Июлень 8-це чистэ тешкстави Семиянь, вечкемань ды кемемань весероссиянь чись. Те кенярксчинтень республикасонть алтавкшныть кенярксов тевть, вастовомат, ламо иень перть ояксчисэ эриця семиятненень мелень явомат.
Мордовиясо улить истят мирдть ды нить, кить эрямосо стакачитнень лангс апак вано, вейсэ эрить аволь вейке кементь иеть. Мезесь кенярдовты, те шкас ютксост ванстовсь вечкемась, вейке-вейкенень кемемась. Истяттнэнь юткс совавтовлия бу Саранскойсэ эриця Журавлевтнень семиянть. Борис Алексеевич ды Валентина Максимовна ютазь иестэ тешкстызь бриллиантовой свадьбаст, сынь вейсэть кодгемень иеть!
Троицянь кенярксчи. Иневанькс Феодоронь лемсэ Кафедральной соборсонть ютыль Пазонь литургия. Сонзэ прядовомадо мейле рединь мазыйстэ оршазь, сэтьместэ ютыця аволь уш одт мирдть-нить, кить кедте-кедьс кундазь лиссть соборстонть. Церась сеске содавсь. Те – Борис Алексеевич Журавлев. Сон республикасонок советэнь шкатнестэ ламо таркава топавтсь прявтонь тевть. Эсь шкастонзо кевейкее иень перть ульнесь Теньгушевань ды Ицялонь районтнэнь КПСС-нь комитетэнь васенце секретарекс ды эште ламо лия таркасо савсь тензэ улемс руководителекс.
Эйкакш пингезэ савсь войнань стака иетненень
Борис Журавлев чачсь-кассь Покш Игнатовань райононь Отяжеле велесэ сокицянь-видицянь семиясо. Тетязо, Алексей Егорович, сермас эзь сода. Ине Отечественной войнанть ушодовомсто сонзэ саизь фронтов, косо ансяк эзь саво тензэ тюремс ятонть каршо, пачколесь Германияв, Чехословакияв… Ине Изнямонь чинть вастызе Прагасо.
Кудов велявтсь 1945 иень маень 11-це чистэ. Тензэ ульнесь мезде евтнемс фронтсто самодо мейле эсест велень эрицятненень. Омбо масторонь ломантнень эрямост шнамонть кис мик чумондокшнызь… Ламо стакачить савсь цидярдомс ламо эйкакшонь триця семиянтень, зярдо тетяст лемдизь «раськеньятокс» ды мик пекстакшнызь, куш сон ульнесь колхозонь прявтокс. Тетянзо олякстомтызь 1955 иестэ. Покш мельспаросо вастокшнызе те паро кулянть семиясь.
Аламо шкань ютазь церанзо Борисэнь саизь армияв. Васняяк сонзэ кучизь тонавтнеме младшей сержантонь школав, седе тов сон ульнесь кислородонь приборонь коряс авиациянь механикекс. Ламос чарькодиця, парсте тевензэ топавтыця од церанть кадыксэлизь сверхсрочной службас, мезе тензэ ансяк эзть алтакшно сестэ, ансяк сон ялатеке эзь кадово. Масторонть икеле долгонзо топавтомадо мейле Борис Журавлев велявтсь эрямо тиринь Мордовияв ды тень коряс зярдояк эзь янксе. Истямо обуцязо, ков сатотсть виензэ, лездась малавиксэнзэ туртов цидярдомс сеть стака шкатнень.
Вейке вечкема пингень перть
Армиясто самодо мейле Борис Журавлев кармась важодеме тиринь велесэ: кизна – шоферэкс, тельня – трактористэкс. Истя сон лездась тетянзо-аванзо туртов кудо стявтомс, сыречист шождалгавтомс.
Вишка пингестэ саезь церынесь пек вечксь книгань ловномо ды ульнесь мелезэ тонавтнемс вузсо. Те арсемась топавтовсь кодгеменце иетнень ушодовомсто, зярдо сон теевсь Н.П. Огарев лемсэ МГУ-нь велень хозяйствань механизациянь факультетэнь студентэкс.
Студентэнь эрямось пингень перть кадовсь валдо ледстнемакс, эдь сон аволь ансяк домка содамочить пурнась вузсо тонавтнемстэ, эште вастызе эрий ялганзо – Валентинань. Од тейтересь тонавтнесь теке вузонь экономикань факультетсэ. Сонзэ чачома енксозо – Ковылкинань райононь Курнино велесь. Од тейтересь кассь ламо эйкакшонь триця семиясо, косо ульнесть кавксо эйкакшт. Вишка пингестэ содылизе нужачинть ды маштсь весе марто ладямо. Вастневемадо мейле одтнэ прасть вейке мельс: урьвакстомс-венчамс.
Сеть умонь иетнестэ сынь эзть пурнакшно свадьбазост ламо инжеть. Покш Игнатовань райононь Отяжелень велень советсэ сермадстомань тевенть ютавтомадо мейле пурнавсть кенярксчинть тешкстамо. Кудосост ульнесть сехте малавикс ломанест. Эдь сынь ульнесть студентт, арасель мелест совавтомс долкс тетяст-аваст.
Сеть шкатнестэ ды мейлеяк, аразьчинть лангс апак вано, одтнэ эрясть оймеде-оймес. Студентэкс улемстэ сынь эзть пеле чачтомс эйкакшт, эрьва ков сатотсь шкаст. Борис Журавлев тонавтнесь ансяк «ветес», ялгадонзо седе покш стипендия тензэ макссть. Сонзэ, кода ероков студентэнть, дипломонть идемадо мейле кадсть важодеме университетс, сон жо кочкась эстензэ лия ки.
Кода мерсь партиясь, истя тейсь
Борис Алексеевичнень косо ансяк эзь саво важодемс пингензэ перть. Вузонть прядомадо мейле трудовой пингензэ ушодызе Ташто Шайговань райононь Лемдяй велесэ совхозонь прявт инженерэкс.
1968 иестэ саезь ниле иень перть ульнесь Орданьбуень райононь Редкодубье велесэ «Ардатовский» совхозонь прявтокс, теде мейле – теке райононь райисполкомонь председателекс. Шкатне ульнесть а шождат, эрямось вешсь эште башка содамочить. Зярдо кучизь тонавтнеме КПСС-нь ЦК-нь Высшей партийной школав, сон покш мельсэ тусь тонавтнеме Московов. 70-це иетнестэ тосто самодо мейле сонзэ ладизь Теньгушевань райкомонь партиянь васенце секретарекс. Тевензэ ютасть парсте, ламо лезэ кандсь те райононь эрицятненень. Кода кортыть ломантне, бути парсте ютыть теветь вейке таркасонть, сестэ кучтадызь важодеме тов, косо тон эряват седеяк пек.
1979-1987 иетнестэ теке жо должностенть топавтсь Ицялонь районсо. Самай сонзэ пингстэ тосо стявтовсть Культурань кудось, сырань теемань предприятиясь, тосонь важодицятнень туртов эрямо кудот, райононь администрациянь зданиясь ды ламо лият.
Седе тов Борис Васильевич парсте тевензэ топавтсь истят ответственной тевтнесэ, кода: МАССР-нь мелиорациянь ды ведень хозяйствань министрань, Мордовской АССР-нь материально-технической снабжениянь Государственной комитетэнь (Госснаб) прявтонь ды лия.
Тейтерензэ Ирина Борисовнань ледстнематнень коряс, косо бу аволь саво важодемс тетянстэнь, семиясь свал сыргиль мартонзо! Оймсема читнень сон ютавтсь семиянзо марто. Вечкильть вейсэ вирев якамо, пангонь-ягудань кочкамо, пертьпельксэнь мазычитнень ванкшномо!
Текенень поладсынек, Валентина Максимовна тунь эзь кадово мирдензэ эйстэ, сон ламо иень перть важодсь специальностень коряс эрьва кодат таркатнесэ, тосо, ков кучилизь мирдензэ важодеме. Тешкстасынек, эрямонь пингест перть Журавлевтне кемголмовоксть полавтызь эрямо таркаст! Теке шкасто сон кенерсь улемс мелявтыця авакс весе ниленест эйкакшост туртов (весенень макссть высшей образования) ды вечкиця никс.
Неень шкане Журавлевтнень покш кенярксчист – кото нуцькаст ды кото правнуцькаст! Ютко шкасто эйкакштне свал бажить содавтомс вечкевикс ломанест, кепедемс сынст ежомарямост.
Валентина Юдина
Фототне саезь Журавлевтнень семиянь архивстэ