Регионсонть Мордовия Республикава «Защитники Отечества» Государственной фондонь филиалонть кармавтомазо коряс тевс нолдазель «Женственность в броне» лементь ало фотопроектэсь, конань прявт героинякс кармасть СВО-нь аватне-ветерантнэ.

Профессиональной фотостудиясо Саранскойсэ ды республикань районтнэсэ эриця аватне Олеся Варламова фотографонть объективензэ икеле аштесть истят образтнэсэ, косо вейсэндязель военной доблестесь ды авань мазычись. Проектэнь участницатнень ютксольть военной медсестратне Елена Грачева («Герои среди СВОих региональной программань финалисткась) ды Сатеник Хозина, истя жо Херсонской областень полициянь миграционной службань сотрудницась Наталья Шеломанова. Сень лангс апак вано, героинятне военной ды полицейской формасольть, Марина Шишкина ды Ирина Ручина визажисттнэнь роботаст вельде эрьвантень анокстазель лия енов а молиця авань образ, мезезь тешкстась сынст мазычист ды оймевиест.

«Отечествань ванстыця ламот тейтерьаватнень туртов те профессиональной сессиясо улемань васенце опыт ды, нама, неень а шожда шкатнестэ те вастневи пек чуросто, ансяк мероприятиясь тейтерьаватненень лездась одс невтемс Пазонть пельде максозь эсь мазычинть, – кортась «Защитники Отечества» Госфондонь филиалонь общественной проекттнэнь коряс прявтонь полавтыцясь Александр Горюнов. – Тейтерьавань раськеютконь чиденть икеле неть мазый портреттнэ мазылгавтсызь Саранскоень билбордтнэнь. Сынст лангс ванозь, Мордовиянь прявт ошонь эрицятне ды инжетне мельс ледстясызь сеть тейтерьаватнень, кить стясть Отечестванть ванстомо эсь пряст кис апак мелявто ды мездеяк апак пеле».

Фотопроектэнь участниктнестэ вейкесь – СВО-нь ветеранось, операционной медсестрась Елена Грачева. Зярдо ушодовсь специальной военной операциясь, сон сеске каясь яволявтома фронтов кучомадо, ансяк сестэ отказасть – тейтерьават зярс эзть сае.

«Шкась мольсь, сась частичной мобилизациясь, фронтов кармасть туеме ялган. Монень ульнесь а ен – тосо истя эряви монь лезксэм, а мон тесэ аштян!» – ледстни Елена. Мейле, 2023 иень июльстэ сон тешкстась Оборонань министерстванть марто контракт ды тусь «ленточканть удалов».

Профессиональной покш опытэсь лездась а пелиця авантень идемс минек солдаттнэнь эрямост. Елена Грачева прядызе Саранскоень медицинань колледженть «сестринское дело» специальностенть коряс ды эсь профессиональной кинть ушодызе онкодиспансерсэ, седе тов важодсь Республикань клинической 1 № больницянь хирургиянь отделениянь медсестракс.

1 иень ды 8 ковонь перть Грачева старшей операционной медицинской сестрась эрьва чистэ лездась россиянь ранязь боецтнэнень фронтонь маласо госпитальсэнть, чизэнзэ сыльть 300 ломанть, оймсема читнестэ ды кенярксчитнестэ операциянь ютавтомсто лездась военной хирургтненень. Сон евтни, ранявозтнень сельмсэ несь ансяк вейке мель – изнямс, ды ламот лезксэнь максомадо мейле бажасть мекев фронтов. «Фронтсо медперсоналонть туртов арась чарькодема «боец» эли «военный», – корты Елена. – Эрьва ранязентень минь пшкадтяно «монь вадринем», «монь вечкевиксэм», «минек героесь». Эряви явомс аволь ансяк медицинань, истя жо моральной, оймень лезкс. Ды эрьванть кисэ мелявтат седейсэть – лиякс а лиси».

Елена Грачева младшей сержантось казезь «Участнику специальной военной операции» ды «За боевые отличия» медальтнесэ.

Елена Грачевань эйкакшонзо, Лида ды Владимир, свал покш вечкема ды каштанчи марто кортыть авадост.

Фототне «Защитники Отечества» Госфондонть.