Июлень 8-це чистэ масторлангонь келес тешкстави Семиянь, вечкемань ды кемемачинь чись. Сонензэ ламо паро тевть алтавить минек республикасо. Пингень перть эрямс вейсэ, каземс вейке-вейкенень вечкема, улемс кеме нежекс стака шкасто ды лия алтамот свал евтыть одтнэ урьвакстомсто-венчамсто.
Пек паро, бути истят арсематне топавтовить, совавтовить эрямос, ламо шкань ютазьгак ванстовить! Кементь иетнень перть вейсэ эрязь, мирдесь ды нись кадовить малавикс ломанекс ды мик варштавкссо кармить чарькодеме вейкест-вейкест!
Мордовиясо улить семият, конатне малав пингень перть эрить ояксчисэ, вейсэ цидярдызь эрямонь весе стакачитнень ды вечкезь пачкодсть сырнень свадьбань тешкстамонь шкантень. Истятнэнь ютксто вейкесь – Покш Игнатбуень эрицятне – трудонь ветерантнэ Геннадий ды Валентина Кондратьевтне.
Сынст эйкакш пингедест, семиянь уцяскадост, эрямо кидест минек ловныцятненень пачти Валентина Кондратьева.
– Валентина Михайловна, инескеть, евтнеде эсенк ланга. Кода ды косо ютась эйкакш пингенк?
– Монь эйкакшчим аламо мейсэ явовсь минек велень лия эйкакштнень эйстэ. Тиринь райононь Краснонивскойсэ ульнесь ансяк начальной школа, эрьва чистэ савсь тенек мекев-васов якамс Киржеманы велев. Сеть иетнестэ тосо интернат арасель, куш се шкане сон пек эрявсь минек туртов. Эдь эрьва валске аволь покш эйкакштненень савкшнось стякшномс чоподань зорят ды пачкодемс ялго школав шабра велев. Уроктнень прядовомадо мейле таго ютамс ялго сисем вайгельбеть. Кавксо класстнэнь прядомадо мейле тонавтнеманок поладынек Покш Игнатовань средней школасо.
Морамонь вечкемась пачтимим Ардатовань культпросветучилищав, косо прась уцяска тонавтнемс малав колмо иеть.
1970 иестэ, кода од специалистэнть, ильтимизь важодеме тиринь районов, ладимизь Од Баева велень Культурань кудонь прявтокс. Се шкане велетнесэ ломантнеде ульнесть ламо, кодат ансяк мероприятият эзинек ютавтне. Весе кенярксчитненень анокстынек вейсэ од ломантнень марто. Теде мейле савсь тень важодемс Киржеманонь Культурань кудосо художественной руководителекс, шкань ютазь – библиотекарекс, эрямом перть лия тевтькак топавтынь ламо таркасо.
– Валентина Михайловна, те иестэ топодсть ведьгемень иеть, кода вейсэндинк эрямонк Геннадий Андреевич марто. Кода теевиде содавиксэкс ды мезесь свал ульнесь васень таркасо вечкеманк ванстомасо, семиясонк ояксчинть ды ладямонь лувонть кирдемасо?
– Геннадий Андреевич марто минь вейке таркасто. Эйкакш пингенек ютась Покш Игнатовань Жабина (Красная Нива) велесэ. Свал ульнинек вейсэ, кода касынек, карминек вастневеме, шкань ютазь венчинек-урьвакстынек.
Ведьгемень иеть ютасть се шкастонть, маряви, весемесь прок исяк ульнесь… Ледстяви, свадьбань чиденть икеле валсь виев пиземе. Умонь шкасто саезь эрзянь велетнесэ ульнесь истямо кой, икелень чистэнть одирьванть ялганзо сыльть церанть кудос панаронь кандомо. Монь ялгатнень, Лидия Барговань ды Раиса Кистановань, кить сыргасть те тевенть топавтомо шабра велестэ, пиземесь стардынзе ки лангсо. Од тейтертне ютасть ялго ды сынь допрок начксть. Савсь тенст велявтомс одов кудов. Тешкстасынек, сеть шкатнестэ веледе велес транспорт эзь яксе.
Свадьбань чись пек манеель. Малавиксэнек казсть тенек ламо мазый цецят, казнеть. Мельспарозон, сурксонокак ульнесть сырнень. Эдь се шкане истямо казне аволь весенень рамсекшнесть. А вана фотограф арасель, секскак вейкеяк снимка арась се чиденть. Кезэрень эрзянь коенть коряс, инжетне колмо чинь перть киштсть-морасть!
Ней пачтян вечкеманть ванстомадо. А мезть сепомс, эрямосо эрьва кодат стакачить эрсить, ансяк эряви маштомс сынст изнямс. Кеме семиянть ды вечкеманть а шожда ванстомс, кода ломанть кортыть, колазь суликась одс а педявтови! Койсэнь, эряви маштомс кунсоломс ды марямс вейке-вейкень, чарькодемс, зярдо вейкентень эрси пек стака – эряви лездамс ды свал улемс анококс аравтомс кеме лавтов. Течи, ведьгемень иень ютазь, евтан покш сюкпря Пазонтень ды мирдем туртов уцяскав эрямонть кисэ!
– Инескеть, евтнеде нурькинестэ мирденк ланга, кодамо семиясто сон?
– Венчамодо-урьвакстомадо мейле карминек эрямо мирдень кедьсэ. Кондратьевтнень раськесь Жабинасо содавикс кода трудонь вечкиця, шабратнень ды лия ломантнень марто ладямо маштыця. Истямокс ульнесть атявтомгак ды ававтомгак.
Кудазорось, мирдень тетязо, Андрей Васильевич, ютась Ине Отечественной войнань толонть пачк, тосо стакасто ранязель, фронтсто сась вейке пильгевтеме. Тень лангс апак вано, кедензэ эзинзе нолда, пингень перть важодсь колхозсо кладовщикекс. Сынст ульнесь покш хозяйстваст, трясть ламо ракшат.
Вейсэ Анна Филипповна нинзэ марто сынь кастсть ниле эйкакшт: колмо церат ды вейке тейтерь. Юткстост эрьвась муизе эрямо кинзэ: Юрий важодицяль, Геннадий ды Анатолий кармасть водителекс, Тамара васня важодсь редакциясо, мейле – коммунальной хозяйствасо.
Койсэнь, мирдем туртов невтемакс свал ульнесть тетязо ды авазо. Геннадий, сынст лангс ванозь, эрямонзо сюлмизе велень хозяйстванть марто, эсь шкастонзо сон эзь туе ошов шожда тевень вешнеме, кадовсь важодеме тиринь районсо. Сон свал ульнесь «Знамя труда» колхозонь икеле молицятнень ютксо. 1975 иестэ лиссь изницякс сюронь урядамонь коряс соцсоревнованиясо.
Шкань ютазь, зярдо семиянок покшолгадсь, чачсть кавто эйкакшонок, эрявсь тенек башка эрямо тарка, мирдем ютась важодеме Покш Игнатовань жилищно-коммунальной хозяйствав. Райцентрасо макссть тенек кавто этажонь кудосто а покшке квартира. Сестэ, кода ушосонть якшамось пачколесь малав 40 градусос, кудосонок уштомань трубастонть артовксоськак лутавкшнось, ведеськак мик кельмекшнесь, ялатеке уцяскавт ульнинек! Эдь минек кассть кавто эйкакшонок, Андрейнень ульнесь пельие, Ольганень кавтояк арасельть. Мельспарозонок, 1995 иестэ совинек эрямо кавто комнатасо покш квартирас, косо эрятано те шкас.
– Валентина Михайловна, кодамо эрямо ки кочкасть эйкакшонк? Вановтонк коряс, кода неень шкане эряви сынст кастомс, мезе бу евтавлиде од тетятнень-аватнень туртов?
– Кода вере ледстинь, минек кавто эйкакшонок. Андрей церанок служи Росгвардиясо. Специальной военной операциянь ушодовомань васенце читнестэ саезь сон вансты минек границятнень. Истя жо эсь шкастонзо топавтсь служебной долгонзо Чечнясо. Элла нинзэ марто кастсть колмо эйкакшт, вейсэть комсь иеть. Дмитрий цераст важоди, тейтерест-кавтаськетне тонавтнить Московсо Тимирязев лемсэ академиясо. Мельспарозонок, сеедьстэ сакшныть Мордовияв, Андрей, отставкас лисемадо мейле, арси велявтомс тиринь республикав. Сон казезь «За заслуги перед Отечеством» II степенень орденсэ.
Ольга тейтеренек Н.П. Огарев лемсэ МГУ-нть прядомадо мейле васня важодсь МР-ва Пенсионной фондонь минек райононь отделениясо, ней Мордовия Республикань Социальной фондсо.
Неень шкань од ломантненень эйкакшост кастомсто меревлинь бу истя: вечкеде сынст, седе ламо шка мартост ютавтодо, уледе тенст малавикс ялгакс! Вишка пингестэ тонавтынк важодеме, стакачиде а пелеме, кастынк алкуксонь ломанекс.
– Пенсияв лисемадо мейле сыре ломантнень ютксто ламотне а содыть, мезе теемс, сеедьстэ колави ежомарямост. Кода Тынь те шканть ютавттадо?
– Койсэнь, ламось ашти эсенек эйстэ ды кинь кодамо обуцязо. Невтемакс, пенсияв туемадон мейле эрямом тунь эзь полавтово. Меревлинь бу, сон кармась седеяк пек сюпав эрьва кодамо мелень витемань тевсэ.
Тедеде 25 иеть топодить Покш Игнатовань райононь «Пизелнэ» («Рябинушка») ансамблянтень, эйстэст комсь иеть монгак тов сован, ламо иень перть ульнинь прявтокс. Концертэнь программанок марто ков ансяк эзинек пачколе, минек райононь весе велетнень ютынек ды Саранскойсэяк аволь весть ульнинек.
Истя жо ульнинь Покш Игнатовань велень поселениянь Ветеранонь советэнь прявтокс. 2015–2023 иетнестэ – Покш Игнатовань райононь Ветеранонь советэнь прявтокс. Течи стака ледстямскак, кодат вастовомат ды мероприятият минь ютавтынек вейсэ Советс совицятнень марто.
Весе неть тевтнень топавтомс тень лезды вечкевикс мирдем, кие свал аволь ансяк монь, ансамбляс совиця ялгангак пачти машинасо эрявикс таркав. Текенень поладса, минь кавоненек вечктяно калонь кундамо, пертьпельксэнь мазычитнень ванкшномо. Эдь эрьва тевесь, бути сон топавтови ладязь, вейке-вейкень апак покорда, канды покштояк покш кеняркс ды уцяска. Кадык мастор лангсо кармить улеме седе ламо ояксчисэ эриця семият!
Валентина Юдина
Фототне саезь Кондратьевтнень семиянь архивстэ.