Сентябрянь 16–22-це читнестэ Сочи ошсо ютась «Вся Россия-2024» неень шкань журналистикань XXVIII-це форумось, козонь якасть Мордовиянь Журналистэнь союзонтень совиця журналисттнэ Людмила Резяпкина прявтонть марто. Сынст ютксоль минек прявт редакторось Марина Девятоваяк.
Мордовиянь журналистэнь делегациясь эзь стувтне медиафорумсонть седе, што сынь састь республикасто, косо ванстовить раськень культурась, келесь, оршамопельтне, секскак национальной колоритэсь, раськень тюстнэ свал ульнесть журналисттнэнь марто. Истя, весень футболкань мештес артозель республикань солярной тешксэсь, тейтертнень кедьсэ ульнесть вишка някинеть, конатне оршавтозельть раськень палинесэ, Орданьбуень «Маяк» газетань прявт редакторось Юлия Черенкова наряжась эрзянь раськень пангосо ды пулайсэ, «Мордовия» сёрмадовксоськак сынст мартоль эрьва косо. Секскак секе-тев сынст ваксс сакшность сетне, кинь улить эрзянь эли мокшонь раськетнень ундоксост, эли конатне зярдояк эрсесть Саранск ошсо.
Форумонть панжомадо мейле ушодовсть эрьва кодамо секциятнева важодематне. Тесэ ютасть мастер-класст, вастовомат, кортнемат, эсь мелень ёвтамот. Прявт тематне: кода ветямс прянть СМИ-тненень социальной сеттнесэ, кода совавтомс нейросеттнень, панжомс блогт Дзенсэ ды ламо лият.
«Ключевые изменения медиаландшафта» темась неень шкане пек талновты весе журналисттнэнь. Кодамокс карми сыця шкань прессась, кодат икелензэ аштить вешемат, ёвтнесть МК-нь прявт редакторось Павел Гусев, АИФ-нь директорось Руслан Новиков ды «Профиль» журналонь прявт редакторось Александр Белоновский.
Выставкань залсо весень вастсь Виктор роботось-корреспондентэсь, конась сась Нижней Новгородсто, сон машты аволь ансяк кортамо, сёрмадомо текстт, истя жо киштеме ды морамо. Виктор теевсь медиафорумонть алкуксонь тешксэкс, ялатеке журналисттнэ ламо мель явсть «живой» кортамотненень. Тенст инжекс сакшность сенаторось Алексей Пушков, МГУ-нь журналистикань факультетэнь деканось Елена Вартанова, РФ-нь Общественной палатасто Рифат Сабитов, ИТАР-ТАСС-нь генеральной директорось Андрей Кондрашов, РФ-нь ГД-нь комитетэнь прявтось Александр Хинштейн, «Вести» телеканалсто Эдуард Петров, писателесь Юрий Поляков, «Соловьев LIFE» телеканалонь ветицясь Сергей Мардан, VK-нь аналитикань ды икелев молемань ëнксонь прявтось Николай Афиногенов ды ламо-ламо лият. Весе мероприятиятнень ветясь Россиянь Журналистэнь союзонь прявтось Владимир Соловьев.
Медиафорумонть шкасто ёвтазельть профессиональной журналистской конкурсонь изницятне. Минек газетань прявт редакторось Марина Девятова казезель Дипломсо «Лучшая авторская публикация» номинациясонть «Как мордва для себя Якутию открыла, а якуты – мордву» ды «История любви осетинского парня и эрзянской девушки» публикациятнень кис. Истя жо Дипломсо казезель «Известия Мордовии» газетань информациянь отделэнь редакторось Ирина Мазина телеграм-каналонь парсте ветямонть кис.
Марина Девятова