Неть читнестэ МР-нь Государственной архивсэ панжовсь «Жизнь в науке» лементь ало выставкась. Сон алтазь финно-угроведэнть, филологиянь наукань докторонть, профессоронть Д.В. Цыганкинэнь чачома чистэнзэ саезь 100 иетненень.
Выставканть юрсо аштить ученоенть-лингвистэнть эсензэ фондсто документтнэ. Архивенть марто важодеме Дмитрий Васильевич ушодсь 1996 иестэнть саезь. Те шканть перть фондонтень макссь сядот документт ды важодевкст. Пек кенярдовты, неть сюпав содамочитне а улить емавтозь, сынь ванстовить республикань прявт архивсэнть. Выставкасонть невтезь ине ученоенть биографиязо, наукасо важодемазо, общественной тевтеемазо, ледстнемань фотографиянзо.
Тесэ улить Дмитрий Васильевичень дипломонзо, научной важодевксэнзэ, кедьсэ сермадовксонзо ды нолдазь важодевксэнзэ: «Словообразование в мордовских языках», «Память земли», «Эрзянь келень грамматика», «Мордовские языки глазами ученого-лингвиста», «Память, запечатленная в слове», «Лингвистический атлас мокшанских и эрзянских говоров» ды ламот лият.
Дмитрий Васильевич кандови се поколениянтень, кона идесь эсь тиринь масторонть фашисттнэнь эйстэ. 1943 иень мартсто сон эсь олясо туи фронтов. Теке иень ноябрясто понги Западной фронтов, мейле, 1944 иень февральстэ, 3-це Белорусской фронтов, косо звукометрической батареянь 9-це запасной разведывательной полконть юрсо пачкоди Кенигсбергенть видьс.
1946 иестэ саезь 1948 иес Д.В. Цыганкин эсь службанть кандсь Белорусской военной округонь (Поставы ошось) войсковой частьсэнть, мейле – 1950 иенть самс – Галле ошсо (Германия).
Д.В. Цыганкин казезь Отечественной войнань II степенень орденсэ, «За отвагу», «За взятие Кенигсберга», «За победу над Германией в Великой Отечественной войне 1941–1945 гг.» медальтнесэ.
1950 иень июньстэ Дмитрий Васильевич Цыганкин демобилизовазель Советской Армиястонть ды ушодсь тонавтнеме Мордовиянь А.И. Полежаев лемсэ педагогической институтонь историко-филологической факультетсэнть (ней – Мордовской государственной университетэсь).
Важодсь М. Е. Евсевьев лемсэ МГПИ-сэ. 1972 иестэ саезь ды малав 50 иеть макссь Н.П. Огарев лемсэ МГУ-со важодемантень. Ульнесь филологиянь факультетэнь деканокс, эрзянь келень кафедрань прявтокс.
Выставканть панжомасо ульнесть малавиксэнзэ, ялганзо, мартонзо важодицятне, студентт. Весе сонзэ ледстнить кеме, виде, эсь валонь кирдиця ломанекс. Ды весенень а сатныть сонзэ превс путоматне.
Выставканть панжомасо Дмитрий Васильевичень лембе валсо ледстизь МР-нь культурань, раськень политикань ды архивень тевень министрань полавтыцясь Николай Бычков, Н.П. Огарев лемсэ МГУ-нь филологиянь факультетэнь деканось Иван Рябов, МР-нь Правительстванть юрсо гуманитарной наукань НИИ-нь прявтонь полавтыцясь, Эрзянь-мокшонь раськень регионъютконь общественной вейсэндявксонь председателесь Юрий Мишанин ды Исполкомонь прявтось Татьяна Ларина, М.Е. Евсевьев лемсэ МГПУ-нь филологиянь факультетэнь деканось Сергей Степин ды тиринь келень кафедрань прявтось Ольга Налдеева.
Кода тешкстызе И.Н. Рябов, Дмитрий Васильевичень научной достижениянзо пек келейть: фонетикасо ды лексикологиясо, морфологиясо ды синтаксиссэ, диалектологиясо, историясо, ономастикасо. Мокшэрзянь келень научной ламо кевкстематне васняяк ванновсть сонзэ роботатнесэ. Кедензэ алдо лиссть колмосядто ламо научной, научно-методической роботат, конатнень ютксо 5 монографият, вузнэнь ды школанень 8 тонавтомапельть, 5 валкст, ламодояк ламо статьят.
Неть роботатнень ютксто ламотне кармасть теориянь ды методологиянь лувокс эрзянь-мокшонь кельтнень тонавтомасо.
Ламот иетнень перть ученоесь ульнесь Мордовской университетэнь кандидатской диссертациятнень идемань коряс специализированной советэнь членэкс, Мордовия Республикань Правительстванть юрсо НИИГН-нь ученой советэнь членэкс ды Удмуртиянь университетэнь кандидатской диссертациятнень идемань коряс специализированной советэнь членэкс.
Кода содавикс финно-угровед Д.В. Цыганкин ульнесь Финно-угорской вейсэндявксонь член-корреспондентэкс (Финляндия), М.А. Кастрен лемсэ вейсэндявксос совиця (Финляндия), «Linguistica Uraliсa» (Таллинн), «Onomastika Uraliсa» (Дебрецен-Хельсинки), «Финно-угроведение» (Йошкар-Ола), «Сятко» (Саранск ош) журналтнэнь редколлегияс совиця.
– Дмитрий Васильевич Цыганкинэнь лемезэ сырнень тешкссэ сермадозь Мордовской госуниверситетэнь историяс аволь ансяк кода содавикс ученоенть, превейдеяк превей тонавтыцянть, истя жо кода солдатонть, кона ютынзе Ине Отечественной войнань стака китнень, – евтнесь Иван Николаевич Рябов. – Сон кадови мельсэнек кода алкуксонь интеллигент, покштояк покш профессионал, эсь келень ды раськень вечкиця, лия енов а молиця обуцянь, видечинь кисэ аштиця ломань, конань кургосто зярдояк эзь марсеве берянь вал, конань культуразо аволь невтемань кис – алкуксонь. Эрьва тевсэнть сонзэ мелензэ-арсеманзо ульнесть ды кадовить превс путомакс. Дмитрий Васильевич кадови миненек невтевксэкс наукасо важодемстэ, пряветямонзо ды эрямонь вечкеманзо коряс.
А кода евтнесь «Сятко» журналонь важодицясь, Д.В. Цыганкинэнь нуцьканзо низэ Алина Подгорнова, Дмитрий Васильевич ульнесь авторитетэкс эсь нуцьканзо ды малавиксэнзэ туртов.
Выставкань ваныцятне тешкстызь, архивень важодицятне теить покш робота – сынь ванстыть минек раськетнень сюпав историянть.
Дмитрий Васильевич Цыганкин чачсь 1925 иень октябрянь 22-це чистэ Чаунзань райононь Мокшалей эрзянь велесэ. Сон – Ине Отечественной войнань участник, финно-угровед, лингвист, МАССР-нь школань заслуженной учитель, филологиянь наукань доктор, профессор, Огаревонь премиянь лауреат, Россиянь ды МАССР-нь наукань заслуженной деятель, наукасо ды техникасо МР-нь Государственной премиянь лауреат, МР-нь Прявтонь премиянь лауреат.
Ламо иетнень перть важодемстэ сон ютась ки тонавтыцясто саезь Россиясо ды омбо масторонь наукасо эрзянь-мокшонь ды финнэнь-угрань лия кельтнень ванныцякс.
Юлия Еремина