Сентябрянь 21-це чистэ Отяжбуень Каменкасо, Троицкой кезэрень церькованть маласо, ютась «Пазось мартонок» духовной моронь фестиваль.
Те чистэнть тешкставсь Пазонь Авань Чачомась. Орданьбуень ды Отяжбуень епископось Мелетий Отяжелень Андреевской кафедральной соборсо ютавтсь Пазонь литургия. Теде мейле посёлкаванть Крестной ходсо весе сыргасть Каменканть ёнов. Тосо одс витневи-петневи Живоначальной Троицань ды Рождества Пресвятой Богородицань кезэрень церьковась.
Крестной ходось алтавсь СВО-со чавовозь воинтнэнь ледстнемга. Тей сакшность цёратнень малавиксэст Отяжелень, Орданьбуень, Покш Березникень, Покш Игнатовань ды Дубёнкань районтнэстэ. Весе сынь кедьсэст кандсть Геройтнень портретэст. Каменкань пандопрясо ютась молебен.
Теде мейле вельмевтевиця Троицкой церькованть вакссо ушодовсь «Пазось мартонок» духовной моронь православной фестивалесь. Сон анокстазель Орданьбуень ды Отяжбуень епископонть Мелетиень баславамонзо ды «Талина» компаниянь Группатнень лездамост вельде. Покш концертсэнть морасть самодеятельной ды профессиональной артисттнэ.
– Духовной музыкась – музыкань искусствань пек эрявикс пелькс, седеяк пек Россиясо. Течи нетяно, кода те искусствась вельмевтеви, касы ды виензы, сень лангс апак вано, кода стувтозель сядо иес. Неень шкань ломантне те музыканть вельде содавтовить сень марто, кода кемсть, вечксть ды озность минек покштянок-бабанок. Весе те лезды тенек пшкадемс Пазонтень оймень мелявксонок марто, – кортась Мелетий епископось.
Владыкась казсь Сюкпрянь сёрмат Отяжелень ошонь поселениянь прявтонтень А. И. Серовнень ды Отяжбуень эйкакшонь искусствань школань прявтонтень О. Н. Тремяскинанень Рузонь православной церьковантень ды Орданьбуень епархиянтень лездамонть кисэ.
МР-нь Прявтонть Артём Здуновонь пельде лембе валт ёвтасть МР-нь гражданской оборонань ды чрезвычайной тевтнень коряс Государственной комитетэнь прявтось А. Г. Наумов, Отяжелень райононь прявтось К. Н. Николаев.
СВО-нь участниктнень аваст ды доваст пельде вал сайнесь Елена Слугина. Сонзэ мирдезэ, Григорий Слугин, Орданьбуень Баеньбуе велестэ, чавовсь мелят, 2023 иень сентябрянь 26-це чистэ.
Концертэнть ушодызе Отяжбуень эйкакшонь искусствань школань хорось, конань вети О. Н. Тремяскина. Хорось эрьва ие невтни прянзо «Шумбрат, Мордовия!» раськень творчествань республикань фестивальсэ, морси концерттнэсэ, конань ютавтни Орданьбуень ды Отяжбуень епархиясь. Лембестэ вастозель «Юность» морамонь ансамблясь, сон пурнавсь Орданьбуень Никольской кафедральной соборонь недлячинь школасо. Ветицязо – Олеся Майорова.
Сцена лангсо ульнесть Покш Березникбуестэ – Светлана Стольная, Покш Игнатбуестэ – «Рябинушка» ветеранонь ансамблясь, Чаунзабуестэ – Кира Глухова, Сергей Пятайкин, Ирина Давыдова, Отяжбуестэ – Ольга Колемасова, Владимир Титяпкин ды лият.
Ваныцятне пек лембестэ вастызь о. Евгений Самаркинэнь, кона служи Орданьбуень Жаренки велесэ. Батюшканть ламо духовной моронзо. Кой-конатнень сёрмадынзе сонсь, улить лия автороньгак. Весе сынь кецявтыть ойменть, кармавтыть арсеме ды киньгак а кадыть мельтеме.
Сценанть вакссо важодсть декоративно-прикладной творчествань мастертнэнь выставкаст, Орданьбуень епархиянь Ф.Ушаков лемсэ православной спортонь клубонь тонавтницятне невтсть тюремань лувт.
Фестивалень весе участниктне казевсть дипломсо ды казнесэ.
– Минь течи весе седейсэ кецнинек, кортынек вейке-вейкенек марто, кунсолынек пек паро морот ды теевинек седеяк малавиксэкс. Кемтяно, духовной моронь фестивалесь Каменкань моданть лангсо тееви эрьва иенсекс, – кортась МР-нь Государственной Собраниянь депутатось М.Н. Подмарев.
Весе инжетне каванявсть кашадо ды компотто, менель ало вейсэнь ярсамось ульнесь пек тантей!
Саезь Отяжелень райононь
«Вперед» газетасто.