Январень 13-це чистэ Республикань Кудосо ютавтовсь кенярксчинь промкс, конась алтазель Россиянь Печатень чинтень. Региононь журналисттнэнень поздоровт евтась Мордовиянь Прявтось Артем Здунов. Артем Алексеевич тешкстызе СМИ-нь эрявиксчинть обществанть эрямосо, мерсь, журналисттнэнь профессиональной важодемаст лезды редямс ды витемс стакачитнень, лезды республиканть седе тов виевгавтомантень.
«Массовой информациянь средстватнень покш таликаст аволь ансяк общественной мельтнень-арсематнень кемекстамосо. Минь сермадтано минек масторонь, минек обществань, эрьва семиянь, ломанень летопись, секскак кулянтень кемемань уровенесь пек эрявикс, – мерсь республикань Прявтось. – Информационной пространствась меельце иетнестэ кармась сюпавокс, мельстуицякс. Тыненк, профессионалтнэнень, те максови шождасто – содамочитнень ды опытэнть мельсэ кирдезь. А мезе теемс рядовой гражданинэнтень? Зяро карадо-каршо аштиця кулят, манчемат нолдыть яттнэ – кие-бути омбо масторсо бажи весементь коламс ды тень теи арсезь. СМИ-нь профессиональной енкстомо а эри вейкеяк государствась, вейкеяк республикась. Свал кирдеде мельсэнк: тынь – кода врачт, тыненк кемить, тынь профессионалт. Секскак онкстынк эрьва валонть, конань пачтятадо ломантненень».
Артем Здунов пштилгавтынзе журналисттнэнь вановтост ней талновтыця кевкстематнень лангс. Те, васняяк, демографиянь кевкстематне: «Эряви кортамс ды невтемс сень, мезесь минек лиси. Седе, мезесь а лиси, истя жо эряви кортамс, ансяк тевень содазь, аналитикань ендо чарькодезь. Минек Президентэнть кармавтоманзо коряс республикасонть эряви важодемс демографиянть лангсо. Покш ды кеме семиясь – те пек вадря невтема».
Массовой информациянь средстватне покш мель явить нацпроекттнэнь топавтомантень – китнень, школатнень, больницятнень, стадионтнэнь, библиотекатнень витнемантень. Ютазь иень прявт темакс кармасть историянь ледстнематнень ванстомась, специальной военной операциянь геройтне, Ине Изнямонь 80 иетнень, Мордовиянь автономиянь 95 иетнень тешкстамось. «Ванстомс видечинть, бороцямс аволь виде кулятнень пачтямонть каршо – те минек прявт тевенек, – тешкстызе региононь руководителесь. – Миненек эряви седе келейстэ евтнемс раськеденек, культурадонок. Тедеде топодить 150 иеть минек ине скульпторонть Степан Эрьзянь чачома чистэнзэ, кармить ламо инжеть, ды эрьвантень эряви саемс мартонзо Мордовиянь кулянь пелькскенть».
Покш тарка тевтнень видестэ невтемасонть саить журналистэнь пелькстамотне. Телевидениясо важодицятнень туртов сехте содавикс казненть – «ТЭФИ-Регионы» премиянть – мелят получизе «Мордовия» ГТРК-сь. «Вести Мордовия» программась кармась сехте вадрякс «Ежедневная информационная программа» номинациясонть. «Народное телевидение Мордовии» совась Весероссиянь пелькстамонь изницятнень юткс, конань анокстызе Россиянь Спортонь министерствась. Коень коряс Мордовиянь журналисттнэ саить изнямонь таркат «СМИротворец» Весероссиянь пелькстамосонть. Те корты межэтнической журналистикань енкссо публикациятнень профессиональной виевчидест.
Мордовиянь Прявтось тешкстызе, тедеде СМИ-тнень икеле аштить покш тевть – ламо мероприятият, «Здоровое долголетие» федеральной проектэнь топавтомась, семиянь повесткась, кочкамонь кампаниясь ды ламо лият.
«Мордовия Республикань Правительствась ды монсь – минь свал анокт кирдемс мельстуиця мельтнень. Минь вейсэ тейтяно покш тев. Минденек мейле кадови минек масторонь летопись, история. Кастодо важодемань династият – эйкакштне ды нуцькатне молест тонавтнеме ды важодеме журналистикав, штобу минек улевельть седе ламо профессионалт, – мерсь Артем Здунов.
Профессиональной кенярксчинть кувалма явшевсть государственной наградат, истя жо казевсть Мордовия Республикань Прявтонь журналистэнь пелькстамотнесэ изницятне ды призертнэ.
Семиянь питнейчитнень ванстомань коряс теманть сехте вадрясто невтеманть кис «Счастье мое» пелькстамонь призерось – Теньгушевань райононь «Примокшанье» газетань прявт редакторось ды ламо эйкакшонь триця авась Юлия Сазанова евтнесь, семиясь сонзэ туртов кеме неже ды покш сюпавчи. Башка сюкпря сон евтась ламо эйкакшонь триця семиятненень региононь лезксэнь явоманть кисэ ды сехте пек школасо питневтеме андомань коряс ушодксонть кисэ. «Пек паро, регионсонть аволь валсо, тевсэ кемекстави тетятнень-аватнень ды эйкакш порань питнейчись. Ды минек тевенек, кода журналисттнэнь, евтнемс теде видестэ. Покш сюкпря региононь прессантень кемеманть кисэ!» – мерсь Юлия Сазанова.
Изницятнень ютксо «Эрзянь правда» газетаськак. «ИнтоНАЦИЯ» номинациясонть I-це степенень Диплом максозель корреспондентэнтень Алена Артемьеванень.
Истя жо Мордовия Республикань Почетной грамотасо казезель минек газетань художественной редакторось Галина Табаева.
«МР-нь СМИ-нь заслуженной важодиця» лемесь максозель «Известия Мордовии» АНО-нь радиовещаниянь службань прявт редакторонтень Светлана Пивкинанень, «10 канал» телекомпаниянь информационной вещаниянь прявтонтень Евгений Симкиннэнь ды «Юлдаш» газетань ответственной секретарентень Эльвира Баляеванень. Евтатано минек коллегатнень туртов поздоровт ды арсетяно шумбрачи ды важодемасо од изнявкст!
Седе тов кортамонть поладызе МР-нь Прявтонь ды МР-нь Правительствань Администрациянь Руководителесь Булат Хайрутдинов, конась вети региононь информационной блоконть. Эсь кортамосонзо сон тешкстась: «Журналистэсь – те политолог, экономист, финансист, те ломань, конань улить содамочинзэ социальной сферань, семиянь, авань ды эйкакш пингень енкссонть. Ансяк, васняяк, журналистэсь – те покш седей марто ломань! Тынь ояксчисэ эриця вейке покш команда, конась эрьва чистэ ашти кулянь войнань сехте пшти таркасо».
СМИ-нь представительтненень профессиональной кенярксчинть кувалма поздоровт истя жо евтасть МР-нь Правительствань Председателень тевтнень топавтыцясь Галина Лотванова, МР-нь Правительствань Председателень полавтыцясь Алексей Ежов, Мордовия Республикань Прявтонь ды Мордовия Республикань Правительствань Администрациянь Информационной политикань управлениянь прявтось Альбина Симакина.