Пятница, марта 29, 2024
Важное
Те шкане тесэ коштось ванькс, экше. Чувтотнень лопаст артозь сырнень тюссо. Якат сёксень вирьганть, ванкшнат пертьпельга, кенярдат неезентень, а зяро пангот касыть… Кодат ансяк а вастневить: пичень, поень, лейксэнь, килеень, кавалонь, ашо пангот, опёнкат ды ламо лият. Сетненень, конатне а содасызь ярсамо панготнень, нама, вирев эряви якамс содыця ломань марто.

Панготнестэ кой-конатне ушодыть «кенереме» сеске тунда ды касыть овсе позда сёксес. Аштемковонть ушодовомсто аламошкас «оймсить». Нама, сынь вечкить сатышка летьке марто лембе шка, штобу читькак-ветькак пертьпельксэсь улезэ лембе, вармавтомо. Пек летьке ды пек коське мода лангсо сынь а касыть. Те кизэсь ульнесь аволь пангонь коряс, секскак ламо пангот эзть касо. Вана сёксень пиземетне алтыть ламо пангот. Пангонь сехте содавикс тешксэсь: бути валске марто, эштё седеяк вадря пиземеде мейле, моданть лангс ацави тусто сув – сеске сыргадо панго мельга! Кемемизь, янксеме а карматадо…
кува касыть?

– Вирень опёнкатне касыть килейтнень, тумотнень ды пешксчувтотнень ало, сеедьстэ мукорь лангсо, керявтка, лиясто сынь касыть сыре чувтонь лазкссо. Лугань опёнкатне, нама, касыть тикше потсо, чипаень токамо таркасо ды вирень янтнэнь ды китнень чирева. Содадо, бути пертьпельксэсь карми вадря, опёнкатне касыть аштемковсто саезь позда сёксес.

Лейксэнь ды ашо панготне касыть вирень лашмотнень ды латкотнень чирева, раужотне – латкотнень потмакска.

Вана кода ёвтни пангодо содамочидензэ ды вирьга якамодонзо Вера Викторовна Киушкина – Парынзэле велень эрицясь, велень фельдшерэсь, кона юткошкасто пек вечки панго мельга якамо:

– Килейпанготне ды суропанготне лия панготнень коряс а эрсить суксовт, сынь касыть килеень ды човор чувтонь виртнесэ, чуросто – пичевиртнесэ. Суропанготне касыть чуваров модатнесэ ды вирьчиретнесэ, килейтнень, тумотнень, кузтнэнь ды пичетнень малава. Боярпанготне сеедьстэ вастневить килей марто човор пичевиртнесэ, а човор чувтонь виртнесэ касыть килейпанготне ды пойпанготне.

– Вера Викторовна, а пичепанготнеде ды наволо панготнеде мезе ёвтатадо ловныцятнень туртов? Эдь содан, пек вечктядо сынст кочкамо…

– Нама, вечкан! Покш Березник ёнкссо ламот вечкить пичепангонь кочкамо, эдь сынь сеедьстэ вастневить минек таркань виртнесэ. Касыть сынь пичевиртнесэ, од пичепулотнесэ, истя жо чуваров модасо, вечкить оля ды нупонев таркат. Пичепанготне касыть куросо пиче чувтотнень эйстэ пелевеёнксонь таркатнесэ. Наволо панготне пичевиртнесэ свал вастневить. Кудосо ванськавтомадост мейле, сынь пек тантейть пачалгосо ой марто рестазь, эштё седеяк тантейть, зярдо юткозост каят аламошка модамарть. Ансяк наволо панготне пек курок суксыить, секскак кочкамстост пек ванома.

– Вера Викторовна, мезе тынь эштё ёвтатадо пангонь кочкицятнень туртов, кода Парынзэле велень ФАП-нь фельдшер?

– Инескеть, вирев молемстэ оршадо пертьпельксэнть коряс, прянк улезэ вельтязь, пильгезэнк карседе резинкань сэрей кемть. Вирьга якадо апак эрязкале. Эдь ламот эйстэнек вирев яксить аволь ансяк пангонь кочкамо, истя жо оймсеме ды ванькс коштто лексеме… Содадо, гуй ды идем ракша марто вастомга, вирев ськамонь-ськамонь а яксить. Илядо пек тандале истямо инже марто вастовомсто, састынькине туеде эйстэдест ве ёнов, а бути уш мезеяк лиси – рангстадо ялганк туртов.
Содадо, панготнестэ седе ламотне касыть куросо. Секскак, бути мутадо эйстэдест кавто-колмо, састынькине ванкшнынк маласо аштиця таркатнень, паряк, эштёяк мутадо зярыя. Саеде ансяк сеть панготнень, конатнень парсте содасынк, ды а кавтолдтадо, што сынь ярсамс маштовицят. Илядо сае суксовт, пек покшт ды сыреть, эдь сынст эйсэ свал пурнавить седе ламо токсичной веществат. Илядо кочка пангот шукшпря, калмазырь вакссто: сынь саить весе пертьпельксэнь компоненттнэнь, конатне кандыть покш зыян минек шумбрачинтень.
– Покш сюкпря тенк, Вера Викторовна, превс путоматнень кисэ.

Мила Богатова.
Покш Березникень район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».