Вторник, марта 19, 2024
Важное
 
Журналистэнь тевенть ламо иень перть топавтомсто лиясто сакшны истямо мель: варштамс удалов, одс ловномс кемень-комсь иень ютазь сёрмадозенть. Вана нейгак, зярдо масторонь келес юты кажов ормась, а миненек, кить эзть тонадо кабинетсэ аштеме, пек а сатныть ломантнень марто вастовоматне. Секс, секе-тев гайневттяно сеть ломантненень, кинь ланга а весть савсь тенек сёрмадомс тиринь газетанть лопатнесэ.

Видькстан, икелень иетнестэ сеедьстэ вастневинь ламо эйкакшонь триця семиятнень марто. Кить сынсь сакшность редакциянь кабинетс, кинь ульнесь мелезэ, якинь тенст кудос. Чарькодеви, эрьвась юткстост анокстась вастомс инжеть: ванськавтсть кудопотмонть, мазыйстэ оршавтсть эйкакштнень.

Виде, эрьва семиясь кадовсь ламо иес ледстневицякс, ансяк сонзэ, лиятнень ёнов а молиця ёнкстнэнь, обуцянть коряс.
Меельце иетнестэ ламо эйкакшонь триця семиятнеде, сынст мелявкстнэде ды кеняркстнэде парсте пачтясь тенек Мордовской республиканской ламо эйкакшонь триця вейсэндявксонь «Семья» общественной организациянь прявтось Надежда Алексеевна КОТЛОВА.

Тешкстасынек, течи те вейсэндявксонтень совить 800 ламо семият.
Ине Изнямонь 75 иетнень тешкстамсто ламо эйкакшонь триця семиятнесэ весе эйкакштне тетяст-аваст марто невтсть эрьва ёндонь ёрокчи. Текенень поладсынек, седеймариця ломантнень лезксэст вельде ламот нужасо эрицятненень пачтяви течи сехте эрявиксэсь.
Комсте ламо иень перть а лововияк зяро семиянень макссь эрьва кодамо лезкс те общественной организациясь, конань прявтсо васень читнестэ саезь Н.А.Котлова. Весемесь, нать, а стяко. Эдь сонськак те тейтерь-авась чачсь-кассь ламо эйкакшонь триця семиясо, ансяк аволь минек республикасо, васоло Уралсо.

Надежда Алексеевнань ледстнеманзо коряс, вишкапингстэ сонензэ, марявсь, арась седе мазый тарка тиринь ёнкстонзо башка. Кодашка мельспаро седеензэ токизе, кода эштё овсе од тейтерькакс сон сась Чувашияв сэредиця раськензэ ильтямо. Сестэ сонензэ мерсть куш а кувать кадовомс инжекс. Надежда апак кавтолдо учизе тундонть ды тунь эзь янксе. Сон васенцеде несь, кода мазыйстэ, прок одирьват, оршавсть лёмзёр, вишня, умарина, пизёл чувтотне. Нать, а стяко народсо кортыть: кинь кодамо уцясказо, ковгак а туят. Истя, Чувашиясто сон вастызе вечкеманзо, эриялганзо. Сестэ кармась содамо, однасумозо, Александр Осипович, Мордовиясто. Тень ловозь, зярдо стясь кевкстемась, косо кармить эрямо венчамодо-урьвакстомадо мейле, кавтолдомат арасельть – Саранскойсэ.

Виде, васня овсе мезесткак арасель, ялатеке стакачиде эзть пеле. Кодашка мельспарост ульнесь васенце эйкакшост Ольга тейтерест чачомсто (сон якстере диплом марто прядызе Мордовиянь Н.П.Огарёв лемсэ государственной университетэнь медицинской факультетэнть). Мельганзо Денис цёраст а седе вишкине кеняркс тенст кандсь. Сон истя жо патянзо ладсо вузонь прядомадо мейле важоди специальностень коряс. Шкань ютазь семияст седеяк покшолгадсь, зярдо чачсть Антонина ды Владимир.

Ней уш сынськак эйкакштне ламо эйкакшонь триця тетят-ават. Сень лангс апак вано, Котловтнень эсест эйкакштнеде ульнесть ниле, сынь трясть-кастсть вете! Истя уш лиссь раськесэст, зярдо Надежда Алексеевнань сазорозо кулось, цёранзо Эдуардонь саизь эстест. Аволь ансяк тризь-кастызь, ливтсть эйстэнзэ паро ломань, лездасть топавтомс ламо иень перть арсеманзо – улемс военноекс. Эдуард эсь шкастонзо прядызе Санкт-Петербург ошсо высшей военной училищанть.

Виде, аволь весемесь валанясто ютась те семиясонть, стакачитькак, кода весеньгак, ульнесть. Ансяк сынсь содыть, кода цидярдызь ярмаконь-мезень асатноманть… Вейксэньгеменце иетнестэ, мастор лангсо тевтнень одс ладямонь шкастонть, марявсь, эрямось допрок чополгадсь.

– Пазонть ды паро ломантнень лезксэст вельде весе цидярдынек, – ледстни Надежда Алексеевна.

Нать, а стяко течи сон седейшкава лезды весенень, эсензэ кондят ламо эйкакшонь триця семиятненень. Вановтонзо коряс, ламо эйкакшонь трицятненень, социальной лезксэнь максомадо башка, кода пособиятне, компенсациятне, льготатне, эштё эрявить духовно-нравственной питнейчитне. Сынст вельде тенст седе шожда стямс пильге лангс неень экономикань ды морально-нравственной лувсонть.

Эрьва ломанентень, кие чачи те моданть лангс, эряви содамс тиринь тарканть ды масторонть историянзо, коензэ-кирданзо. Бути истя карми, сестэ эйстэнзэ лиси алкуксонь ломань, кие тееви кемевиксэкс семиянтень ды тиринь модантень. Государстванть ды обществанть нежекс ды свал шкань мелявксокс улест ламо эйкакшонь триця семиятне.

Неень шкане «Семья» вейсэндявксонть ули питневтеме кедьстэ кедьс максовиця оршамопелень ды карсемапелень гуманитарной пунктозо. Эрявиксчизэ покш аволь ансяк ламо эйкакшонь триця семиятненень, истя жо нужачисэ эрицятнененьгак.

Виде, течи республикасонок ламо эйкакшонь триця семиятненень явови башка мель. Теевезь коень коряс, сеть семиятненень, конат печтить стакачить, максови лезкс Инечинь кенярксчинтень, тонавтнемань од иенть ушодовомсто. Косо трявить-кастовить ниле ды седе ламо эйкакшт, истя жо ськамонзо эйкакшонь триця авантень тагояк максови материальной лезкс.

Те организациянть энялдоманзо-вешеманзо коряс витевить ламо стакачить: явовить безвозмездной субсидият квартирань рамамс ды кудонь путомс, максови лезкс ламо эйкакшонь триця семиятнестэ ёроков эйкакштненень минек республикань вузтнэс тонавтнеме молемстэ.

Те вейсэндявксось яки масторонь ды республикань иневанькс таркатнева. Ютынзе Мордовиянь малав весе монастыртнень. Ламоксть ульнесть Зубова-Полянань ёнкссо Покровской Селища велесэ тейтерь-авань Свято-Варсонофиевской, Рузаевка ёнкссо Пайгармань Параскево-Вознесенской тейтерь-авань монастыртнесэ. Аволь весть якасть Санкт-Петербург ошов, «Золотое кольцо» туристэнь маршрутканть, Свято-Успенской Псково-Печорской ды Свято-Троицкой Сканов тейтерь-авань, Санаксарской цёрань монастыртнес. Меельце шкастонть ламо эйкакшонь триця семиятнестэ весень, кинь ульнесь мелезэ, сайнизь Крымев.

Надежда Алексеевнань валонзо коряс, иневанькс таркатнева якамотнень вельде аволь ансяк оймест ванськавтовить, истя жо ламолгавтовить духовной содамочитне ды решавить ламо лия кевкстематне.

Ягодань ды пангонь шкастонть вейсэндявксос совицятне сеедьстэ яксить пертьпельксэнь мазычитнень ванкшномо, виртнесэ касозенть теле лангс анокстамо. Нама, вирьга якамотне максыть аволь ансяк вийть ды шумбрачи, истя жо лездыть ванстомс ярмактнень, конат ютавтовить лия ярсамопелень рамамс. Истя жо вейсэндявкссонть ветяви важодема аволь сэтьместэ эриця ламо эйкакшонь триця тетятнень-аватнень марто.

Виде, ламо эйкакшонь триця семиятненень а шожда эрси эрямо таркань коряс, сынст а свал сатныть ярмакост седе покш квартирань рамамс. Тень ловозь, «Семья» вейсэндявксонтень сеедьстэ пшкалить эрямо таркань рамамс эли кудонь путомс безвозмездной субсидиянь коряс. Н.А.Котлова вейсэ мартост аноксты весе эрявикс документтнэнь, сёрмады сёрмат республикань прявттнэнень. Кода мерсь Надежда Алексеевна, те тевсэнть покш лезкс тенст максыть МР-нь Прявтось В.Д.Волков ды МР-нь Правительствань Председателесь В.Ф.Сушков.

Теке шкасто сон ёвтась истямо энялдома: ламо эйкакшонь триця семиятненень кредитэнь максомсто банктне аволь истя казямосто вановольть сынст кредитэнь историянть. Нилеце эйкакшонть чачомадо мейле государствась пандсы весе ипотечной кредитэнть. Бути масторонь прявттнэ совавтыть те кевкстеманть коряс полавтомат ламо эйкакшонь трицятнень лезэс, сестэ ков седе ламо ломанть аволь ансяк семияст покшолгавтсызь, истя жо масторонь демографиянь стакачитненьгак витьсызь.

Валентина ЮДИНА.
Фототнень кучинзе Н.Котлова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».