Суббота, сентября 18, 2021
Важное
Тедеде Мордовиясо ютавтови финнэнь-угрань культурань лия ёнов а молиця фестиваль, козонь пурнавить беряньстэ ды овсе а мариця ломантне. Те форумонть ютавтомань ушодксонть путызе Амарицянь весероссиянь обществань региононь отделениясь Президентэнь грантонь фондонть ярмаконь лезксэнзэ вельде.
Кода вельмесь истямо фестивалень ютавтомань мелесь-арсемась? Теде ёвтнесь ВОГ региононь отделениянь председателесь Ольга Зубаровская.


Амарицянь мастор

– «Удивительный мир тишины финно-угорской культуры» фестивалень участникекс кармить пек эряза, теке шкастонть аламо информациянь мариця ды лия ломань марто аламо кортыця ломантне – эйкакшпингстэ саезь а мариця инвалидтнэ. Те сеть, конатнень туртов невтнезь (жестовой) келесь ловови тиринсекс, ламотненень – вейкинекс.
Ламо тувталтнэ кармавтыть истят ломантнень кортнемс ансяк сынсест кондятнэнь марто. Лисни, амарицятне – теке государства государствасо. Секс мекс Россиянь регионтнэсэ весе амарицятне якить вейке эйдень кужов, мейле жо – вейке школав. Истямо ладсо сынь весе содыть вейкест-вейкест ды кортнема ялгатнеяк некеть», – тешкстызе Ольга Станиславовна.
Куш, амарицятнень ютксо ламо ёроков ломанть. Республикасонть ды ошсонть ютавтовиця ламо покш мероприятиятне а мариця ломантнень туртов а кандыть кеняркс. Сынст туртов алкуксонь кенярксчись – республикантень лия регионсто сыця а мариця ялгатнень марто кортнемась.
– Сы фестиваленть вельде, – кемевти Ольга Зубаровская, – Мордовиянь весе а мариця эрицятне ды инжетне теевить содавиксэкс вейкест-вейкест марто, муить од ялгат ды седейшкава кортнить невтнезь (жестовой) кельсэ.

Творческой олячинь форум

«Финнэнь-угрань культурань сэтьмечинь дивавтыця мастор» фестивалесь ниле чис вейсэндясынзе Мордовиянь, Ханты-Мансийскоень, Удмуртиянь, Марий Элэнь, Коминь, Финляндиянь, Норвегиянь, Швециянь, Эстониянь, Венгриянь, Латвиянь, Румыниянь, Забайкальянь а мариця инвалидтнэнь.

Эсь раськень искусстваст невтьсызь кемголмово делегацият. Форумонтень пурнавозтне ёвтнить эсь тиринь ёнкстост, культурань койтнеде, невтить раськень ремеслатнень коряс мастер-класст, ютавтыть декоративно-прикладной искусствань выставкат.

Инжетнень туртов ютавтовить республикань содавикс таркатнева ды Саранскойга экскурсият, усксызь Пайгармань Параскево-Вознесенской монастыренть ваномо. Кочкуровань Вирь ало Тавласо фестивалень делегациятне теевить содавиксэкс чувто ланга керсеманть марто, содавтсызь Владимир Ромашкинэнь Этно-кудонть. Тосо жо ютавтовить раськень спортонь налксематнень коряс пелькстамот. Форумонь меельце тешксэкс карми финнэнь-угрань этнической костюмтнень дефиле ды а мариця артисттнэнь гала-концерт.

Мелень кепедема инклюзивной волонтёронь движениянтень

– Нама, фестивальденть икеле эряви топавтомс эрявикс тевтеема, – тешкстызе Ольга Зубаровская. – Тень туртов эряви анокстамс волонтёрт. Эрьва делегациянть туртов эрявить кавто лездыцят – мариця волонтёр ды а мариця, кона машты мелензэ ёвтамо невтнезь (содасы жестэнь келенть). Секс мариця волонтёртнэнь туртов минь пурнынек жестэнь келень колмо ковонь курсат, штобу сынь маштовольть кортнеме инжетнень марто.

«Финнэнь-угрань культурань сэтьмечинь дивавтыця мастор» проектэнть теицятне кемить, те фестивалесь, паряк, саи Президентэнь грант. Ды аволь ансяк келейгавтсы эрьва кодамо республикань ды масторонь а мариця ломантнень ютксо ояксчинь кирьксэнть, истя жо карми Мордовиясо инклюзивной волонтёронь движениянть туртов мелень кепедемакс.

Тонавтнить кортамо... кедьсэ

Саранскоень волонтёртнэ, конатненень сави вастомс «Финнэнь-угрань культурань сэтьмечинь дивавтыця мастор» раськеютконь фестивалень инжетнень, маень оймсема читнестэяк тонавтнесть.
Неень шкасто Амарицянь весероссиянь обществань Мордовиянь отделениянтень совицятне тонавтнить региононь достопримечательносттнень, штобу невтемс сынст ды ёвтнемс эйстэст инжетненень.

Волонтёртнэнь ютксо республикань краеведческой ды Эрьзянь музеень важодицятнеяк. Сыненст, фестивальденть башка, жестэнь келесь эряви эсь тевенть топавтомстояк. Эдь музеев покш мельсэ якить амарицятнеяк.

Теде башка, группасонть улить студентт, конатнень туртов невтнезь кортнеманть ули профессиональной интересэзэяк. Анастасия Ляличкина ды сонзэ ялгатне тонавтнить М.Е. Евсевьев лемсэ МГПУ-нь психологиянь ды дефектологиянь факультетсэ, арсить пряст алтамс коррекционной педагогикантень. Н.П. Огарёв лемсэ МГУ-нь Медицинской институтонь васенце курссо тонавтницянть Диана Аряшевань волонтёронь опытэзэ уш ули, сон эштё школасо тонавтнемстэ лездась футболонь коряс 2018 иень масторлангонь чемпионатонть, раськеютконь ды весероссиянь од ломанень форумтнень ютавтомсто. Андрей Богатырев – «Е.В. Швецов лемсэ сурдлимпийской ды паралимпийской резервань спортивно-адаптивной школань» старшей тренерэсь – важодемань коряс уш сюлмавозь беряньстэ ды овсе а мариця эйкакштнень марто.
Волонтёртнэ кортыть: «Кода эрьва кодамо лия келенть, невтнезь кортамонть тонавтнемазо а шожда».

Эдь невтнезь (жестовой) лексикась ды дактилесь – аволь вейкеть. Нурькинестэ, невтнемась, кода Китаень иероглифтне, истямо лувсо ёвтави смустесь. Дактильной азбукась – сурсо невтневиця знактне. Эрьва знакось невти башка буква, раськень дактильной алфавиттнэсэ зняро дактильтнеде, зяро букват се эли тона кельсэнть.

– Дактиленть вельде невтеви эрьва кодамо валось, – кемевти Ольга Зубаровская, – ломанень лемесь эли ошонь, велень лемтне. Секс волонтёртнэ бажить ве шкасто тонавтнемс жестовой келенть ды дактиленть.

Колмо ковонь курсатнеде мейле Саранскоень волонтёртнэнь марто ниле чинь тренингтнень ютавтсынзе «Амарицянь весероссиянь обществань учебно-методической куншкакуронь» директорось Людмила Осанина.

Ольга Зубаровская кеми, марицятнень ды амарицятнень ютксо вейсэнь важодемань опытэсь эрявомо карми аволь ансяк фестиваленть шкасто, икелепелевгак карми виевгадомо ды келейгадомо.

«Кортыця нармунесь» карми фестивалень тешксэкс

Нама, финнэнь-угрань фестиваленть карми улеме «визитной карточказояк» – кортыця нармунесь. Сонзэ арсизь сурдо-ютавтыцясь Людмила Кияйкина ды дизайнерэсь Евгений Седойкин.
Форумонть пурныцянть Ольга Зубаровскаянь мельс сась эмблемасонть невтемс мезеяк истямо, мезесь вейсэнди весе финнэнь-угрань раськетнень. Тень кис варштасть раськень мифологиянь ушодкстнэнень. Кезэрень шкасто ламот угро-финнтнэ пек кемсть пертьпельксэнь вийтнес. Сэтьмечинь ды покш виень тешксэкс ловсть Ине ведень нармуненть. Сон самай саезельгак фестивалень эмблемань образокс, кона артозь республикань флагонть тюссо.

Нармунень сёлмотне пек молить ломанень кедь ёнов, конатнень вельде самай кортнитькак эсь ютковаст амарицятне. Эмблемасонть Ине нармунень якстере сёлмось раськеютконь жестовой кельсэ те – «минь тынк вечктядызь», сэнь сёлмось – «шумбрачи, садо, инескеть!» – чарькодевикст весенень. Нармуненть велькссэ солярной тешксэсь невти чипай, валдочи, лембе, лиякс меремс, мода лангсо эрямонь ушодксонть.

Артыцятненень пек парсте удалась невтемс форумонь смустенть, конань прявт мелезэ – раськень культурань питнейчитнень ванстомась, эрьва кодамо масторонь ды региононь амарицятнень ютксо ояксчинть кемекстамось ды истят вастовоматнень седе сеедьстэ ютавтнемась.

Мила Мельникова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».