Вторник, марта 19, 2024
Важное
Неть читнестэ Саранскойсэ ульнесь «Иван Гусев. Подвиг на Курской дуге» документальной фильмань пекстазь невтемась. Сон ёвтни Отяжбуень Сабанцеле велень эрзянь од цёранть Иван Гусевень ды сонзэ ялгатнень подвигте, кона кармась Прохоровской ды Курской дугань тюремань тешксэкс.


Иван Алексеевич Гусев чачсь 1922 иень якшамковонь 15-це чистэ МАССР-нь Отяжбуень Сабанцелесэ, эрзянь покш семиясо. Ютазь пингень 30-це иетнестэ сынст яволявтызь кулакокс ды панизь велестэ. Иванонь трясть покштязо-бабазо. Сабанцелень сисем иень школанть прядомадо мейле (1936 иесь) сон тонавтнесь Ицялонь педагогической училищасо. Войнань шкане – Камышинской танковой училищасо. 1943 иестэ – 181-це бригадань 5-це танковой армиянь танконь взводонь командирэль.

1943 иень медьковонь 12-це чи. Курской дуга. Гусев лейтенантонть Т-34 танконть, косо ульнесь батальононь командирэсь капитанось П.А. Скрипкин, немецтне тапизь. Экипажонь члентнэ Николаев ды Зырянов таргизь ранязь командирэнть ды кекшизь. Сынст ютамост рединзе ятонь танкось. Немецень «Тигрась» сыргась Скрипкинэнь, медсестранть ды лия боецтнэнь лангс. Ялгаст идемга минек лия танкось сыргась «Тигранть» лангс, эртизе ды истя идизе командирэнть. Иван Гусев, Александр Николаев, Роман Чернов чавовсть, ансяк эсь эрямосост сынь идизь ояст-ялгаст ды лоткавтызь ятонть.

Те героической тевенть кисэ Иван Гусевень эзизь казе кодамояк наградасо (экипажонь лия члентнэ казевсть). Мекс? Тетянзо-аванзо кулакокс яволявтоманть кисэ… Ансяк ламо шкань ютазь, И.С. Бурнайкин историкенть ды краеведэнть мелензэ коряс, 1995 иестэ, Иван Гусев тешкстазель Отечественной войнань I-це степенень орденсэ.
Ды вана ней, зярыя кементь иетнень ютазь, минек од ломантне анокстасть документальной фильма те подвигтенть – «Иван Гусев. Подвиг на Курской дуге». Фильмань теицятне весе од ломанть. Режиссёрось – Максим Рыськин, продюсерэсь – Александр Учеваткин, сценаристэсь – Ангелина Цаликова (сон Владикавказонь, прядсь ВГИК), художникесь-постановщикесь – Олег Романов, операторось – Игорь Киреев, звукорежиссёрось – Родион Рахманов, текстэнть ловны – Олег Милехин. Иван Гусевень налкси актёрось, ГИТИС-нь ды ВГИК-нь прядыцясь Андрей Грызлов.


Эряви меремс, Максим Рыськин аволь умок нолдась «Сволочь?» фильма. Александр Учеваткин – «Азор» эрзянь кельсэ васенце фильмань сценариень сёрмадыця. Ней сынь важодить вейсэ. Кода корты Александр, зярдо арсесь фильманть снимамодо, Максим васенцекс сась превезэнзэ.

«Мон марсинь Максим ланга, ансяк овсе а содылия, – корты Александр Учеваткин. – Весть ардынь велестэ, прясон весе арсематне ульнесть фильманть снимамодо-теемадо. Ды мелезэнь ледсь Максим. Лоткинь, ялган кедьстэ кевкстия-вешия телефононь номерэнзэ ды гайневтинь. Кортынек вастовомадо. Вана истя теевинек содавиксэкс ды ушодынек важодеманть».

Тевесь ушодовсь. Од ломантне ардсть Сабанцелев, ваннызь тесэнь школань музейсэ ванстовозь материалтнэнь, Иван Гусевень сёрматнень. Фильманть лангсо важодемань шкасто ламо лездасть Мордовия Республикань Правительстванть юрсо гуманитарной наукань НИИ-сь, Россиянь военно-исторической обществась (зярдо снимавсть танксо кадратне), «Прохоровское поле» музеесь-заповедникесь.
Фильмань прявт героекс истя жо кармась Иван Гусевень ялаксонзо цёрась Владимир Борисов, кона ёвтни геройденть малавиксэнзэ ледстнематнень.

«Минек семиясо войнадонть кортамо а вечкильть, – ёвтни Владимир Борисов. – Семиянок покшоль, монь тетям ды Иван Гусев ульнесть двоюродной ялаксокс. Кавонест фронтсольть. Ансяк зярдояк тетянь пельде тень ланга мезеяк эзинек марсе».


Башка мель явови Ицялонь педагогической училищань студенттнэнень, конат ловныть Иван Гусевень ванстовозь дневникстэ сёрмадовкстнэнь ды фронтсто тиринь кудов кучозь сёрматнень, конат пешксеть вечкемадо ды ятонть эйстэ а пелемань ёжодо. 16, 17 ды 18 иесэ од ломантне ловныть сеть мельтнень-арсематнень, конат чарасть сынст иетнесэ Иван Гусевень прясо. Ловномсто сыненст максовить кевкстемат: «Мезе сынст туртов тиринь масторось?», «Максовлизь-арась эрямост тиринь масторонть ды малавиксэст кисэ?», «Ули-арась бажамост подвигентень?». Ды эрьвась эйстэст арсезь максы каршо вал. Нама, весементь коряс эрьванть эсензэ арсеманзо.

Кода тешкстыть фильмань теицятне, пек паро, ванстовсь цёранть дневникезэ. Течи сонзэ копиятне кирдевить Ицялонь педагогической училищасо, Сабанцелень школань музейсэ ды Иван Гусев марто ве курссо тонавтницянть А.Н. Елисеевань, конась цёрантень пек тукшнось мельс, малавиксэнзэ кедьсэ. Кода сынь тешкстыть, А.Н. Елисеева эзь содаяк, што вечкеви цёрантень. Эдь сон тень кодаяк эзь невте. Вана кода авась ледстнесь Иван Гусевде:
«Сон ульнесь сэрей, кеме, виев. Варштавксозо чевтель. Тонавтнесь парсте, вечксь ловномо. 17 иес ловнось ламо книгат. Ульнесь кенярксов, маштсь пейдевтеме. Сеедьстэ кортась эрямодо, ёвтнесь, кодамокс бажи улемс. Ансяк эзь сода вейкеде: ниле иень ютазь туи эрямосто. Ицялсо чугункань кись ютась педучилищадонть аволь васоло. Сон ваныль ардыця поездэнть лангс ды, марявсь, бажась туемс тов, косо вестькак арасель».

А вана цёранть фронтсто кудов меельце сёрмазо:
«Шумбратадо, вечкевикс покштям ды бабам! Шумбратадо, малавиксэнь! Кенярдан, што тынь весе шумбратадо ды эрятадо. Ней мон а мелявтан. Берянь, аламо сёрмадыде, кода молить тевтне Сабанцелесэ, Таразбуесэ. Нусмакавтымим Андрейде кулясь. Сеедьстэ ледстнян ды а кемеви тень. Арсеви, паряк, эштё жив. Мон живан ды шумбран. Тевтнеде ды мелявкстнэде ламо. Юткошка малав арась. Весе шкась юты машинатнень перька важодемасо. Чокшне мадемстэ марят пек сизема, ансяк содат, теить покш ды эрявикс тев, седеесь пешкеди кенярксто. Те сехте вадря шкась. Монь кисэ илядо мелявто. Сёрмадодо седе сеедьстэ. Вастомазонок.
Тынк Иван Гусев».

А зярыя чинь ютазь малавикстнэнень сась эштё вейке сёрма, ансяк аволь Иванонь, Тудков капитанонть пельде…
Неень шкане фильмась анок косо-бути 70 %, кадовсь весементь вадрясто ладсемс ды теемс а покш полавтомат. Сонзэ теемасо-анокстамосо лезксэнть кисэ од ломантне покш сюкпря ёвтыть Тольятти ошонь Эрзянь-мокшонь культурань раськень куншкакуронтень, «Сабанчеевское» ООО-нтень ды весе лиятненень.
«Кемтяно, Иван Гусевень валдо лемезэ сови кинохроникас, сондензэ кармить содамо минек эйкакштне ды нуцькатне», – тешкстызе Александр Учеваткин.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».