Вторник, марта 19, 2024
Важное

 

Покш Игнатовань райононь Вармазейка велесэ эрицятнеде лововить малав кавтосядт ломанть. Велесь аволь кадозь. Сон эри. Ды кода тешкстыть тесэнь эрицятне, эри сон секс, улить важодема таркат, ды аволь ансяк тесэнь, райононь ламот лия велетнесэ эрицятнень туртовгак.

Тевень максыцясь – Владимир Юрьевич Кабаевень крестьянонь-фермерэнь хозяйствась. Зярыя иеде икеле тесэ стявтсть-пурнасть ракшань трямонь ферма ды панжовсть важодемань од таркат.

Тешкстасынек, эсь хозяйстванть Владимир Кабаев ушодызе кемень скалсто. Аламонь-аламонь эсь стаданть покшолгавтызе комсь скалс. 2006 иестэ Кабаевтне сайсть 300 тыщат целковоень покшолмасо кредит. Неть ярмактнень лангс «Развитие семейных животноводческих ферм на базе крестьянских (фермерских) хозяйств» программанть лувсо стявтызь эсь васенце фермаст (100 скалс). Мейле «Семейная животноводческая ферма» программань грантонь ярмактнень лангс стявтовсь эштё вейке комплекс, мейле эштё. Те иестэ тесэ прядызь ракшатнень кизэнь шкасто кирдемань туртов комплексэнть тееманзо. Сон ашти ферманть марто шабрацек.

Шкась мольсь, хозяйствась кассь-виензась. Неень шкане тесэ роботыть 85 ломанть. Конат тескень, Вармазейкань, конат састь райононь лия велетнестэ, улить шабра Нижегородской областьстэяк. Течи хозяйствасонть лововить тёжадо ламо сюракшов ракшат. Потявтовиця скалтнэде – 450. Эрьвастонть сутказонзо потявтови малав 30 литрат ловсо. Фермерэнть кедьстэ сонзэ рами Саранск ошонь «Данон» компаниясь, конань марто важодить уш кеменде ламо иеть. Истя жо хозяйстванть улить моданзо. Седе покш пельксэсь эйстэст эсензэ хозяйстванть. Лиятнень жо саить арендас эрицятнень кедьстэ. Тень кисэ ломантненень эрьва ие максови сюро. Тень кувалма эрицятнененьгак паро, зыянов тикшесь а колы модатнень, хозяйствантеньгак ули ков сюронть-тикшенть видемс.
Ёвтама, хозяйствасонть ули весе эрявикс техникась: тракторт, комбайнат, сокамонь-видемань туртов агрегатт. Малав эрьва ие тракторонь-машинань паркось одкстомтови, рамави мезеяк од. Неень шкане те эрявикс тев, эдь од техникась тевентькак седе шождалгавты, сюронь видемстэ-нуемстэ ёмавкстнэньгак пек вишкалгавты.


Важодить тевень содазь

Владимир Юрьевич Кабаевень КФХ-нь фермасо неень шкане важодить скалонь потявтыцят, сюракшов ракша мельга якицят, зоотехник, электрик, механик, коромонь усксиця-кайсиця. Эрьвась эйстэст пек парсте содасы эсь тевенть ды важоди мелень путозь.
Пётр Константинович Французов вана уш 32 иеть важоди трактористэкс. Мерть, весе эрямонзо перть. Тесэнь хозяйствасонть жо котошка ие. Сонзэ тевезэ – фермасо ракшатненень тикшенть-коромонть ускомась.
– Ракшатнень луга лангс ливтемас важодян тракторсо фермасо, – ёвтни Пётр Константинович. – Усксян тикше, лия кором. Човориця миксерс, конась ракшатненень теи эрявикс ярсамопеленть, погрузчиксэ пештян силос, сенаж. Истя жо, бути кодаткак сталмот фермава эряви ускомс, тесэяк монтемень кодаяк.
Кизэнь шкасто Французов эсь тракторонть полавтсы «Дон-680» коромонь урядыця комбайнанть лангс. Важоди паксясо.
Сонсь цёрась шабра Од Кшуманця велень. Вармазейканть марто сынь аштить малацек. Икеле ламо иень перть истя жо трактористэкс роботась Игнатовасо «Мордовзерноресурссо». Роботась, зярс эзь пекставо предприятиясь.
– Паро, Владимир Юрьевичень КФХ-сь ули, ков эштё велень ломантненень молема роботамо, – корты Пётр Французов. – Районсонть важодема таркань коряс тевтне аштить а шождасто. Ве ёнов ардтнемась жо – те а тев. А стяко кортыть, кудонь трёшникесь томбалень целковойденть питней.


Эряви меремс, Французовтне тесэ мирдть-нить роботыть. Пётр Константиновичень низэ, Светлана Николаевна, малав уш кемень иеть хозяйствасонть важоди скалонь потявтыцякс.
– Скалонь потявтыцятнеде тесэ весемезэ кемгавтово ломанть ды эштё колмо ават – ваз мельга якицят, – ёвтни Светлана Французова. – Ней потявтомась моли чизэнзэ кавксть, эрьвантень явозь малав 60 скалт.
Светлана Николаевнань валонзо коряс, важодемань чист ушодови валскень вете чассто. Кудосто саить ды мекев кудов ускить машинасо. Кодаткак мелявкст арасть.


– Мон эрьва чистэ валскень колмо чассто уш пильге лангсан. Эдь роботамо туемадо икеле кудосо тевтнень эрявить теемс. Эсенекак ули скалонок, улить тувот, саразт ды лия ракшат. Сынь а кармить учомо, зярдо кудов сан, – тешксты авась. – Бути жо кортамс важодемадо, покш стакачить а марян. Кода илязо уле, неень шкасто скалонь потявтыцятнень тевест аламодо седе шожда. Ракшанть а андтано, алксост а урядатано. Тень весементь теить скалтнэнь ды букатнень мельга якицятне. Минь содасынек эсь прявт тевенек – потявтоманть. Тесэяк стакачить арасть, весемесь тееви неень шкань аппаратсо.
Кода мерсь Светлана Французова, чистэ эрьва скалось максы малав 30 литрат ловсо. Неть невтевкстнэ а берянть. Ды тесэ прявт ёнксось – скалтнэ хозяйствасонть племеннойть, ламо ловсонь максыцят.
– Покш сюкпря минек прявтонтень. Владимир Юрьевич ломанесь эсь тевень парсте содыця, чарькодиця ды превей. Сон машты важодеме ломань марто. А те пек покш тев, – кемексты Светлана Французова.
Зоя Алексеевна Абушева важоди ваз мельга якицякс. Тейтерь-авась истя жо шабра Од Кшуманця велень. Хозяйствасонть роботы уш сисем иеть. Ушодокшнось скалонь потявтыцякс. Роботась нилешка иеть, мейле кармась ваз мельга якицякс.
– Минек кардосонть вазнэтне вейке пель марто ковсто саезь ды седе покшкетне. Важодтяно тесэ колмонек: вазтнэнь андтано, симдтяно, ванськавттано алксост, – ёвтни Зоя Абушева. – Тесэ эштё вазтнэ кирдевить весе човор. Мейле жо, пельиешкань ютазь, букинетне саевить лия кардос, ведрекштне – лияс. Минь жо таго карматано якамо лиятнень мельга.

А вана Алексей Михайлович Козляков хозяйствасонть од специалист. Роботы зоотехникекс. Сонсь цёрась Темниковань райононь. Н. П. Огарёв лемсэ МГУ-нь Аграрной институтонть прядомадо мейле зярыя иеть роботась шабра Нижегородской областень Починковской районсо. Сась колмо ковдо икеле ды ней лади эсь важодема лувонть тесэ.
Ракша мельга якицякс КФХ-сонть важодить П. В. Абрамов, А. А. Алемаев, Е.Н. Луньков, В. И. Адушев, А. Н. Козлов, В. Г. Яушев, Ю.Н. Дергунов, В. В. Пизелев, А.В. Петкин. Электрикень тевенть топавты А. Д. Курченков, стакасто топавтовиця процесстнэнь коряс механикекс ловови В. А. Дорофеев.
Весе сынь чиде-чис паро мельсэ ды оймень путозь теить эсь тевест ды ёвтыть сюкпря В. Ю. Кабаевнень. Сюкпря важодема таркань максоманть ды эсь велень ванстоманть кисэ!

Юлия Еремина
Фототне: Эдуард Ретунский

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».