Неть читнестэ тиринь газетань корреспонденттнэ якасть инжекс Орданьбуень райононь Кеченьбие (Кечушево) эрзянь велев. Минек республикасо те велесь содавикс истят ероков ломантнесэ, кода эрзянь лингвистэсь-кельсодыесь Тихон Петрович Миронов ды Социалистической Трудонь Героесь Николай Федорович Тремасов.
Кеченьбиесь – чурькань мастор
Марсеви те веленть лемезэ эште вейке тувталонь коряс. Республикань эрицятне лемдить Кеченьбиенть чурькань масторокс. Ды те а стяко, эдь тосонь эрицятне кастыть ламо чурькат. Тунда видьсызь, кизэнь перть кастсызь ды сексь малав микшнесызь. Чурькань рамсицятне сакшныть лия регионстояк. Те коесь поладови уш а вейке пинге. Кортыть, Кеченьбиень чурькатне а молить лиятнень енов, сынь пек «кежейть» – авардстядызь доволь, теке марто эйсэст ули ламбамо тансть, покшолмань коряс – баягашкат. Бути понгат Кеченьбиев кодамояк кенярксчинь тешкстамо, учок, кода эряза кудазораватне каванятадызь чурькань каймакто. Истят тантейкат пансить ансяк те велесэнть.
Тешкстама, неень шкане Кеченьбие велень поселениянть юрс совить Полое ды Безводное рузонь кавто велетне. Сынь аштить малацек, вакскаст эрязасто чуди Ратор леесь, конань перька пиземечирькекс сравтовсь пиже вирь. Велень куринкатнева якить ревень стадат, эрямось тесэ моли эсензэ лувсо. Неть таркатнесэ улемстэ марят прят прок евкссо.
Зярдо пачкодинек эрявикс таркантень, васняяк содавтынек Полое веленть. Велепесэ вастымизь Кеченьбие велень администрациянь прявтось Михаил Иванович Слюняев. Сон ветяськак тенек экскурсия, конань шкасто содавтымизь Казанень Пазонь Авань пазаванть лемсэ храмонть марто. Евтнизе церькованть сюпав историянзо – сон строязель 1797 иестэ, советской шкасто пекстазель ды пельксэзэ яжазель. Михаил Ивановичень эйкакш шкасто храмось ульнесь колхозонь утомокс, мейле зярсыя аштесь чавосто. Ды ансяк ней сонзэ тагояк чачсь оймезэ. Аволь умок храмонть перька тарканть урядызь, маласо шкастонть арсеви педе-пес витнемс-петнемс потмонзо ды ушоенксонзо. Весе тевтне топавтовить Безводное велесэ чачозенть, бизнесменэнть Александр Земченконь лезксэнзэ вельде. Кода содыть минек ловныцятне, Александр Игоревич саинзе арендас тесэнь умарьпиретнень, озавтсь аволь ансяк эрьва кодамо сортонь умаринат, истя жо виноградт ды тиринь енкссонзо панжсь компания, конась нолды ведь, умарьстэ сокт ды ламо лия симемапельть. Теде башка, те ероков церась аноксты Орданьбуень районов туристической маршрут. Секскак аламонь-аламонь вадрялгавты ды мазылгавты маршрутканть аштиця велетнень. Храмдонть башка, Полое велесэнть арсеви строямс церьковань цела комплекс.
– Неень шкасто Полое велесэ лововить 68 эрицят, седе покш пельксэсь – сыре ломанть. Весемесь, мезе эряви ломантненень, ней ютавтозь Кеченьбиев. Тесэ кадовсь ансяк Культурань кудось, косо истя жо аштить библиотекась ды медпунктось. Лавкась пекставсь, недлязонзо кавксть ардтни автолавка. Покш кемемат Александр Земченконь лангс, паряк, сонзэ лезксэнзэ вельде Полое ды ламо лия чамиця велетненень максови од эрямо, – корты Михаил Слюняев.
Сонсь Михаил Иванович чачсь Полое велесэ важодицянь семиясо. Школань прядомадо мейле тонавтнесь Орданьбуень СПТУ-со, мейле тусь армияв. Армиядо мейле зярыя шка важодсь Полоень «Родина» колхозсо. Седе тов варчнизе прянзо коммерциясо. Шкань ютазь ушодсь важодеме тиринь велень администрациянь прявтокс. Састь шкат, велетнень вейсэндизь, Михаил Ивановичень васняяк арасель мелезэ улемс колмо велень прявтокс, арсесь, а сатыть виензэ. Мейле вановтозо полавтовсь ды сон кундась тевс.
– Эште вишка пингестэ тетям-авам тонавтсть эйсэнь а пелеместакачитнеде, конатне, теке пирявт, секе-тев стякшныть эрямо кинть лангс. Тетям пингензэ перть важодсь велень председателекс, авам жо – фермасо ваз мельга якицякс. Семиясонок эйкакштнеде ульнесть ламо – вете церат ды вейке тейтерька. Минек кисэ аванень натой «Мать-героиня» медальгак макссть. Седе икеле ламо эйкакшонь триця авась лововсь сехте уцяскавокс. Те неень шкасто од ломантне пелить чачтомс ламо эйкакшт, ульнесть шкат, зярдо пейдильть вейке эйкакшонь триця семиятнень лангсо, – корты Михаил Иванович.
Эсензэяк улить эйкакшонзо, ней уш нуцьканзояк. Сон лови прянзо уцяскавокс, секс мекс эри тиринь велесэ, важоди вечкевикс таркасо. Юткошканзо ютавтни лезэвстэ – эсензэ кедьсэ теезь селтсто кундси калт ды яки вирев охотямо.
Кода евтни велень администрациянь прявтось, неень шкасто Кеченьбиесэ эрить малав 300 ломанть. Важодить администрация, велень клуб, библиотека, медпункт, почта, церькова ды микшнемань кавто лавкат. Ульнесь средней школаяк, ютазь иетнестэ пекстызь. Тедеде тесэ кадовсть ансяк 4 эйкакшт, сынст усксить Низовка велень школав. Велесэнть весемезэ кото ульцят.
– Кода ушодынь прявтокс важодеме, велень эрицятнень марто эсенек вийсэ теинек Ленинэнь ульцява ютыця кинть. Самообложениянь ярмактнень лангс Кеченьбиень калмолангсто урядазельть коське чувтотне. Седе тов арсетяно теемс велень куншкасо селт. Истя жо самообложениянь ярмактнень вельде Полое ды Безводное велетнень калмолангтнень перька витнезельть пирявкстнэ. Икелепелев арсетяно аламодо одкстомтомс Кеченьбие велень администрациянь зданиянть, зярс кармить молеме витнемань-петнемань тевтне, ютатано важодеме школав, – евтнесь прявтось.
Велесь виев ломантнесэ
Миньгак содавтынек велень администрациянть ды сонзэ важодицянзо. Кортынек прявтонь полавтыцянть Ольга Анатольевна Кулыгина марто. Авась уш малав 20 иеть важоди велень администрациясо.
– Кеченьбиесь – тиринь велем. Тесэ чачинь-касынь, прядыя школам, тонавтнемадо мейле лисинь мирденень Полое велев. Зярыя иеть важодинь велень советсэ специалистэкс, кода жо вейсэндимизь Кеченьбиенть марто, сынь важодеме тей. Васня ульнинь секретарекс, седе тов ютынь велень администрациянь прявтонь полавтыцякс. Тевесь тень вечкеви, роботатано ломань марто. Минек нупалесь зярдояк а эрси чавосто, тесэ свал инжеть.
Ломантне сыть эрьва кодамо лезкс мельга. Кинень справкат эрявить, кинень ксерокопият теемс ды седе тов. Истя жо администрациясо пурнатано СВО-в гуманитарной лезкс марто посылкат, – евтнесь Ольга Анатольевна.
Мейле кортынек Елена Анатольевна Косолапова марто. Сон вана уш 13 иеть важоди велень администрациясо секретарекс. Эрзянь авась чачсь Луньга велесэ, 2003 иестэ лиссь мирденень Кеченьбиев. Василий мирдензэ марто кирдить покш хозяйства ды эмежпире. Улить кавто эйкакшост, васенцесь эри ды важоди Саранскойсэ, омбоцесь тонавтни Орданьбуесэ. Велень администрациядо башка, Елена Анатольевна важоди страховой агентэкс. Совсинек инжекс велень почтавгак. Тосо лембестэ вастымизь почтань важодицясь Татьяна Васильевна Алипова. Роботы сон аволь пек умок, ансяк тевензэ топавты вадрясто, мелень путозь.
– Чачинь Полое велесэ. Тонавтнемадо мейле лисинь мирденень Безводноев. Мирдень марто эрятано тосо, кирдтяно хозяйства, касттано эмежть. Эйкакшонок кавто – тейтерть-боярават. Надя эри ды важоди Чебоксарсо, Настя – Саранскойсэ. Покшонть ули семиязо, вана аволь умок чачсь васенце нуцькиненек. Маласо шкасто арсян молемс тенст инжекс, пек тошнакадынь вишкиньканть кис, – евтнесь Татьяна Васильевна.
Почтасо важодемадо икеле авась ламо иеть роботась Орданьбуень заправкасо. Кудов ардтнемс ульнесь васоло, лиясто савсь важодемс веть, те роботась пек эзь вечкеве. Ней жо мелявксозо маштсь, важоди лембе кабинетсэ, эрзянь ломань ютксо. Почтав чинь-чоп сыть ломанть, кие сермадсты газетат, кие кучи посылкат ды сермат, теске жо пандыть светэнь ды газонь кисэ. Татьяна Васильевна те нупальсэнть важоди а ськамонзо, улить кавто лездыцянзо. Саемга, Валентина Геннадьевна Беляева важоди почтальонкакс Кеченьбиесэ, а вана Сергей Александрович Кандрашин кандтни почта Полое велень эрицятненень.
Неть ломантнень марто кортамсто чарькодинек, Орданьбуень райононь велетне эрить. Ды эрьванть эсензэ содавикс ломанензэ, сюпав ды кувака историязо. Малаваст аштиця модатне эрьва ие максыть сюпав норов, чопода-пиже виртне, конатне кутмордызь велетнень, эрицятнень каванить пангодо ды ягодадо. Содавлидеяк, зяро неть велетнень малава умонь лисьмапрят ды ванькс лейть! Лиякс меремс: сизят дивсезь неть таркатнень мазычист ванкшнозь. Ды туемстэ максат эстеть вал велявтомс тей одов.
Алена Артемьева
Фототне Егор Горинэнь.