РФ-нь Президентэнть Владимир Путинэнь Указонзо коряс, 2026 иесь яволявтозь Россиянь раськетнень вейсэндявомань иекс. Неень шкане Россиясо эрить 193 раськеть, конат кортыть 270-де ламо кельсэ. Косояк лия таркасо истямо сюпавчи арась. Ды минек прявт тевенек – ванстомс кельтнень, раськетнень, ойменек, питнейчинек.
«Эрзянь правдась» вейкине газета весе масторонть келес, конась вансты-виевгавты минек тиринь эрзянь келенть. Ды те максови аволь ансяк интервьютнень, репортажтнэнь, зарисовкатнень вельде, газетань редакциясонть свалшкане ютавтовить мельстуиця вастовомат, пелькстамот, мастер-класст, конат сюлмавозь раськень койтнень-кирдатнень, культуранть ды семиянь сюпавчитнень ванстомаст марто. Истя, неть читнестэ «Эрзянь правда» газетань редакциясо колмоцеде ютавтовсь Раськень оршамопелень ды мазылгавтнемань чи. Коллективень важодицятне ды инжетне оршнесть эрьва кодамо раськень костюмт: эрзянь, мокшонь, рузонь, татаронь, казаконь. Теньсэ сынь невтизь, весе раськетне минек республикасо эрить ялгаксчисэ ды национальной редакциятнесэ эрьва ломанесь, раськензэ лангс апак вано, учовикс инже!
Вастовомань покш инжекс ульнесть Н.П. Огарев лемсэ МГУ-нь Раськень культурань институтонь театральной искусствань ды народной художественной культурань кафедрань доцентэсь Людмила Левина, Андрей ды Анна Шулугинтнэнь раськень койтнень-кирдатнень ванстыця ламо эйкакшонь триця-кастыця семиясь, Н.П. Огарев лемсэ МГУ-нь Геоинформационной технологиятнень ды географиянь институтонь «туризм ды картография» специальностень коряс тонавтницятне Виктория Куркова, Арина Винокурова, Андрей Дурнов, Егор Родионычев ды Егор Горин.
Сыньгак весе варчнизь раськень оршамотнень, мазыльматнень, пряс путоматнень ды евтнесть седе, кодат раськень оршамопельть сынь кандтнить кенярксчистэ ды стяконьчистэ.
Газетань прявт редакторось Марина Девятова пачтясь раськень оршамопельтнень мазычидест ды тешкстнэде, конат кандыть ламо смусть.
– Вечкевикс ялгат, течи минь колмоцеде ютавттано Раськень оршамопелень ды мазылгавтнемань чи, конась алтави минек раськетнень культураст ды койтнень-кирдатнень ванстомантень ды Россиянь раськетнень вейсэндявомань иентень. Эсенек редакциясо минь пурнатано сеть ломантнень, конат ванстыть эсь покштятнень-бабатнень койтнень-кирдатнень, евтнетяно седе, кодат эрьва раськенть оршамопелензэ, кодамо смусть сынь кандсть икеле ды кода весемесь полавтовсь течи. Покш мельспаро неемс минек инжетнень, – тешкстызе Марина Николаевна ды тердинзе весень эрзянь пачалксе-пряка марто чайде симеме.
Людмила Левина пек вадрясто евтнесь эрзятнень ды мокшотнень оршамо- ды карсемапельтнеде, тейтерьавань мазылгавтнематнеде. Людмила Демьяновна ИНК-нь студенттнэнь марто ламоксть ульнесь научной эрьва кодамо экспедициясо, сынь домкасто тонавтнизь минек раськетнень зярыя пингень историянть. Покш мельспаро ульнесь марямс ды неемс (Людмила Демьяновна анокстакшнось видеопрезентация), кодамо палясо-юбкасо, понкссо-панарсо, карьсэ-котасо якасть минек покштятне-бабатне XVII, XVIII, XIX, XX пингетнестэ, ды кода весемесь полавтовсь течи. Виде, пек а шождат ульнесть кезэрень шкатне. Лиясто оршамс-карсемс ульнесь а мезе, теке марто, ломантне снартнесть кирдемс кенярксчинь оршамот ды, натой, ульнесть мазылгавтоматкак: пилекст, пряс путомкат, кирьгас понгавтовиця мазыльмат. Бути саемс карсемапельтнень, сынсткакт стыльть-теильть эрьва кодат. Нама, башка таркасо аштесть картьне. Сынст куш кодамо пертьпелькснэнь ладицякс теилизь. Теке марто, мокшотненьгак ды эрзятненьгак кезэрень шкатнестэяк ульнесть мазый котынест.
Покш мельспаро пурнавозтненень ульнесь вастовомс Шулугинтнэнь шкинемав кудораськенть марто. Андрей Андреевич ды Анна Сергеевна эрить Саранскойсэ ды трить-кастыть колмо эйкакшт – Полинань, Дарьянь ды Иванонь. Кудазорось – Мордовской Государственной филармониянь артист, «Разгуляй» моронь ды киштемань казачьей ансамблянь солист. Анна Сергеевна – Равчирень финнэнь-угрань раськень культурань центрань этнокультурной касомань-виевгавтомань коряс специалист. Теке марто евтама, сон икеле морсесь «Мерема» этно-фолк ансамблясонть. Полина тонавтни 8-це классо, Дарья – 3-це классо, Иван яки эйдень кужов. Эряви евтамс, тейтерькатне, аваст-тетяст ладсо, явить мель шкинемантень, сынь морсить «Виртеня» эйкакшонь этно-фолк группасо. Ваня а яви эйстэст. Ды зярдо весе вейсэ кодамояк кенярксчисэ сергедить моро, паро мельсэ моры мартост. Мирдесь – руз, нись – эрзя. Ансяк те а ашти пирявксокс эсь раськень койтнень-кирдатнень ванстомасо. Шулугинттнэ тень вадрясто теить шкинеманть вельде – морыть эрзянь, мокшонь, рузонь морот.
Кода мерсь Анна Сергеевна, берянь, эйкакштне сонзэ тиринь эрзянь кельсэ а кортыть, ансяк эрзянь морот морыть покш мельсэ. Ды те кенярдовты. Весе пурнавозтненень сынь казсть эрзянь мазый моро.
Минек редакцияв инжекс весе семиянек сакшность раськень оршамосо. Анна Сергеевна евтнесь эсензэ оршамодонть. Сонзэ палясь уш пек умонь, максокшнызе эсест велень (Отяжелень райононь Селищань) эрицясь Маря баба. Сарафанось ванстовсь икеленсесь, ситцасто кофтанть ды домотканной коцтсто алга юбканть жо тейтересь стынзе сонсь. Самай истямо оршамосо Селища велень аватне якильть икелень шкасто. Костюмось пек мазый. Берянь, велетнесэ раськень оршамосо ней уш киньгак а вастат. Бути ансяк кенярксчистэ, сестэяк стилизованной костюмсот (Шулугинттнэнь кудораськеденть седе келейстэ сермадтано газетань маласо номертнэсэ).
Редакциясо вастовомась лиссь лембе, мельстуиця. Раськень ярсамопель марто столь экшсэ чайде симемстэ кортомась эзь редявояк, шкась ливтясь пек куроксто. Инжетне тешкстызь, истят вастовомат эряви пурнамс седе сеедьстэ.
Юлия Еремина
Фототне Егор Горинэнь.