Вторник, марта 19, 2024
Важное

Течи, мартонь 25-це чистэ эсь кенярксчист тешкстыть культурань ёнкссонть важодицятне. Течинь чине минек республикасо культуранть марто сюлмавозь тёжат ломанть. Сынст юткс кандовить Ицялонь «Вастома» ансамблянь артисттнэяк.

Морыцятнеде тесэ аволь ламо, весемезэ вете ломанть, ансяк эсь тевтееманть топавтыть эрзянь койтнень-кирдатнень ванстозь. Ансамблясь эрьва покш чистэ кенярдовты райононь ды эсь велень эрицятнень – морсить эрзянь кезэрень ды неень шкань морот.
Ансамблянь аватне куш кодамо кенярксчистэ явовить лиятнень эйстэ эсь мазый, сельмс каявиця эрзянь раськень палятнесэ. Ды кода сынсь кортыть, те аволь ансяк сцена лангс лисема оршамопель, ней те уш вечкевикс ды ойментень малавикс оршамо.

«Вастома» ансамблянть вадрясто содасызь аволь ансяк эсь велесэнть ды районсонть, весе республиканть келес ды Россиянь ламот регионтнэсэ. Шкинемань эрямо кист ушодовсь ютазь пингень 1989 иестэ. Ды морамонь кезэрэнь коесь тесэ ванстови течинь чис. Морокуронть прявтсо вана уш кеменьшка иеть ашти ёроков эрзянь авась, вадрясто морыцясь Любовь Степановна КОЗЛОВА. Сон минек содавтымизьгак «Вастоманть» марто.

– Минек морокурось эри-важоди уш колоньгеменде ламо иеть. Весе те шканть перть ульнесть аволь аламо полавтомат. А полавтовиксэкс кадовсь вейкесь – минек репертуарсо прявтокс аштить эрзянь моротне, – корты Любовь Козлова. – Зярдо сынь коллективентень, монень ульнесть 20 иеть. Ды вана уш аволь вейке кементь иеть ютасть, эзть марявояк. Васень шкасто минек весе моротне моравсть баянонь седямо мельга. Мейле, зярдо арынь коллективенть прявтс, те лувось аламодо полавтовсь – эрзянь ды мокшонь моротнень моратано фольклорокс. Баян мельга жо моратано авторонь моротнень. Ламо моронок, конат моравить ламо вайгельсэ. Истямо морамось мелень коряс эстенекак, пек вечкеви кунсолыцятнененьгак. Истят моротне, мерят, невтить кезэрень эрзятнень эрямост, ёвтнить койтнеде-кирдатнеде, раськень культурадонть. Сынь токить седеенть, совить оймес.

Фольклорось ловови культурань сехте покш сюпавчикс. Ванстови жо сон ёроков ломантнень ды морыцятнень вийсэ. Эрзянь ды мокшонь моротнень, культуранть ванстомасо ули путовксост «Вастома» морокуронь морыцятненьгак. Фольклорось – «Вастома» ансамблянь шкинемань седеесь. Секскак, вана уш 30 ламо иетнень перть ансамблясь моли кемекстазь кияванть – моры эрзянь ды мокшонь кезэрень морот.

«Вастома» морокуронть парсте содасызь аволь ансяк Мордовиясо, республикань томбалеяк: Нижней Новгородонь, Ульяновскоень, Челябань, Волгоградонь, Ленинградонь областтнесэ ды ламот лия регионтнэсэ. Сон – весероссиянь, регионъютконь ды республикань ламот фестивальтнень лауреат ды дипломант. Лиснесь изницякс «Од вий» фестивальсэ, «Панар» раськень оршамонь пелькстамосо (Нижний Новгород), «Музыкальный каравай» Равчирень раськетнень культурань фестивальсэ (Ульяновской область). Морокурось зярыяксть ульнесь «Зелёные святки» весероссиянь фольклоронь фестивалень, «Болдинские гуляния» фольклоронь коллективтнень райононь пелькстамонь дипломантокс, конат ютавтовкшныть Нижегородской областень Покш Болдинасо. Истя жо сон «Эрзянь лисьмапря» (ютавтови Нижегородской областень Лукояновской районсо) раськень культурань регионъютконь фестивалень свалшкань участник.

– Минь эсь шкинемасонть бажатано вельмевтемс эрзянь кезэрень моротнень, – тешксты Любовь Козлова, – эдь эрзянь келесь – минек тиринь кель. Сон пек мазый ды гайгиця. Койсэнь, эрьва раськенть сехте покш сюпавчикс ашти келесь ды сонзэ эряви ванстомс, тонавтомс эйкакштнень кортамо тиринь кельсэ ды снартнемс а ёмавтомс минек покштятнень-бабатнень койтнень-кирдатнень. Ансамблясонок морсицятнестэ нилетне – эрзянь ават, вейкесь – мокшава. Весе пек вадрясто содасызь эсь тиринь келенть, секскак раськень моротнень моратано покш мельсэ.

Эряви меремс, «Вастома» морокурось домка важодема ветясь коронавирусонь кезовонть шкастояк. Кадык арасельть кодаткак мероприятият, кувака шкас лоткавтозельть лия регионтнэс ардтнематнеяк, ялатеке ансамблясь роботась: арсесь-анокстась од проекттнэнь, те шкастонть репертуаронтень совавтозельть ламо од мороткак.

– Минь кезовдонть икеле сеедьстэ ардтнинек эрьва кодамо фестивальтнес ды мероприятиятнес сеть регионтнэс, косо эрить эрзят ды мокшот, – корты Любовь Козлова. – Чизэнзэ яла максылинек вете-кото концертт. Неть ардтнематне ульнесть миненек мелень коряс. Кезовонть шкасто жо весемесь ютавтозель онлайн-лувсо. Бути косояк ютавтови фестиваль, кучсызь тенек Положениянть, теде мейле тейтяно-сниматано видео ды кучсынек. Истя важодинекак.
Л. С. Козлова морокуронть прявтсо уш кеменьшка иеть ды весе те шканть перть важоди «Вастомань» репертуаронть сюпалгавтоманзо лангсо.

– Монь эдь музыкальной образованиям араськак, – тешксты морыцясь. – Эйкакшпорасто яксилинь музыкальной школав, ансяк мелезэнь эзь туе, кадыя тонавтнеманть. Тосо эрявсь тонавтнемс нотатнень, а мон сынст пек а вечкилинь. Монень седе мелень коряс эстень кочкамс эрявикс гайттнень, ладямс вайгельтнень. Те тень тетянь-авань эйстэ ютась. Семиянок свал ульнесь морамонь вечкиця. Ды нейгак ансамблянть туртов репертуаронть кочкан мелень коряс, минек туртов седе ладиця. Весе пек вечксынек «Торама», «Мерема» фольклорной ансамблятнень морост. Покш мельсэ моратано сынст произведениятнень. Вейкеяк концертэнек а ютакшны «Вирь удало» эрзянь моровтомонть. Валтнэнь сёрмадынзе поэтэсь ды прозаикесь Михаил Маторкин, музыканть – композиторось Гавриил Вдовин. Ды целанек, эсенек республикань композитортнэнь моротне миненек пек вечкевить.

Ицялонь Культурань кудосонть моронь гайгемась а лоткси. Тесэ морсить зярыя вейсэндявкст. Эрьвась ловови райцентрань чачокс. Ды самай ломантнень туртов алтазь весе сынст шкинемаст.

– Минь эсь тевсэнть бажатано кандомс ломантненень паро ёжомарямот, – корты Ицялонь Культурань центрань прявтось Наталья Буянова. – Эрьва покш чис анокстатано концерт, теке марто иезэнзэ зярыяксть ютавттано покш вастовомат-концертт. Ды «Вастома» морокурось минек свалшкань лездыця.

Юлия ЕРЕМИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».