Четверг, декабря 08, 2022
Важное



«Эрзянь литературасонть ули пелькс, кона а моли лиятнень ёнов. Те секс, эдь сонзэ теить тейтерь-аватне, конатнень, содазь, эрямонть ды мирэнть-масторонть лангс эсест вановтост, эсест ёжомарямост ды мелест-арсемаст.

Сынь сюпалгавтыть тиринь литературанть од темасо, сёрмадомань од лувсо, тюссо-артовкссо, ды истямо ладсо седе тов кепедить сонзэ художествань-эстетикань сэрензэ».

Истя сёрмады вейке эсензэ статьясонть эрзянь покш учёноесь, литературоведэсь В. И. Дёмин («Сёрмадан эйстэнк, тиринь ломанть, вечкезь», Саранск, 2010). Седе тов Василий Иванович ледстинзе сеть аватнень лемест, кить покш путовкс тейсть ды теить минек литературанть сюпалгадомасо ды верев касомасо. Неть, васняяк, Е. Кривошеева, Ф. Беззубова, А. Жулюпкина, Е. Афонькина, П.Исаева, Е. Денисова, К. Петрова, Н. Киржайкина. Сынст тевест поладыцятне М. Биушкина, Т. Тимохина, С. Люлякина, А. Сульдина… Неень шкасто литературань паксянть велькссэ весемеде валдосто цитниця тештетнень юткс совавтызе Татьяна Мокшанованьгак.

В. И. Дёмин, кода свал, эзь маняво. Татьяна Мокшанова сеть сёрмадыцятнень ютксто, кить алкукс сюпалгавтыть ды седеяк верев кепедить эрзянь поэзиянть, пештить эйсэнзэ од тюсто, эрямонть лангс эсест вановтто, максыть тензэ од лексема. Кодат виевть, смустевть Мокшановань кедь алдо лисезь валморотне, кармат содамо, зярдо ушодат ловномо сонзэ од пусмонть, кона лиссь тедеде (2022 иестэ) истямо лем ало – «Оймамо тарка».

Сетненень, кить бажить муемс оймамо тарка

Эрьва ломанесь эрямонзо перть вешни истямо тарка, косо ойментень улевель седе шожда, косо седеесь пешкедевель певтеме кенярксто. Истямо таркакс васняяк ловсак се ёнксонть, косо чачить ды касыть. Татьяна Мокшановань туртов – те Баганя велесь, кона Самара ёнксонь Шенталань буесэ. Тосо ютась эйкакшпингезэ. Чачома велесэнзэ тейтересь васенцеде маризе эрзянь келенть гайгеманзо («Авам эрзянь кельсэ корты эйкакшпингстэ», 118 с.), тонадсь нееме ды редямо пертьпельксэнть мазычинзэ («Чиньжарамо», 114 с.), чарькодеме эрямонть танстензэ ды питнензэ («Зярдо вень чоподась срады-солы…», 91 с.).
Татьяна ней эри Саранскойсэ. Эсензэ велень школанть прядомадо мейле сон сайсь мель самс Мордовияв, максынзе документэнзэ се вузонтень, косо тонавтыть эрзянь келенть седе парсте ды келейстэ содамо. Истя кармась Н. П. Огарёв лемсэ МГУ-нь филологиянь факультетэнь эрзянь отделениянь студенткакс. Те ульнесь 2001 иестэ. Вете иень ютазь (2006 иестэ) прядызе тонавтнеманзо якстере диплом марто. Сонсь уцяскась ветизе «Чилисема» журналов, косо топавты прявт секретарень тевтнень. Ютазь иестэ кочказь Мордовиянь Сёрмадыцянь вейсэндявксонь прявтокс. Касты содамочинзэ Н.П. Огарёв лемсэ МГУ-нь финнэнь-угрань литературань кафедрань аспирантурасо.


Нурькинестэ мерезь, Татьяна Петровна седе а ков кеместэ сюлмазь Мордовиянть марто. Эсензэ чачома велев пачколи чуросто. Теке марто эсензэ ледстнематнесэ ды арсематнесэ сон, кода велесэ чачозь лия ломантнеяк, свал тосо, косо чачсь, кепе чийнесь чевте луганаронть ланга, лексесь тантей коштто («Эх, кодамо коштось», 122 с.), ярсась аванзо кедьсэ паневть кшиде («Те масторсонть, косо чачинь-касынь», 128 с.), седейшкава кортнесь шкинень тетянзо марто («Тетянень», 100 с.). Неть ледстнематне ды арсематне валовсть валморос, конатне эждить, оймавтыть кода эсензэ сёрмадыцянть, истя сынст ловныцятненьгак. А стяко валморонь пусмонтеньгак Татьяна Мокшанова макссь истямо лем – «Оймамо тарка». Те пусмось алкукс седе пек эряви сетненень, кить бажить муемс истямо тарка, косо стувтовить апаро мельтне, седейстэнть паневить стака ризкстнэ, оймесэнть карми седе шожда ды валдо. Истя эрси сестэяк, зярдо мештесэть апак учо карми «гувномо ине вечкема» ды те шкастонть тонсь а содат, ков туемс те ёжомарямонть марто. Седе паро ули, кода сёрмады Т. Мокшанова «Оймамо тарка» валморосонзо:
Весень кадомс ды туемс
Мельгат васоло янга,
Мештеёжостот муемс
Эстень оймамо тарка. (34 с.)

Седеентень пшкадема

Пусмонть а ловсак покшокс. Эйсэнзэ 150 лопат. Малав зняро жо валморот. Сынь явозь кувтань-кувтань. Омбоцесэнть, кона лемдязь «Илядо жаля кавто лембе валт…», максозь истятнэ, конатнесэ поэтессась терди ловныцянть кемемс эсь вийтнес («Кемть кеместэ!», 18 с.), кандомс «валдо ёжо кудоюртов» («Кавто лембе валт», 19 с.), варштамс эсь седеень потмаксос («Седеентень пшкадема», 24 с.).
Меельце валморось а кадсы мельтеме киньгак. Сонзэ ловнозь, эрьвась, секень вант, арсезеви эсь прядонзо, седе, кода сонгак пшкалесь, ды аволь вестькак, эсь седеентень ды энялдсь икелензэ цидярдомс натой сестэяк, «зярдо мештес сэпей ёжо педи, пупи, разди ойме, кажот коды…» (40 с.).

Эрямось – аволь ансяк тантей сюкородо пекень пештямо ды сон «аволь свал вадезь ойсэ» («Валт а марят…», 40 с.). Эрьва мезть эрсить сонзэ молемстэ. Весемеде пек тень пингстэ майси седеесь. Лиясто сон а цидярды, лотки кемемеде, карми казякадомо, туи эйстэнзэ эрямонтень кенярксоськак. Неть ёжомарямотне, паряк, ютасть поэтессанть седеензэ пачкаяк. Секс сон энялдозь энялды седеентень:
Иля лотка, седей, кемемеде!
Иля лотка, седей, талномодо!
Иля лотка, седей, вечкемеде!
Иля лотка, седей, эрямодо!
(24 с.)

Васенце таркасо –вечкемась

Те пусмось Т. Мокшановань колмоце. Васенцетне лиссть истямо лем ало: «Эрьге керькс» ды «Толонь лопат». Эйзэст совавтозь валморотнесэ авторось невти потмо ёжонь талноманзо, пертьпельксэнть мазычинзэ, эрямонть питнейчинзэ. Весе неть арсематне поладовить од пусмосонтькак. Теке марто кепедевить лия, од, неень шкантень ладиця кевкстематкак.
Од пусмонть лангонзо коряс уш чарькодят, мезесь весемеде пек талновты поэтессанть. Кода эрьва од ломаненть, сонзэ седейсэяк васенце таркасо ашти вечкемась. Эрямонтень, пертьпельксэнтень, тиринь ёнксонтень. Артовксоськак корты текеде. Кавто од ломанть, кедте кедьс кундазь, вейсэ сыргасть покш эрямо кияванть. Сон аволь свал эрси виде ды шожда. Тей пурды, тов велявты. Эрьва мезть вастовить лангсонзо: луткот-латкот, лушмот-лашмот. Савкшны весе вийтнень путомс эрьва кодат стакачитнень печтямсто-цидярдомсто. Теке марто улить лия кить. Вейкесь – те се, кона вети тиринь кудов.

Косо учить эйсэть, вечкить,
кемить,
Косо сех мазыйстэ чачни чись,
Косо мелень ванозь
ледстнить леметь,
Тов таргави свал тердиця
кись. («Кудов ки», 7 с.)

Эли вана неть валрисьметне, конат седе а ков виевстэ панжить се ёжомарямонть, кодамо печти эрьва ломанесь васоло килангов сыргамодо мейле:
Килангом васоло.
Састо валги экше.
Чись стамбаро олы,
Виренть экшес кекши.

Пельнесь тарги милеть,
Вешни ёнкс венчкезэ.
Кинть чирева килейть
Ваныть седеезэнь.

Пачк ютаса моданть,
Чанстев улян теке.
Кеман. Вечкан. Содан:
Ким таргави мекев. (9 с.)

Кодаяк а кекшевить нусманя мельтне-арсематнеяк, зярдо неят, кода чами тиринь велесь, сырелгадыть эрицятне, сырекс ды нурьгамозь неявить касыця чувтотне ды пандо чаматнеяк.
Ков а каясак варштавксот,
Теке мазысь сти икелеть:
Китнень кувалт чиить
каршот
Уроз паксят, чаво велеть. (12 с.).

Сёрмадыцясь кода илязо снартне кекшемс сень, мезе моли эсензэ эрямосо, кода ладязь тевтне эсензэ кудосо, весемесь ялатеке а кекшеви. Ды тень теемскак а мезекс. Валморотне седе шождасто совить ловныцянть оймес, зярдо эйсэст сон мари мезе-бути истямо, мезесь сонензэяк содавикс ды малавикс, зярдо ёвтазесь кармавты талномо, мелявтомо ды, паряк, ризнэмеяк. Сеедьстэ неть ёжомарямотне лиснить оймесэ кирвазезь вечкеманть кувалма. Сон, вечкемась, аволь свал канды кеняркст ды седеень тантейстэ китордома. Сеедьстэ вечкеманть кувалма лиснить истят тевтькак: «оймем сезевсь, домка латкос прась» («Седейпотсон монь толпандя палыль», 36 с.), «вечкеманть танстезэ сэпей-сэпей» («Онстом вармакс ливтнинь верьга-верьга», 37 с.), «новольсть кедень, сизинь, видькстан…», 38 с.), «сэрей пандопрясто ёжось кеверсь, томбавсь» («Ки эйстэнек чумось», 39 с.), «мелеть ванозь, дугай, кискакс сизинь» («Валт а марят…», 40 с.).

Вечкемань «ормась» аволь сеске юты. Сеедьстэ пингеть перть сон а стувтови, карми ледстнеме натой сестэяк, зярдо «од вечкема вельми». Сонгак, те вечкемась, эрси аволь кувать.
Печтясак… Нолдасак…
Юты иредемат,
Ды кадови ансяк
Оймень сэредема («Оймень сэредема», 41 с.)

Ёжонь тёкш

Нилеце кувтантень поэтессась пурнынзе сеть валморотнень, косо вечкемась невтезь седеяк мазый ды талновтыця валсо. Ловныцянтькак сынь кармавтсызь талномо. Ванодо, кода мазыйстэ ды видестэ Мокшанова маштсь невтеме вечкиця тейтеренть потмо ёжонзо, зярдо вастовсть вечкевиксэнзэ марто:
Вень менельсэнть ковось
Ожо-ожо…
Тапардызе оймем
Лембе ёжо…
Кутмордымим псистэ
Эрзянь цёрась.
Сезевсь модань кистэ
Оймем моразь. (44 с.)

Лангс ваномс, тесэ мезеяк истямо арась. Ды ялатеке неть валтнэ кармавтыть талномо ды ледстнеме, кода тонсетькак оймесь кепетевиль менелев ды аволь кодаяк, кепетевиль «моразь», зярдо кутмордылинзить вечкиця цёра. Седе тов ловнозь, седеяк вайкстават:
Вень менельсэнть ковось
Ожо-ожо…
Тапардызе оймем
Лембе ёжо…
Кутмордымим псистэ
Эрзянь цёрась.
Кавто седейть
Вейке моро морасть. (44 с.)
Алкукс, седе мазыйстэ ды превейстэ а ёвтасак!

(Поладксось сы номерсэнть).
Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».