Россиясо, маряви, арась истямо тарка, косо бу авольть эря эрзят ды мокшот. Ламо пингень перть эрьва кодамо тувталонь кувалма сынь срадсть весе масторлангонть келес. Ды неень шканеяк, кодамо регионов илязат понго, вастат эсеть раськень ломанть.
Октябрянь 8-це чистэ тиринь газетась пачколесь инжекс Нижегородской областень Лукояновабуев, косо, кода содыть минек ловныцятне, ламо пингень перть эри эрзянь-мокшонь раськесь. Тувталось, конась пурнынзе эрьва ендо инжетнень, – Лукояновасо кавто чинь перть тешкставсть Эрзянь ды мокшонь раськень культурань читне. «Виесь вейсэндявомасо» теварсевксэнть лувсо вастовомань инжекс кармась Мордовиянь делегацияськак. Мероприятиясь ютавтовсь Нижегородской областень правительстванть ды Лукояновабуень муниципальной округонь администрациянть лезксэст вельде. Те кенярксчинть аравтлувозо – од ломантнень тиринь раськентень ды культурантень вечкеманть кепетемась.
Нижегородской областень эрзятне вастымизь кши-сал марто, мазый моросо ды киштемасо. Седе тов содавтымизь декоративно-прикладной шкинемань ды раськень ярсамопелень выставкатнень марто, конатне чинь перть важодсть «Центр культурного развития» МАУ-со. Тантей каванямкатнеде мейле инжетне пурнавсть актовой залонтень. Кенярксчись коень коряс ушодовсь Россиянь Гимнанть кунсоломасо, седе тов сценанть лангсо гайгсть эрзянь ды мокшонь раськень моротне.
Лембе вал марто пурнавозтненень пшкадсь Нижегородской областень Лукояновабуень муниципальной округонь депутатонь советэнь председателесь Елена Сналина:
– Течинь вастовомась – алкуксонь кенярксчи Нижегородской областень эрицятнень туртов. Ламо пингень перть минек модатнень лангсо рузтнэнь марто вейсэ ояксчисэ ды вечкемасо эрить мазый ды ине эрзянь ды мокшонь ломантне. Сынст культураст, коест-кирдаст сюпалгавтыть ды виевгавтыть аволь ансяк минек енксонть, целанек весе Россиянть историянзо, культуранзо ды образованиянзо. Эрьва кодамо важодемань енкссо сынст изнявксост кандыть покш лезэ ды теить пек ламо минек масторонть эрямосо.
Седе тов кортась Нижегородской областень Лукояновань муниципальной округонь «Лисьмапря» раськень культурной автономиянь председателесь Марина Константиновна Голодова, кона евтнесь пурнавозтненень «Виесь вейсэндявомасо» теварсевксэнть ланга:
– Те проектэнть лангсо важодемась максы кемема – минек раськенть ули вандынь чизэ. Эдь течинь мероприятиянь инжетне – од ломанть, конатненень алтазьгак минек важодеманок. Минь арсетяно седе домкасто содавтомс раськень поладыцятнень эрзятнень ды мокшотнень историяст, культураст ды коест-кирдаст марто. Кемтяно, бажамонок а емить стяко ды тиринь кельтне кармить гайгеме эште а вейке пинге.
Мейле сценанть лангс тердезельть «Ассамблея народов России» Нижегородской областень региональной отделениянь председателесь ды М.И. Глинка лемсэ Нижегородской государственной консерваториянь профессорось Ольга Шумакова ды Эрзянь-мокшонь раськень регионъютконь вейсэндявксонь Исполкомонь прявтось Татьяна Ларина. Сынь евтнесть инжетненень, кодамо виев минек раськесь, кодамо покш тев теить сеть ломантне, конатнень бажамост вельде регионтнэсэ топавтовить истят эрявикст минек раськетнень туртов теварсевкстнэ.
Кенярксчись поладовсь Пичингуши велень «Эрзяночка» морокуронь артисттнэнь мазый морамосо. Пек лембестэ вастозель Шандрова велень «Умарина» ансамблясь. Истя жо сцена лангсо морась Лукояновабуень Иванбиень «Родники» народной хорось, эрзянь-мокшонь раськень киштеманть мазычинзэ ды сюпавчинзэ парсте невтизе «Ялгинеть» од ломанень киштемань коллективесь. Виев цяпамосо ды «Браво» валонь сееремасо ваныцятне вастызь Мордовия Республикань «Ламзурь» фольклорно-этнографической ансамблянь ды «Вармава» фольклорной ансамблянь морыцятнень. Тейтерьаватне невтизь «Одирьвань саема» раськень коенть.
Теде башка, минек республиканок пельде сценанть лангсо морась эрзянь церась ды ероков морсицясь Артем Мамаев. Тиринь келень ды раськень вечкемадо стихензэ ловнызе Мордовиянь Писателень союзонь прявтось, эрзянь поэтессась Татьяна Мокшанова. Весе артисттнэ ды стихень евтницятне казезельть ледстнемань казнесэ.
Вастовомась пек тусь пурнавозтнень мельс, сон кепедсь ежо, казсь кеняркс. Прядомадонзо мейле ламонь мельс совась кемема – истят мероприятиятне эрявить минек раськенть туртов, васняяк секс, штобу од ломантне а стувтовлизь эсь ундоксост, кемекставлизь содамочист ды вечкемаст истямо виев ды ине раськенть кувалма.
Алена Артемьева