Юлия Явкина: «Эсь вечкевикс тевем муия ойменть тердеманзо коряс»

Подробности: Категория: Литературная страница; Опубликовано: 26 июня 2025

Вечкевикс ловныцят, поладтано Орданьбуень райононь Низовка веледенть евтнематнень. Велесэнть васенце ловномань кудось панжозель 1933 иестэ, конась аштесь ютазь пингень 80-це иетнес. «Избачокс» тосо сестэ важодсь Дмитрий Николаевич Клементьев.

Мейле, кода 1984 иестэ стявтызь од клубонть, тов ютавтызь велень библиотекантькак. Самай Вера Ивановна Клементьева, конадо домкасто евтнезель газетань ютазь номертнэсэ, кармась тосо библиотекарекс. Сон тонавтнесь Орданьбуе ошонь культпросветучилищасо «библиотечное дело» специальностенть коряс, мейле заочна – Н.П. Огарев лемсэ филологиянь факультетэнь эрзянь отделениясонть ды кувать важодсь школасо эрзянь келень тонавтыцякс. Сон кепедсь велесэ эрзянь келенть, вельмевтинзе койтнень-кирдатнень. Сындест мейле библиотекасо важодсь Низовка велень эрицясь Надежда Дементьева, мельганзо – Ирина Дементьева. Ней ветеце ие тосонь азоравась Юлия Явкина. Библиотекасонть таштавсть малав 7 тежат книгат. Зярыяксть иезэнзэ фондось пештяви од книгадо. Вишка эйкакштнень туртов библиотекань нупальсэнть теезь налксемань кужине.

Пек паро, ней библиотекась ашти школань зданиясонть. Юлия Михайловна директоронь советникенть Ольга Валентиновна марто вейсэ тонавтницятненень свал ютавтнить мельстуиця мероприятият. Юлия Михайловна вишкинетнень содавты эйкакштненень алтазь книгатнень марто, поэттнэнь ды писательтнень юбилеезэст анокстакшны мельстуиця материалт. Тесэ свал келейстэ тешкстави Эрзянь келень чись. Эйкакштне эрзякс ловныть, ансяк, мезесь ризнэвти, пек аламо. Тувталось теке – тетятне-аватне эйкакшост бажить тонавтомс кортамо рузкс. А чарькодеви тенст, кодамо те сюпавчи, содамс сеске кавто кельть. Эдь тиринь келень содамось лезды рузонсентькак седеяк вадрясто тонавтнемс. Те пек паро, зярдо сынь содасызь рузонь келенть, ансяк тиринь, тетянь-авань келенть истя жо эряви содамс.

Юлия Михайловна чачсь Низовкасо, школанть прядомадо мейле ламо косо тонавтнесь. Васня Ицялонь педучилищасо начальной классонь ды теке шкасто эрзянь келень ды литературань тонавтыцякс. Зярыя шкань ютазь заочна поладызе тонавтнеманзо Н.П. Огарев лемсэ МГУ-нь филологиянь факультетэнь эрзянь отделениянь магистратурасо. Лиссь мирденень эсест велень цера экшс, трить-кастыть кавто эйкакшт. Церазо тедеде прядсь 10-це класс, тейтерезэ – 2-це.

Библиотекарень тевс кундамодо икеле Юлия Михайловна важодсь зярыя таркава. Москововгак пачколесь, ялатеке велявтсь тиринь велев, 7 иеть важодсь спортшколасо шожда атлетикань коряс тренерэкс. Нама, те тевентеньгак савсь васня тонавтнемс. Эсь прядонзо Юлия Михайловна пейдезь корты: «Мон «универсальной» важодиця, весе таркатнень ютынь: Культурань кудо, эйдень кужо, школа, ды ней ветеце ие – библиотекасо. Пек вечкан котьмамо книгатнень ды эйкакштнень марто, лисни, муия эсь прям те тевсэнть». Юлия Михайловна секе-тев мазылгавты библиотеканть кодамояк артовкссо, умонь шкань ули-паросо, кодамояк сувенирсэ эли викшнезь нардамо пацясо, конатнень макснить велень эрицятне. Ней библиотекань нупалесь тесэ прок вишка музей, косо эсь прят марят теке велень кудосо.

Эряви тешкстамс, Юлия Явкина, важодемадо башка, уш 13 иеть кода морси Низовкань «Цековне» ансамблясо. Киштема тевесь вечкевсь тензэ уш вишка пингестэ саезь. Ледстни, кода ветешка иесэ тетянзо ендо бабазо сайнизе инжекс эсь ялганзо туртов, конанень мерсть Бедной Надя. Сонзэ вальмалонзо аштемстэ авась яла кармавтылизе вишка тейтерьканть: «Юля, эрьга тенек киштть!» Сонсь ушодыль морамо, эйкакшось – киштеме.

Морамонтень вечкемась, кода мельспаросо ледстни Юлия Михайловна, ютась тензэ семиясто:

– Монь вечкабабам, Мария Николаевна Ермолаева, пек вечксь киштеме ды морамо. Кода ледстяса, свал эрьгесэ яксиль, чамабоканзо сеедьстэ якстерькайсэ ваднилинзе – истя мазыекс бажась улемс. Свал сельмес каявиця оршамосо якась. Пек вечкилинь мельганзо ваномо, кода сон эсь прянзо наряжась, чаманзо артсь. Свал арсинь, кода касан, монгак истямо мазый карман. Мейле, уш сыредезь, авам, Татьяна Борисовна Клементьева, кармась «Цековнесэ» морсеме. Монгак мартонзо репетицияс свал яксилинь. Сестэ эште Г.К. Приставкин ансамблянть прявтсоль. Пек вечкилинь эрзянь оршамопельтнень. Авам таргилинзе, мон штюпсинь-ванкшнынь эйсэст. Авам мурниль эйсэнь: «Илить токше, сынст марто ванстозь эряви…» Сестэ карминь эйстэнзэ салава наряжакшномо… Музыкальной инструментэст тосо эрьва кодат ульнесть. Сыньгак пек мелезэнь тукшность.
Ансяк авам аволь куватьс морсесь тосо. Тензэ ульнесть 28 иеть, кода тетянзо, монь вечкадедань, чавизе пурьгине. Те зыяндонть мейле сон лоткась морамодо допрок. Теде мейле монень сась мель совамс ансамблянтень. Пек уш вечкеви тень эрзянь келесь ды эрзянь моронть мазый гайгемазо!

Тешкстасынек, Юлия «Цековне» ансамблясонть аватнень ютксо сехте од морсиця. Ероков од авась кенери эрьва ков: важодеме, эйкакшонь трямо-кастомо, ансамблясо морсеме… Ды мезесь сехте прявтось – эрьва тевесь тензэ оймень коряс. Вана истят сынь, уцяскав ломантне – эрить вечкевикс тевест топавтозь!

Марина Агафонова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».