Вторник, марта 19, 2024
Важное

Течи ламо кортави тиринь келенть ванстомадо, покштянь-бабань койтнень-кирдатнень астувтомадо, икелень эрямо лувонть эйстэ неень шкань эрямонтень ламонть одс велявтомадо.

 

Кода неть кевкстематнень коряс аштить тевтне Мордовиянь томбале эриця эрзятнень ды мокшотнень ютксо, течи минек ловныцятненень ёвтни «Пензенский лесной колледж» ПО-нь ГБПОУ-нь прявтось, Пензань областень Сосновоборской районсо РМНКА-нь отделениянь прявтось Олег Викторович Вдовин.

Олег Викторович, инескеть, пачтядо, кода течи ютыть тевтне Пензань областьсэ тиринь кельтнень тонавтнемаст коряс ды улить-арасть сатышка тонавтыцят Сосновоборской районсо?

– Тешкстаса, минь эрятано пек мазый таркасо, Сура леенть маласо. Велетне сравтовсть виртнень, паксятнень юткова. Кемнилее велетнесэ эрицятнеде весемезэ 14643 ломанть. Ояксчисэ эрить ламо раськеть: рузт, эрзят, мокшот, татарт ды лия культурань кандыцят, келень содыцят.

Минек эрзянь келень ды литературань тонавтыцятне прядызь Н.П. Огарёв лемсэ Мордовиянь государственной университетэнть. Сынь важодить С.Ю. Дмитриевань учебникенть коряс, конань 2019 иестэ нолдызе Мордовиянь книгань издательствась. Текенень поладса, вере ледстязь школатнесэ тонавтыцятне квалификацияст кастызь Мордовской республиканской образованиянь институтсо. 2019 иень ноябрясто тонавтыцятне ютасть «Современные подходы в преподавании мордовского (мокшанского и эрзянского) языка в условиях перехода на ФГОС» теманть коряс курсат Пензань областень региононь квалификациянь кастомань институтсо, конат теезельть вейсэ Мордовской республиканской образованиянь институтонть марто. Теде мейле тонавтыцятне поладызь тевест тиринь ёнксонь общеобразовательной учреждениятнесэ.

Олег Викторович, кодат ёнкст нолдатадо тевс эйкакштнень ютксо тиринь келенть тонавтнемантень мелень кепедемга?

– Видьстэ ёвтаса, меельце иетнестэ эйкакштнень ёндо касы ды виевгады тиринь келень тонавтнемантень мелесь. Теевсь коекс Пензань областень историянь ды культурань коряс областной олимпиадатнень ютавтомась (иезэнзэ весть). Уликс номинациятнестэ вейкесь: «Лингвистическое и литературное краеведение (литература и языки народов, населяющих Пензенский край: русский, татарский, эрзя и мокша)», косо минек эйкакштне невтить ёрокчист ды лиснить изницякс.

Тонавтницянок ульнесть раськеютконь олимпиадасонть, эрзянь ды мокшонь кельтнень коряс шкинемань пелькстамотнесэ, конат ютавтовсть Саранскойсэ, ды лиснесть изницякс.

Олег Викторович, чарькодеви, келень вечкемась, сонзэ содамось ушодови семиясто, поладови школасо тонавтнемстэ. Ламо-аволь эйкакшт школань прядомадо мейле кочкить минек республикань вузтнэнь ды кодамо важодема ветятадо тень коряс?

– Ледстяса, те иень апрельстэ Саранскойсэ онлайн-форматсо ютавтовсь регионъютконь пелькстамо школасо тонавтницятнень ды эрзя-мокшонь диаспорань студенттнэнь ютксо, кона лемдевсь «Монь семиянь тиринь келесь» ды алтавсь Тиринь келень чинтень. Минек райононь школатне, косо эйкакштне тонавтнить эрзя-мокшонь кельтнень, эйсэнзэ невтизь ёрокчист.

Видеть валонк, весемесь ушодови семиясто, поладови школасо. Тень мельс саезь, эсенек ёндо бажатано теемс весементь, эйкакштнень тиринь келенть вечкеме мелест кепедемасонть. Истя, «Монь эрзя-мокшонь келесь» регионъютконь пелькстамосонть минек эйкакштне казезельть питней казнесэ ды дипломсо.

2019 иестэ Шугурова велень школасо тонавтницятне лиссть изницякс «Монь семиянь тиринь келесь» видеоуроксонть, конань ютавтызе Равчирень финнэнь-угрань раськетнень культурань куншкакурось. Истя жо «Монь мастором, монь Россиям!» пелькстамосонть, «Монь велем» номинациясонть, конань анокстызе М.Е. Евсевьев лемсэ сестэ эштё Мордовской государственной пединститутось (ней университетэсь).

Текенень поладсынек, тонавтницянок ульнесть Весероссиянь общеобразовательной акциясонть – «Эрзянь ды мокшонь кельтнесэ диктант» раськеютконь мероприятиясонть.

2019 иестэ Вачелай велень СОШ-нь МБОУ-сонть ютавтовсь «Лиятнень ёнов а молиця монь ёнксось» лементь ало покш вастовома, конась ульнесь Пензань областень региононь эрзя-мокшонь национально-культурной автономиянь чистэнть.

2020 иестэ школанок невтизь ёрокчист «Минек ёнксонь эрицят» исследовательской важодемань пелькстамосонть, конань ютавтызе Пензань областень региононь эрзя-мокшонь национально-культурной автономиясь. Неть важодевкстнэ улить «Краеведение» журналсо.

2017 иестэ саезь Сосновоборск посёлкань 3 № школань прядыцятне эрьва иестэ теевить Мордовиянь вузтнэнь студентэкс, истятнэ яла седе ламолгадыть.

Мельспарозонок, эрьва иестэ сеть школатнесэ тонавтницятне, косо ветявить эрзянь ды мокшонь кельтне, тердевить Саранскоев. Тельня – Од иень вастоматнес, кизна – шумбрачинь витемань «Эряк, тиринь кель!» этнокультурань лагерев, косо эйкакштне кортыть ансяк тиринь кельсэ.

Эйкакштне ды тиринь келень тонавтыцятне седейшкавань мель явить весе тевтненень-илатненень, конатнень ютавтыть МР-нь Культурань, национальной политикань ды архивень тевень министерствась, Равчирень финнэнь-угрань раськетнень культурань куншкакурось, Эрзянь ды мокшонь раськетнень регионъютконь общественной вейсэндявксонь советэсь ды Пензань областень регионъютконь мордовской национально-культурной автономиясь. Кемеви, икелепелевгак минек вейсэнь тевтне поладовить, эйкакшонок кармить седе покш мель явомо тиринь келень ды литературань тонавтнемантень, покштятнень-бабатнень коест-кирдаст содамонтень.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».