саиця.
Эрзянь цёрась чачсь-кассь теке райононь Таразбуе велесэ, прядызе университетэнь аграрной факультетэнть ды малав сеске сась важодеме Большие Манадыши велев. Кодамо неень шкане теевсь мазыекс те велесь, покш таликазо Павел Степановичень. Велесэнть строязель весе инфраструктурась, робочейтнень туртов эрямонь кудот, производственной ды бытовой объектт… Сонзэ покш опытэзэ велень хозяйствасонть, кода кортыть эрзятне, мельдензэ пелить одтнэяк, сыретнеяк кевкстема мельга сакшныть.
Те иесь Павел Степанович туртов юбилейной, сонензэ топодсть 75 иеть. Те ломанесь пингеде-пингес совась Отяжелень райононь историяс, максызе весе виензэ сонзэ лезэс. Кода кортыть тосонь ломантне, сон свал трудясь апак манче, кирдсь эсензэ мелензэ, сонзэ ламо мезе лангс эсензэ вановтозо, ялатеке зярдояк эзь стувтне важодицятнеде ды эрицятнеде.
Павел Степанович Шиловонь обуцязо аволь шождатнестэ, ялатеке минек газетань корреспонденттнэнь сон свал васты мелень ванозь, кирди мартонок ялгаксчинь сюлмот. Покш сюкпря тензэ тень кис! Свал лезды тенек сёрмадстомань шкастонть, максы превс путомат эрямонть-аштеманть кувалма, ёвтни ютазь шкань историят. Зняро соды Шилов, книгаяк можна сёрмадомс, ансяк сонзэ икеле зярс аштить лия покш тевть агрофирмасонть. Курок ушодови нуемась-пивсэмась, кизэнь ды сёксень тевть.
Аволь умок Павел Степановичень лемензэ неинек «Время героев» народной премиянь кандидаттнэнь ютксто. Сонзэ кисэ можна максомс вайгеленть «Герои сельского хозяйства» номинациясонть. Те ломанесь алкукс достоин покш лементь кандтнемс!
Фотосонть: П. С. Шилов
«Эрзянь правда» газетань
прявт редакторонть
М. Н. Девятовань марто.