Вторник, марта 19, 2024
Важное
Ды арась кодамояк салавачи – лавкасто рамазь чаесь а полавтсы сень, кона теезь тикшестэ. Кодат технологият эрявить содамс чаень теемстэ? Кода витемс шумбрачинть эрявикс тикшесэ ды стувтомс аптекав кинть? Кода вадрясто удомс ды неемс мельстуиця онт? Теде парсте соды Артём Петров тикшень пурныцясь. Ловнодо сонзэ марто интервьюнть.

– Артём, видькстак, кода умок тонь седейсэ кирвазсь тикшетненень вечкемась?

– Тикшень пурнамо ушодынь эйкакшпингстэ. Мон чачинь ошсо, а касынь велесэ, сырькайтнень кедьсэ. Мон – эрзян. Тетям – эрзя. Сон чачсь Семилейсэ. Сеедьстэ вишкинестэ монгак ардтнинь бабанень, ды нейгак, кода несак, тесан. Омбоце сырькаем – Торбеевань мокшава. «Пыль китайских дорог» (истя Артём корты рамазь чайде) кудосо минь зярдояк эзинек симне. Сырькайтнень марто, седе ламо Торбеевансенть, свал якинек паксява ды вирьга тикшень пурнамо. Сынь ёвтнесть монень тикшетнень лезэвчидест.

– Тикшетнень ютксо улить вечкевикст?
– Мон вечкса нартемксэнть. Вечкеви чинезэ. Те тикшесь пек виев лезэв ёнксонзо коряс.
– Костят теленень? Мон ванса, тонь те тикшеденть верьга пек ламо понгавтозь.
– Арась. Седе пек кирдян, эряви меремс, кода мазылгавтомапель ды, нама, чиненть кисэ. Сайнян баняв, аромапрактиканть туртов. Эйстэнзэ тейнян порошок: човорян нартемксэнть сезялтикшенть ды сыряжнянть марто. Истя ванськавтови рунгонь потмось. Порошокось лиси пек сэпей, секскак «кургозот а саеви». Пек паро карми, бути теемс капсулат. Истя седе шождасто нилеви.
– А тон рамсят лекарстват аптекасто?
– Арась, а рамсян.
– Лисни, бути весе тикшетне – ормань менстиця паро надобият, тон маштат кочкамо юткстост эрявикс, саемга, кирьгапарень орматнень эйстэ?
– Истя. Тенень эряви содамс, мейсэ ломанесь сэредсь вишкинестэ ды кодамо сонзэ верезэ. Ансяк мон те тевенть марто а сюлмсеван, бути кортамось моли лия ломантнень ланга. Практикасон те арась. Мон, седе пек, – тикшень кочкиця.
– Тон тенень тонавтнить?
– Арась. Образованиянть коряс мон энергетикан. Тикшень пурнамось ды чаень теемась – мельспаросо юткошкань ютавтома. Истя меремс, оймень витеманть туртов.
– Артём, ёвтык, зярдо ушодови тикшень кочкамось?
– Шкась свал полавтневи. Те кодамо иесь пры. Эрьва тикшентень – эсензэ шка. Эйзюрковсто кочкить килеень пургондавкст. Чадыковсто – цецяпрят, одавань тикше, пеште чувтонь пилекст. Сёксня, зярдо седе ламо юткошкам, пурнан тюжа цецянь, тазкорёнонь, боза тикшень ды лия ундокст. Тесэ эряви ваномс ковонь фазанть лангс. Те пек эрявикс тевесь. Мон ванан ковонть мельга: кода сон карми пешксе, саян койме, сеске кадан весе тевень ды эрязасто ардан вирев.
– Чить, арсян?
– Нама, чить (авт.: мизолды). Ардан ундокстнэнь таргамо. Пешксе ковонть шкасто сынст потсо сехте ламо лезэв микроэлементт ды эфирной ойть. Ве чи алтат те тевентень – иес таштат.
– Артём, ней тонь ули тикшень костямга ды чаень теемга эсеть производства. Кода те ушодовсь? Умок?
– Ушодовсь те аволь пек умок – 2015-це иестэ. Сестэ мон понгинь «Инерка» бизнес-форумов. Теевинь содавиксэкс эрявикс ломань марто. Ледстнян, эринек лагерьсэ палаткасо. Тов сакшность Россиянь лия регионтнэстэ спикерт ды преподавательть, конат ёвтнесть тенек эрьва кодат паро мельть-арсемат эсь тевень ушодоманть ланга. Сынь ютавтнесть тренингт, бизнес-пелькстамот; тейнесть нетворкингт, аутотренингт. Вана истя, сестэ, мелезэнь ледсь сырькайтнень марто паксява якамось. Ды мон «кирвазинь» те арсемасонть. Мон ловнынь ламо эрявикс книгат, ванынь ды ванан эрьва кодат мастер-класст. Свал сюпалгавтан содамочинь вечкевикс тевенть коряс.
– Самай сестэ тон ушодыть, истя меремс, «профессионально» тееме васенце чайтнень. Содаса, те ульнесь ерохейтикшень чаесь. Истя?
– Истя. Сестэ аламодо седе стака ульнесь. Кодамояк оборудования тень туртов арасель. Тикшень лопатне коськсть седе стамбарнэ.
– Ней ванса, Артём, тесэ тонь цела производства. Ёвтнек весемеде мельга-мельцек.
– Чаень теемстэ, весемезэ, ниле эскелькст. Васняяк, тикшесь пурнама. Молема паксяв, вирев.
Седе тов лопатнестэ эряви ливтемс а эрявикс летькенть. Малав 30 %. Лопатне костямат. Эряви тешкстамс, те кизэнть, окойники, монь появась ерохейтикшень лопань костямонь аппаратось (авт.: невтни монень). Куватьс арсинь ды вешнинь ломань, кона машты сонзэ тееме, а лиссь – сонзэ вешнемскак эзь эряво, эрясь шабра велесэ, ней тесэ, Семилейсэ. Покш сонензэ сюкпря. Лопатне каявить аппаратонтень, ды механизмась ушоды эсь тевензэ. Истя ерохейтикшень лопатне коськить седе эрязасто.
– Ламо шка тень лангс туи?
– Тень лангс тукшны малав 6 част. Эряви ваномс пертьпельксэнть лангс. Бути пси ды коське – эрязасто лопатне пужить, а вана бути летьке – сестэ седе куватьс учома.
Мельга молиця эскельксэсь – лопань тапардамось (процесс скрутки чайного листа). Тенень эряви 30-шка минутат. Бути коштонь давлениясь алкине ды арась чипай, лопась а тапардави. А миненек эряви «яжамс» тикшень клеткатнень ды ливтемс начконзо. Те эскелькссэнть – чаень лопанть мазычись. Мон ламо важодян тень лангсо. Эряви, штобу лопась мазыйстэ тапардаволь. Мезекс те эряви? Зярдо коське лопатнень каясыть лакиведентень, сынь стамбарнэ ды мазыйстэ потсонзо панжовить.
– Артём, а неть партне мезекс эрявить (авт.: невтян чувтонь партнень лангс, конат аштить туворонть ало)?
– Вана самай сынь эрявить мельга молиця эскельксэнть туртов. Ферментациянтень. Пекшень партнень теинзе содавикс чувто ланга керсицясь Пётр Рябов. Мон арсян варчамс лия чувтостояк теезь парть. Те максы чаентень лия чине ды тансть. Вансынек, мезе тень эйстэ лиси. Сеске мерян, тикшень лезэв ёнкстнэ а ёмить.
Чаень лопанть мон, сехте сеедьстэ, путан поень парьс, 8 часос. Те шканть мон кочкия монсь. Тейнинь экспериментт Чижевскоень лампанть-коштонь ионизаторонть лезксэнзэ вельде. Ванынь лопанть лангс микроскопонть пачк. Кой-кить кирдить кавтошка чить. Мон – 8 част. Те саты. Эряви меремс, ферментациясь карми молеме ансяк лембе таркасо – 15 °С ды седе ламо. Якшамосо тевесь а лиси.
Ферментациядо мейле лопатне, нама, начкот. Сынст эрявить костямс. Лиякс – чапаськадыть ды а кармить маштовомо. Лопатнень мон вачкан лотокс ды путан костямонь шкапс. Тесэяк улить салавачить. Аволь весе тикшетне вечкить сэрей температурат. Пек костявтомс а эряви. Сестэ лезэв ёнкстнэ ёмить. Саемга, ерохейтикшенть мон костян 70 °С температурасо 3 часонь перть. Сеске мерян, весементь седе паро теемс пси ды коське шкане. Зярдо летьке, бажан теемс кодаткак лия тевть. Саемга, тенстть баняв.
– Артём, улить сеть, кить рамсить чаенть тонь кедьстэ свал?
– Улить. Те аволь ансяк велень ломанть. Ерохейтикшень чай монь кармасть рамсеме Саранскоень кой-кона кафетне ды ресторантнэ. Ды, сынст валост коряс, ламо инжетне велявтыть сыненст чаень симеме. Аштян мельспаросо тень кувалма.
– Неень шкась, кона сюлмазь коронавирусонь эпидемиянть марто, кадынзе ламотнень важодема таркавтомо, ярмактомо. Тонь кода тевтне тень марто ульнесть? Стакачинть марик эсеть лангсо?
– Видьстэ меремс, арась. Мекевлангт, лездась кода-бути. Орматнень марто ломантне кармасть рамамо седе ламо тикшень чайть. Чайтнеде монь малав 40 позицият. Сёксня яла лован, зяро мезе ули. Тикшетнеяк эрьва кодат пурнатано.
– Стака? Лездыцят улить?
– Козяйкам лезды ды велень вете цёрынеть. Монь журналомгак ули. Тов сёрмадан, кие зяро ды мезе пурнась.
– Саемга, мезе тедеде ламо ульнесь? Кодамо тикше?
– Мон ардтнинь Кочкур буень ламо паксятнень ды виртнень. Кода тешкстынь, пек ламо ульнесь чай тикше, цяпор.
– Кочкур буеде башка, куваяк ардтнят тикше мельга?
– Кода эно? Покш Вьясось, Березниктне, Торбеевась – пек паро таркатне.
– Зярс моли тикшень пурнамось?
– Кизэнть пес. Саемга, пейделькатне истя касыть. Минек ули эсенек паксянок, ков озавтнетяно те цецянть. Течи пек стака муемс аптекасо алкуксонь ромашка. А сонзэ, эряви меремс, сеедьстэ рамсить. Аптекань пейделькась човорязь ламо лия тикше, видсть, мода, кевть ды мик унжа марто. Ды те чарькодеви, комбайнатне ды трактортнэ а кармить кочксеме вейкень-вейкень. Тосо покш производства. Ансяк парочиськак теде а кадови «пейделькань» чайсэнть. А мон цецяпрятнень домкасто пурнан. Костян сынст а покш банясо, конанть арсия монсь. Лездасть тетям ды покштям.
– Артём, а чайде башка мезесь лезэв рунгонтень?
– Тейтяно комолянь тодовт. Сынь лездыть парсте удомс. Эряви меремс, тикшетнень ютксояк, эрсекшнесь, пек парсте матедевкшневинь (авт.: мизолды). Тедеде вана теинек эрьва кодат вареният: пичеумарень, инзеень, раужо шукшторовонь, мастумарень ды пиже помидоронь.
– Ммм… Нама, пек тантей. Паряк, ярсамопелень выставкав-невтемав свал тердить эйсэть?
– Невтемав кармасть тердеме эйсэнь 2018-це иестэнть саезь – «Золотая осень» ВДНХ-со. Мелят ульнинь Московсо, «Золотая осень» выставкасо; «АгроТех-Мордовия 2020» регионъютконь невтемасонть. Теде башка, эрьва иестэ Саранскойсэ юты «Чайные бега» благотворительной акциясь.
– Сюкпря, Артём, кортамонть кисэ. Ней ковкерькссэнть сёксь, таштамков. Нама, те шкас ерохейтикшень чаень микроферментацияськак ютась ды самай шка сондензэ симемс.

Ольга Шабанова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».